ޕީއެންސީގެ ދަފްތަރަށް ޝަކުވާ ހުށަހެޅުމުގެ މުއްދަތު އިތުރުކޮށްފި

ާއަހުމަދު ނިހާން

13 ފެބުރުއަރީ 2025 - 21:09

0 comments

އިލެކްޝަންސް ކޮމިޝަން (އީސީ)ން އާންމުކޮށްފައިވާ ސިޔާސީ ޕާޓީތަކުގެ ދަފުތަރުގެ ތެރެއިން ސަރުކާރު ހިންގާ ޕީއެންސީގެ ދަފުތަރާމެދު ޝަކުވާ ހުށަހެޅުމުގެ ފުރުސަތު އެ ޕާޓީން ހުޅުވާލައިފި އެވެ.

ޕީއެންސީން މިއަދު ކުރި އިއުލާނެއްގައި ބުނީ އެ ޕާޓީގެ ދަފުތަރާމެދު އާންމުންގެ ޝަކުވާތައް ހުރިކަން ފާހަގަވުމާއެކު ޝަކުވާ ހުށަހެޅުމުގެ ފުރުސަތު މިދިޔަ މަހުގެ 13 ގައި ހުޅުވާލި ކަމަށެވެ. އެގޮތުން ހުށަހެޅުނު ޝަކުވާތަކާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް ޕީއެންސީން ބުނެ އެވެ.

ޕީއެންސީން ބުނީ ދަފުތަރުގެ ސައްހަކަން ކަށަވަރުކުރުމާއި، ދަފުތަރު ބެލެހެއްޓުން، އިދާރީ އޮނިގަނޑުގެ ތެރެއިން އިތުރަށް ހަރުދަނާކުރުމަށް ރައީސް ޑރ. މުހައްމަދު މުއިއްޒު އަންގަވާފައިވާ ކަމަށެވެ.

އެގޮތުން އީސީން އާންމުކުރި ދަފުތަރާމެދު އެއްވެސް ޝަކުވާއެއް އޮތްނަމަ، އެ ޝަކުވާއެއް ޕީއެންސީގެ މައި އިދާރާ، ނުވަތަ ރަށްރަށުގެ ސްޓިއަރިން ކޮމިޓީތަކަށް އަންނަ އޭޕްރީލް މަހުގެ 13ވަނަ ދުވަހުގެ 15:00ގެ ނިޔަލަށް ހުށަހެޅުމަށް ވަނީ އެދިފަ އެވެ.

"ޝަކުވާތަކާ މެދު ބަލަންޖެހޭ އެންމެހާ ކަންކަން މި ޕާޓީން ބަލައި އަޅަންޖެހޭ ފިޔަވަޅެއް އޮތް ނަމަ އަޅަމުންދާނެ ކަމުގައި ދަންނަވަމެވެ،" ޕީއެންސީން ނެރުނު ބަޔާނުގައިވެ އެވެ.

މި ދޭތެރެއިން ވަގަށް ޕީއެންސީއަށް ބައެއް މީހުން ވެއްދި މައްސަލަތައް ފެންމަތިވެ، ބައެއް މައްސަލަތައް ފުލުހަށް ވެސް ހުށަހެޅިއެވެ. އެ މައްސަލަ ފެންމަތިވެފައިވަނިކޮށް، ޑިޕާޓްމެންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު)ގެ ތެރޭގައި ޕީއެންސީގެ ފޯމުކުރަނީ ކަމަށް ބުނެ ސޯޝަލް މީޑިއާގައި ފޮޓޯތަކެއް ވެސް ދައުރުވި އެވެ.

އެ މައްސަލައިގައި އިދިކޮޅު އެމްޑީޕީގެ އިތުރުން، އެހެން އިދިކޮޅު ޕާޓީތަކުންވަނީ ޑީއެންއާރާ ހަވާލުވެ ވަޑައިގެން ހުންނެވި ހޯމްލޭންޑް މިނިސްޓަރު އަލީ އިހުސާން އިސްތިއުފާ ދެއްވުމަށް ވެސް ގޮވާލައިފައެވެ.