އިސްލާހީ ފިޔަވަޅުތަކުގެ ދަށުން، މިފްކޯގެ ތިން ޖެނެރަލް މެނޭޖަރަކު ވަކިކޮށްފި

އަލީ ރާޒީ

18 ފެބުރުއަރީ 2025 - 20:31

0 comments

ސަރުކާރުގެ މަސް ކުންފުނި، މިފްކޯގެ އިސް މަގާމެއްގައި ތިބި ތިން މީހަކު ވަޒީފާއިން ވަކިކޮށްފި އެވެ.

ސަރުކާރުގެ މަސް ކުންފުނި މިފްކޯއިން މިއަދު މީޑިއާތަކާ ހިއްސާކުރި މެސެޖެއްގައި ބުނީ، ރައީސްގެ އިސްލާހީ އެޖެންޑާގެ ދަށުން އެ ކުންފުނީގެ ހިންގުން މިހާރަށްވުރެ ހަރުދަނާ ކުރުމަށް ކުރިއަށްގެންދާ މަސައްކަތްތަކުގެ ދަށުން މެނޭޖުމެންޓުގެ މަސައްކަތްތައް ބަލަމުން އަންނަ ކަމަށެވެ. އެގޮތަށް ބެލުމަށްފަހު، ގެންނަން ޖެހޭ ވަގުތީ އަދި ދާއިމީ މުހިންމު ބަދަލުތައް ގެނައުމުގެ މަސައްކަތްތައް މިހާރު ކުރާ ކަމަށް އެ ކުންފުނިން ބުންޏެވެ.

މިފްކޯއިން ބުނީ އެ ކުންފުނިން އިސްލާހީ މަސައްކަތްތައް ފެށީ މިދިޔަ އަހަރު ކަމަށާއި މަގުސަދަކީ ޒިންމާދާރުކަން ކަށަވަރުކުރުމާއި ހިންގުން ހަރުދަނާކުރުން ކަމަށެވެ.

މިފްކޯއިން ވަކިކުރި ޖެނެރަލް މެނޭޖަރުންނާއި އެ މީހުންގެ މަސައްކަތާ ގުޅޭ އިތުރު މައުލޫމާތެއް އެ ކުންފުނިން ހާމައެއް ނުކުރެއެވެ.

މި ސަރުކާރުގެ އިސްލާހީ އެޖެންޑާގެ އެންމެ މުހިންމު އެއް މަސައްކަތަކީ ދައުލަތުގެ ކުންފުނިތައް އިސްލާހު ކުރުން ކަމަށް މީގެ ކުރިން ސަރުކާރުން ބުނެފައިވެއެވެ.

މިދިޔަ ޑިސެމްބަރު މަހުގެ ކުރީކޮޅު އެ ކުންފުންޏަށް އައްޔަންކުރީ ސްވިޓްޒަލެންޑުގެ ރައްޔިތެއް ކަމަށްވާ ޑރ. ވިޓާލީ ލުބިމޯވް އެވެ. އެއީ ސްޓްރެޓީޖިކް ކްރައިސިސް މެނޭޖްމެންޓުގެ ދާއިރާގެ ސްޕެޝަލިސްޓެއްގެ ގޮތުގައި 20 އަހަރު މަސައްކަތް ކުރައްވާފައިވާ ބޭފުޅެކެވެ.

ސަރުކާރުގެ ސަތޭކަ ޕަސެންޓް ހިއްސާ އެކުލެވޭ އެ ކުންފުނި އުފައްދާފައިވަނީ މަސްވެރިކަމުގެ ސިނާއަތުން ލިބޭ މަންފާ އިތުރުކުރުމުގެ ބޭނުމުގަ އެވެ.