ބީއެމްއެލްގެ ބޯޑުގައި އާންމު ހިއްސާދާރުން ތަމްސީލްކުރާ ޑިރެކްޓަރުކަމަށް ކުރިމަތިލުމަށް ހުޅުވާލައިފި

ހަސަން ހަލީމް

27 ޖެނުއަރީ 2025 - 11:27

0 comments

ބޭންކް އޮފް މޯލްޑިވްސް (ބީއެމްއެލް)ގެ ބޯޑަށް އާންމު ހިއްސާދާރުންގެ ފަރާތުން ހޮވާ 3 ޑިރެކްޓަރުގެ މަގާމަށް ކުރިމަތިލާން ހުޅުވާލައިފި އެވެ.

މި މަގާމަށް ކުރިމަތިލެވޭނީ ރާއްޖޭގެ ބޭންކިންގއާބެހޭ ޤާނޫނުގައިވާ ގޮތުގެ މަތިން އުމުރުން 30 އަހަރާއި 70 އަހަރާއި ދެމެދުގެ ފަރާތްތަކަށެވެ.

މަޤާމަށް ކުރިމަތިލާ ފަރާތްތަކުގެ ކިބައިގައި އެމްއެމްއޭގެ ޕްރުޑެންޝިއަލް ރެގިއުލޭޝަންގެ "ފިޓް އެންޑް ޕްރޮޕަރ ރިކުއަރމެންޓްސް" ގައި ބަޔާންކޮށްފައިވާ މިންގަނޑުތަކާއި ސިފަތައް ހުރުން ލާޒިމްކުރެއެވެ.

ބީއެމްއެލްއިން ވިދާޅުވީ، ކެޕިޓަލް މާކެޓް ޑިވެލޮޕްމަންޓް އޮޓޯރިޓީން އެކުލަވާލާފައިވާ ކޯޕަރޭޓް ގަވަނަންސްގައި ބަޔާންކޮށްފައި ވާގޮތައް ކޮންމެ ޑިރެކްޓަރަކީވެސް އެ މަޤާމުގެ މަސްއޫލިއްޔަތު އުފުލޭފަދަ ޤާބިލުކަން ހުރި މީހަކު ކަމުގައިވާންވާނެކަމަށެވެ.

ޑިރެކްޓަރުންގެ ބޯޑުގައި އާންމު ހިއްސާދާރުން ތަމްސީލު ކުރުމަށް އިންތިހާބު ކުރާ ޑިރެކްޓަރުންގެ މަގާމަށް ކުރިމަތިލުމަށް ހުޅުވާލައި، ބޭންކުން މިއަދު ކުރި އިއުލާނުގައި ބުނީ އެ ފުރުސަތު އަންނަ މަހުގެ 24 ވަނަ ދުވަހުގެ ނިޔަލަށް އޮންނާނެ ކަމަށެވެ.

ފޯމު ބަލައިގަންނާނީ ބީއެމްއެލްގެ ހެޑް އޮފީހުގެ 6 ވަނަ ފަންގިފިލާގައި ހުންނަ ކޯޕަރޭޓް އެފެއާޒް ޔުނިޓުންނެވެ.