ރިސޯޓުތަކުން ހިންގާ ތިމާވެށީގެ މަޝްރޫއުތަކަށް ބީއެމްއެލްއިން ގްރީން ރިސޯޓް ފައިނޭންސިން ތައާރަފްކޮށްފި

އަހުމަދު ނިހާން

10 ފެބުރުއަރީ 2025 - 11:23

0 comments

ރިސޯޓުތަކުން ހިންގާ ދެމެހެއްޓެނިވި ތަރައްގީއަށާއި ތިމާވެށްޓާ ގުޅުން ހުރި މަޝްރޫއުތަކަށް ބޭނުންވާ މާލީ އެހީތެރިކަން ފޯރުކޮށްދިނުމުގެ ގޮތުން ބޭންކް އޮފް މޯލްޑިވްސް (ބީއެމްއެލް) އިން 'ގްރީން ރިސޯޓް ފައިނޭންސިން' ތައާރަފްކޮށްފި އެވެ.

ރުނބާ މޯލްޑިވްސްގައި ބޭއްވި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ އަހަރީ އާންމު ޖަލްސާގައި، މި ހިދުމަތް ތައާރަފު ކޮށްދެއްވީ، ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފާ އެކު، ކްރައުން އެންޑް ޗަމްޕާ ރިސޯޓްސްގެ ޗެއާމަން ޗަމްޕާ ހުސައިން އަފީފެވެ.

ބީއެމްއެލް އިން ބުނީ ގްރީން ރިސޯޓް ފައިނޭންސިން ފެސިލިޓީގެ ދަށުން، ރިސޯޓު ހިންގާ ރަށްތަކުގެ ގޮނޑުދޮށް ހިމާޔަތް ކުރުމާއި އެނާޖީ އެފިޝެންޓް އިކުއިޕްމެންޓް ހޯދުމާއި ރީފޮރެސްޓްރޭޝަން އަދި ކުނި މެނޭޖްކުރުން ފަދަ ދެމެހެއްޓެނިވި މަޝްރޫއުތައް ހިންގުމަށް ރިސޯޓުތަކުން ބޭނުންވާ ފައިނޭންސް ފޯރުކޮށްދޭނެ ކަމަށެވެ.

ބީއެމްއެލްއިން ބުނީ، ރަށުގެ ގޮނޑުދޮށް ހިމާޔަތްކުރުމަށާއި އެނާޖީ އެފިޝެންޓް އިކުއިޕްމެންޓް ހޯދުމަށާއި ގަސް އިންދުމަށާއި ކުނި މެނޭޖްކުރުން ފަދަ ދެމެހެއްޓެނިވި މަޝްރޫއުތައް ހިންގުމަށް ގްރީން ރިސޯޓް ފައިނޭންސިން ފެސިލިޓީގެ ދަށުން ރިސޯޓުތަކަށް ފައިނޭންސް ފޯރުކޮށްދޭނެ ކަމަށެވެ.

ގްރީން ރިސޯޓް ފައިނޭންސިން ފެސިލިޓީއަކީ 50 މިލިއަން ރުފިޔާއާ ހަމައަށް އޯވަޑްރާފްޓް ކުރެވޭ ފެސިލިޓީއެކެވެ. އެ ޚިދުމަތުގެ އިންޓްރެސްޓް ރޭޓަކީ 6.5 ޕަސެންޓެވެ.

މީގެ އިތުރުން ކާޑު މެޝިނުން ރިސޯޓަށް ލިބޭ ފައިސާއިން ފައިނޭންސް އަނބުރާ ދެއްކުމުގެ ފަސޭހަ ގޮތްތަކެއް ލިއްބައިދޭނެ ކަމަށް ބީއެމްއެލްއިން ބުނެއެވެ.

ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދުޝަރީފް ވިދާޅުވީ ބޭންކުން ފަތުރުވެރިކަމުގެ ދާއިރާއަށް އެހީތެރިވާން އަހަންމިއްޔަތުކަން ދޭ ކަމަށެވެ. އެގޮތުން ފަތުރުވެރިކަމުގެ ދާއިރާއަށް ބޭނުންވާ ފަދަ ބޭންކިން ހިދުމަތްތަކާއި ފައިސާ ބަލައިގަތުމުގެ އެންމެ ޒަމާނީ ހައްލުތައް ހޯދައިދޭން ބީއެމްއެލް ތައްޔާރަށް އޮތް ކަމަށް ވެސް ވިދާޅުވި އެވެ.

"ގްރީން ރިސޯޓް ފައިނޭންސް ފެސިލިޓީ ހާއްސަކޮށް ފަރުމާކޮށްފައި ވަނީ ރިސޯޓުތަކަށް ބޭނުންވާ ދެމެހެއްޓެނިވި ހައްލުތަކެއް ގާއިމްކުރުމާ އެކު ހިންގުމުގެ ހަރަދުތައް ފަސޭހައިން މެނޭޖްކުރެވޭނެ ފައިނޭންސިންއެއް ހޯދައިދިނުމަށް،" ޝަރީފް ވިދާޅުވި އެވެ.