ފޮރިން މިނިސްޓަރު ޑރ. ހަލީލް، ލަންކާގެ ބޮޑުވަޒީރާ ބައްދަލުކުރައްވައިފި

މަރިޔަމް އަނާ

20 ފެބުރުއަރީ 2025 - 18:41

0 comments

ފޮރިން މިނިސްޓަރު ޑރ. އަބްދުﷲ ޚަލީލު، ލަންކާގެ ބޮޑުވަޒީރު ޑރ. ހަރީނީ އަމަރަސޫރިޔާގެ އަރިހަށް އިހްތިރާމްގެ ޒިޔާރަތެއް މިއަދު ކުރައްވައިފި އެވެ.

ޑރ. ޚަލީލް މިމަހުގެ 18 ވަނަ ދުވަހު ލަންކާއަށް ވަޑައިގެންނެވީ އެ ގައުމުގެ ފޮރިން އެފެއާޒް, އެމްޕްލޯއިމަންޓް އެންޑް ޓޫރިޒަމް މިނިސްޓަރު އެޗް އެމް ވިޖިތާ ހެރަތުގެ ދައުވަތަކަށެވެ.

ފޮރިން މިނިސްޓްރީން ބުނީ މިއަދުގެ ބައްދަލުކުރެއްވުމުގައި ރާއްޖޭގެ ތަރައްގީއަށް ލަންކާއިން ފޯރުކޮށްދޭ އެހީ ފާހަގަކުރައްވައި މިނިސްޓަރު ޚަލީލް ޝުކުރު އަދާކުރެއްވި ކަމަށެވެ.

މިބައްދަލުކުރެއްވުމުގައި ލަންކާގެ ބޮޑުވަޒީރު ވަނީ ދެ ގައުމު ގުޅިގެން ކުރާ މަސައްކަތްތައް އިތުރަށް ކުރިއަށް ގެންދަވާނެ ކަމުގެ ޔަގީންކަން ދެއްވާފަ އެވެ.

ޑރ. ޚަލީލް މިރޭގެ ވަގުތެއްގައި ލަންކާގެ ރައީސް އަނުރަ ކުމާރަ ޑިސަނަޔަކައާ ވެސް ބައްދަލުކުރައްވާނެ އެވެ.

މާދަމާގެ ނިޔަލަށް ހަލީލް ކުރައްވާ ހަތަރު ދުވަހުގެ ރަސްމީ ދަތުރުގެ ތެރެއިން، އިއްޔެ ވަނީ ލަންކާގެ ފޮރިން މިނިސްޓަރު ހޭރަތު އާ ވެސް ބައްދަލުކުރައްވައި ރަސްމީ މަޝްވަރާތައް ކުރައްވައިފަ އެވެ.

އެ މަޝްވަރާތަކަށްފަހު ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ، ލަންކާ އާއި ރާއްޖެ ގުޅިގެން ޓޫރިޒަމާއި ތައުލީމާއި އިގުތިސާދު އަދި ސަލާމަތީ ދާއިރާތަކުން އިތުރަށް މަސައްކަތް ކުރުމަށް ދެ ބޭފުޅުން ވަރަށް ފުޅާ ދާއިރާއެއްގައި މަޝްވަރާ ކުރެއްވި ކަމަށެވެ.

ލަންކާގެ ރައީސާ ބައްދަލުވުމުގެ ކުރިން، ލަންކާގައި ދިިރިއުޅޭ ދިވެހިންނާއި ލަންކާގެ ބައެއް ވިޔަފާރިވެރިންނާ ވެސް ބައްދަލުކުރައްވާނެ އެވެ.