ބީއެމްއެލް އިސްލާމިކްގެ އަހަރީ ޕްރޮމޯޝަން: 10 ކަސްޓަމަރުންނަށް ހައްޖު ދަތުރު

އަހުމަދު ނިހާން

23 ޖެނުއަރީ 2025 - 16:12

0 comments

ބީއެމްއެލް އިސްލާމިކް އިން އަހަރީ ޕްރޮމޯޝަންގެ ދަށުން 10 ކަސްޓަމަރުންނަށް ހައްޖު ދަތުރު ދެނީ

ބީއެމްއެލް އިސްލާމިކުގެ 10 ވަނަ އަހަރީ ދުވަސް ފާހަގަ ކުރުމުގެ ގޮތުން، އެ ބޭންކުގެ 10 ކަސްޓަމަރަކަށް ހައްޖު ދަތުރު ލިބޭ ހާއްސަ ޕްރޮމޯޝަނެއް ފަށައިފި އެވެ.

ބީއެމްއެލްއިން ބުނީ އެ ޕްރޮމޯޝަންގައި ބައިވެރިވެވޭނީ، އިސްލާމިކްގެ ޚިދުމަތް މިހާރު ބޭނުންކުރަމުންދާ ކަސްޓަމަރުންނާއި އަލަށް ޚިދުމަތް ބޭނުން ކުރަން ފަށާ ކަސްޓަމަރުންގެ ތެރެއިން ފައިނޭންސިން ފެސިލިޓީއެއް ބޭނުންކުރަމުންދާ ކަސްޓަމަރުންނާއި، މުސާރަ ޖަމާކުރާ ކަސްޓަމަރުންނަށާއި، ޖެނެރަލް އިންވެސްޓްމެންޓް އެކައުންޓް ނުވަތަ އިސްލާމިކް ކްރެޑިޓް ކާޑެއް ބޭނުންކުރަމުންދާ ކަސްޓަމަރުންނަށް ކަމަށެވެ.

މި ޕްރޮމޯޝަން ކުރިއަށް ދާނީ މިއަދުން ފެށިގެން މި އަހަރުގެ ނޮވެންބަރު މަހުގެ 30ގެ ނިޔަލަށެވެ.

ބީއެމްއެލްއިން ވަނީ، އެ ޕްރޮމޯޝަނުން ދަތުރު ލިބޭ ފަރާތްތަކުގެ ހައްޖުގެ ހުރިހާ ޚަރަދެއް ހަމަޖައްސާނީ ބޭންކުން ކަމަށެވެ.

ރާއްޖޭގެ އެންމެ ބޮޑު އިސްލާމިކް ބޭންކުގެ ހައިސިއްޔަތުން ބީއެމްއެލް އިސްލާމިކުން އެކައުންޓާއި ކާޑު އަދި ފައިނޭންސިން ހިދުމަތްތައް ހިމެނޭހެން ހުރިހާ އިސްލާމިކް ބޭންކިން ހިދުމަތްތަކެއް ފޯރުކޮށްދެ އެވެ. އެ ބޭންކަކީ އިސްލާމިކް އޯވާޑްރާފްޓް ފައިނޭންސިނިން އާއި ކޭޝް ފައިނޭންސިން އާއި ހައިބްރިޑް ހޯމް ފައިނޭންސިންގެ އިތުރުން އިސްލާމިކް ޑެބިޓް ކާޑު ރާއްޖެއަށް ތައާރަފްކުރި ބޭންކެވެ.

އެ ޕްރޮމޯޝަނާ ގުޅޭ އިތުރު މައުލުމާތު ބީއެމްއެލްގެ ވެބްސައިޓުން ލިބޭނެއެވެ.