ޕީއެންސީއަށް 13 މިލިއަން ރުފިޔާ ދޭން އިލެކްޝަނުން ނިންމައިފި

އަލީ ރާޒީ

10 އޭޕްރީލް 2025 - 16:07

0 comments

ސިޔާސީ ޕާޓީތަކަށް ދައުލަތުގެ ބަޖެޓުން ދޭންޖެހޭ ފައިސާގެ ގޮތުގައި މި އަހަރުގެ ބަޖެޓްގައި ކަނޑައެޅި 27 މިލިއަން ރުފިޔާގެ ތެރެއިން އެންމެ ގިނަ ފައިސާ ލިބޭނީ ސަރުކާރު ހިންގާ ޕީއެންސީއަށް ކަމަށް އިލެކްޝަން ކޮމިޝަނުން ބުނެފި އެވެ.

މި އަހަރަށް ފާސްކުރި ދައުލަތުގެ ބަޖެޓުގެ އާމްދަނީން ސިޔާސީ ޕާޓީތަކަށް ދޫކުރާ 0.01 ޕަސެންޓަށް ޖެހެނީ ޖުމުލަ 27،981،256 ރުފިޔާ އެވެ. އިލެކްޝަންސްއިން ޕާޓީތަކަށް ފައިސާ ދޫކުރަން ނިންމާފައި ވަނީ މިދިޔަ އަހަރުގެ ޑިސެމްބަރު 31، އާ ހަމައަށް ޕާޓީތަކުގައި ތިބި މެންބަރުންގެ އަދަދަށް ބަލައިގެންނެވެ.

ޕާޓީތަކަށް ލިބޭ ފައިސާގެ އަދަދުތައް:

• ޕީއެންސީ - 13.3 މިލިއަން ރުފިޔާ

• އެމްޑީޕީ - 8.4 މިލިއަން ރުފިޔާ

• ޖުމްހޫރީ ޕާޓީ - 2.6 މިލިއަން ރުފިޔާ

• އަދާލަތު ޕާޓީ - 1.7 މިލިއަން ރުފިޔާ

• އެމްޑީއޭ - 1.7 މިލިއަން ރުފިޔާ

އެ ފައިސާ ދޫކުރަން ފަށާނެ ދުވަހެއް މިހާތަނަށް އީސީން ނުބުނެ އެވެ.

މީގެ ކުރިން ސިޔާސީ ޕާޓީތަކަށް ފައިސާ ދޫކުރަނީ އެ އަހަރެއްގެ ދައުލަތުގެ ޖުމްލަ ބަޖެޓުގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދެކެވެ. ނަމަވެސް ރައްޔިތުންގެ މަޖިލީހުން މިދިޔަ އަހަރު ގާނޫނު އިސްލާހު ކުރުމަށްފަހު މިހާރު ވަނީ އެ އަހަރަކު ލިބޭނެ ކަމަށް ލަފާކުރާ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދެއް ޕާޓީތަކަށް ދޫކުރާ ގޮތަށް ކަނޑައަޅައިފަ އެވެ.

މިދިޔަ އަހަރަށް ކަނޑައެޅި ބަޖެޓުން ސިޔާސީ ހަ ޕާޓީއަކަށް ވަނީ 44 މިލިއަން ރުފިޔާ ދޫކޮށްފަ އެވެ.