ޑެޕިއުޓީ ގަވަރުނަރު އިމާދު ވަކިކުރަން މަޖިލީހަށް ހުށަހަޅައިފި

ހަސަން ހަލީމް

11 މާޗް 2025 - 14:40

0 comments

މޯލްޑިވިސް މަނިޓަރީ އޮތޯރިޓީގެ ޑެޕިއުޓީ ގަވަރުނަރު، އަހުމަދު އިމާދު އެ މަގާމުން ވަކިކުރުމުގެ މައްސަލަ ދިއްދޫ ދާއިރާގެ ޕީއެންސީ މެންބަރު، އަބްދުލްލަތީފް މުހައްމަދު ހުށަހަޅައިފި އެވެ.

މަޖިލީހުގެ މާލިއްޔަތު ކޮމެޓީއަށް މެމްބަރު ލަތީފް ހުށަހެޅުއްވި އެ މައްސަލަ ބަލައިގަނެ، އެ މައްސަލަ މަޖިލީހުގެ ތަޅުމަށް ފޮނުވަން މިއަދު ކޮމެޓީން ވަނީ ފާސްކޮށްފަ އެވެ.

އިމާދު ޑެޕިއުޓީ ގަވަރުނަރުގެ މަގާމަށް އައްޔަނުކޮށްފައިވަނީ 2020 ވަނަ އަހަރު އެވެ. އެ މަގާމަށް ބޭފުޅުން އައްޔަންކޮށް، ވަކި ކުރާނީ މަޖިލީހުގެ ލަފާގެ މަތިން ރައީސެވެ.

އިމާދު ވަކިކުރަން މަޖިލީހަށް މައްސަލަ ހުށަހެޅީ, އެމްއެމްއޭއަށް ހުޅުމާލޭން ބިން ގަންނަން އެ އޮތޯރިޓީގެ ބޯޑުން ނިންމި ނިންމުން ރިވިއުކުރަން އޭނާ ހިމެނޭހެން ބޯޑުގެ ތިން މެންބަރަކު ހުށަހަޅާފައި ވަނިކޮށެވެ. އަދަދު އަށް މައުލޫމާތު ލިބިފައިވާ ގޮތުގައި މި ގޮތަށް ބޯޑުން ނިންމި ޖަލްސާގައި އިމާދު ބައިވެރިވެވަޑައިނުގަންނަވަ އެވެ.