ގެދޮރު އެޅުމަށާއި ފްލެޓް ގަތުމަށް ބީއެމްއެލްއިން ދޫކުރާ ލޯން ސްކީމްތަކަށް ހެޔޮ ބަދަލުތަކެއް

އަހުމަދު ނިހާން

10 ފެބުރުއަރީ 2025 - 22:25

0 comments

ބޭންކް އޮފް މޯލްޑިވްސް (ބީއެމްއެލް) ގެ ހައުސިން ފައިނޭންސިން ފެސިލިޓީތަކަށް ބޮޑެތި ބަދަލުތަކެއް ގެނެސްފި އެވެ.

މިގޮތުން ގެނެވުނު ބަދަލުތަކަކަށް ބަލާއިރު ހޯމް ޕަރޗޭސް ފައިނޭންސިންގް (ގެދޮރު ގަތުމަށް)

– މިހާރު ބިން، ގަރާޖް އަދި ޕާކިން ސްޕޭސް ގަނެވޭނެ ގޮތް ހަމަޖެއްސުން
– ތިން މިލިއަން ރުފިޔާއާ ހަމަޔަށް އަގުހުރި ޕްރޮޖެކްޓްތަކަށް އަމިއްލައަށް ކުރަންޖެހޭ ޚަރަދު %10 އަށް ދަށްކުރުން

ހޯމް ކޮންސްޓްރަކްޝަން ފައިނޭންސިންގް (ގެދޮރު މަރާމާތްކުރުން)

– ފައިނޭންސް އަނބުރާ ދެއްކުމުގެ މުއްދަތު 15 އަހަރުން 20 އަހަރަށް އިތުރު ކުރުން.
– ފައިނޭންސް ނެގޭ އެންމެ މަތީ އަދަދު 15 މިލިއަން ރުފިޔާއިން 45 މިލިއަން ރުފިޔާއަށް އިތުރު ކުރުން.
މަޝްރޫއުން ލިބޭ އާމްދަނީ މިހާރު ބަލައިގަތުން

ހޯމް ބިލްޑް ފައިނޭންސިންގް (ގެދޮރު އިމާރާތްކުރުމާއި މަރާމާތުކުރުމަށް)

– ފައިނޭންސް ނެގޭ އެންމެ މަތީ އަދަދު 2 މިލިއަން ރުފިޔާއަށް އިތުރު ކުރުން.
– އަލަށް ފައިނޭންސް ނަގާ ފަރާތްތަކަށްވެސް މި ފައިނޭންސަށް އެދި ހުށަހެޅޭ ގޮތް ހަމަޖެއްސުން.
– ގިނަ ކަސްޓަމަރުންނަށް ފުރުސަތު ދިނުމަށް ފައިނޭންސަށް ޝަރުތު ހަމަވާ އާމްދަނީގެ އަދަދު ދަށް ކުރުން.

ބޭންކް އޮފް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ މުހައްމަދު ޝަރީފް ވިދާޅުވީ، ރާއްޖޭގައި ދޫކުރާ އެންމެ ކުޑަ ރޭޓުގައި ހޯމް ފައިނޭންސިންގް ދޫކުރަނީ އެ ބޭންކް އިން ކަމަށެވެ.

ބީއެމްއެލް އިސްލާމިކް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެ ބޭންކުގެ ޑިރެކްޓަ އޮފް ރީޓެއިލް ބޭންކިން އެންޑް ކާޑްސް، ބަދުރުއްދީން ހަސަން ވިދާޅުވީ އެ ފެސިލިޓީތަކަށް ބަދަލު ގެނައީ ކަސްޓަމަރުންގެ ބޯހިޔާވަހިކަން ކަށަވަރު ކޮށްދިނުމުގައި ބޭނުންވާ އެހީތެރިކަން ފޯރުކޮށްދިނުމަށް ކަމަށެވެ.

"އަޅުގަނޑުމެން މި ގެނައި ބަދަލުތަކާ އެކު، ގެދޮރު ބިނާ ކުރުމާއި މަރާމާތު ކުރުމަށް މިހާރަށް ބުރެ ބޮޑު ފުރުސަތުތަކެއް ލިބިގެން ދާނެ. މިކަމުގެ ސަބަބުން އިމާރާތް ކުރުމުގެ ދާއިރާ އިން އިތުރު ކުންފުނިތައް އުފެދި، ނުސީދާ ގޮތެއްގައި ވެސް އިގްތިސާދީ ހެޔޮ ބަދަލުތަކެއް އަންނާނެ،" އޭނާ ވިދާޅުވި އެވެ.

މީގެ ކުރިން އެއް މިލިއަން ރުފިޔާގެ ހޯމް ހައުސިން ލޯނު ނެގުމަށް 26،000ރ. ގެ އާމްދަނީއެއް ބޭނުންވި ނަމަވެސް މިހާރު ގެނެސްފައިވާ ބަދަލާ އެކު، ދެ މީހުން ނުވަތަ ތިން މީހުންގެ އާމްދަނީގެ ޖުމްލަ އަދަދު 22،000ރ. އަށް އަރާ ނަމަ ލޯނަށް ޝަރުތު ހަމަވާނެ އެވެ.

މިއީ ކަސްޓަމަރުންނަށް ލުއި ފަސޭހަކޮށްދިނުމުގެ ގޮތުން ގެދޮރު އިމާރާތްކުރުމަށް އެންމެ ކުޑަ ރޭޓެއްގައި ދޫކުރާ ހައުސިން ލޯނުތައްކަން ގެނައި ބަދަލެއް ކަން ބީއެމްއެލް އިން ފާހަގަކުރި އެވެ.