ދުންފަތުގެ އިސްތިއުމާލު ކުރުމާއި ދުރުހެލިވުމަށް ރައީސް އިލްތިމާސްކުރައްވައިފި

މަރިޔަމް އަނާ

04 ފެބުރުއަރީ 2025 - 10:24

0 comments

ކެންސަރު ބަލި ޖެހުމަށް މެދުވެރިވާ އެންމެ ބޮޑު އެއް ސަބަބަކީ ދުންފަތުގެ އިސްތިއުމާލު ކުރުމުން ކަމަށާއި، ދުނިޔޭގެ ކެންސަރު ބަލީގެ ދުވަހުގައި މި ނުބައި އާދައިން ދުރުވުމަށް އަޒުމް ކަނޑައެޅުމަށް ރައީސް ޑރ. މުހައްމަދު މުއިއްޒު އިލްތިމާސް ކުރައްވަައިފި އެވެ.

މިއަދު ފާހަގަކުރަމުން އަންނަ ދުނިޔޭގެ ކެންސަރު ދުވަހާ ގުޅިގެން ސޯޝަލް މީޑިއާގައި އާންމުކުރި މެސެޖެއްގައި އެ މަނިކުފާނު ވިދާޅުވީ ކެންސަރު ބަލި ޖެހުމަށް މެދުވެރިވާ އެންމެ ބޮޑު އެއް ސަބަބަކީ ދުންފަތުގެ އިސްތިޢުމާލު ކުރުމުން ކަމަށްވާތީ، ދުނިޔޭގެ ކެންސަރު ބަލީގެ ދުވަހުގައި އެ ނުބައި އާދައިން ދުރުވުމަށް ޢަޒުމް ކަނޑައަޅަަން ޖެހޭ ކަމަށެވެ.

ރައީސް އެކަމަށް އެދިވަޑަތް އިރު، ދުންފަތާ ދެކޮޅަށް ސަރުކާރުން ވަނީ މި ފަހުން ހަރުކަށި ފިޔަވަޅުތަކެއް އަޅައިފަ އެވެ. އެގޮތުން ވޭޕް މަނާކުރުމާއި ސިނގިރެޓާއި ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުން ހިމެނެ އެވެ.

ސަރުކާރުން ބުނެފައި ވަނީ މީގެ މައިގަނޑު މަގުސަދަކީ ދުންފަތާ ދުރުވެ، ދުޅަހެޔޮ ސިއްހަތަކަށް ހިތްވަރުން ދިނުން ކަމަށެވެ.

ދުނިޔޭގެ ސިއްހަތު ޖަމިއްޔާ -- ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ)ގެ 2020 ވަނަ އަހަރުގެ ތަފާސްހިސާބުތައް ދައްކާ ގޮތުން ރާއްޖޭގައި އަހަރަކު މަރުވާ މީހުންގެ ތެރެއިން 17 އިންސައްތަ މީހުން މަރުވަނީ ކެންސަރު ބަލީގަ އެވެ.

މިގޮތުން އާސަންދައިގެ ތަފާސްހިސާބުތަކުން ހާމަވާ ގޮތުގައި 2016 އިން 2019 އަށް ރާއްޖޭގައި 7500 އަށް ވުރެ ގިނަ މީހުން ވަނީ ކެންސަރު ބައްޔަށް ފަރުވާ ހޯދާފަ އެވެ.