އަންނަ ހޯމަ ދުވަހުގެ ނިޔަލަށް މާލޭގައި މަސްދަޅު ކޭސް ބަހައި ނިންމަނީ

މަރިޔަމް އަނާ

06 މާޗް 2025 - 15:08

0 comments

ސަރުކާރުން މި ރޯދަ ހަދިޔާގެ ގޮތުގައި ދެމުން އަންނަ މަސްދަޅު ކޭސް އަންނަ ހޯމަ ދުވަހުގެ ނިޔަލަށް މާލޭގައި ބަހައި ނިންމުމުގެ މަސައްކަތް ކުރަމުން އަންނަ ކަމަށް ލޯކަލް ގަވަނެންސް މިނިސްޓަރު އާދަމް ޝަރީފް ވިދާޅުވެއްޖެ އެވެ.

ރޯދަ މަހު މަސްދަޅު ކޭސް ބެހުން ކުރިޔަށް ގެންދަނީ ރޭގަނޑުގެ ވަގުތުތަކުގައެވެ.

މަސްދަޅު ކޭސް ބަހަން ފެށުމާއެކު ގިނަ އިރުވަންދެން ސަފުގައި ތިބެން ޖެހުމުން، މަސްދަޅު ކޭސް ބެހުމުގެ ކަންކަން ދޯދިޔާ ކަމަށް ބުނެ ގިނަ ބަޔަކު ޝަކުވާ ކުރަން ފެށުމުން، އޮންލައިންކޮށް ޓޯކަން ނަގައިގެން މަސްދަޅު ކޭސް ބަލައި އަންނަންޖެހޭ ގޮތަށް ސަރުކާރުންވަނީ ހަމަޖައްސައިފަ އެވެ.

މި ރޯދަމަހަށް ސަރުކާރުން ދޭ ހަދިޔާއެއްގެ ގޮތުގައި ކޮންމެ ގޭބީސީއަކަށް ދޫކުރަނީ 48 ދަޅުގެ މަސްކޭހެވެ. މަސްދަޅު ކޭސް ބަހަނީ ކަރަންޓު މީޓަރު ނަންބަރަށެވެ. ގާތްގަނޑަކަށް ރާއްޖޭގެ 80،000 އަށް ވުރެ ގޭބީސީތަކަށް މަސްދަޅު ބަހާނެ ކަމަށް ސަރުކާރުން ކުރިން ބުނެފައިވެ އެވެ.

ރަށްރަށުގައި މަސްދަޅު ކޭސް ބަހަނީ އެ ރަށްރަށުގެ ކައުންސިލްތަކާ ހަވާލުކޮށްގެންނެވެ.

'އެކްސް' ގައި ކުރެއްވި ޕޯސްޓެއްގައި މިނިސްޓަރު އާދަމް ޝަރީފް ރޭ ވިދާޅުވީ އަމާޒަކީ އަންނަ ހޯމަ ދުވަހުގެ ނިޔަލަށް މާލޭގައި ރޯދަ ހަދިޔާ ބަހައި ނިންމުން ކަމަށެވެ. އަދި މިއަދު ގއ. އަދި ގދ. އަތޮޅުގެ ހުރިހާ ރަށަކަށް ރޯދަ ހަދިޔާ ފޯރުކޮށްދެވޭނެ ކަމަށް ވިދާޅުވިއެވެ. އަދި އޭރުން މުޅި ރާއްޖެއަށް މަސްދަޅު ފޯރުކޮށްދެވުނީ ކަމަށް މިނިސްޓަރު ވިދާޅުވިއެވެ.

މިހާރު މަސްދަޅު ކޭސް ބަހަނީ ކޮންމެ ރެއެއްގެ 21:30 އިން ފެށިގެން 23:30 އާ ހަމައަށެވެ.