ހަތަރު މިލިއަން ރުފިޔާއަށް ކާނިވާ ސްޓޭޖު ތަރައްގީކުރުމުން ހުންނާނެ ގޮތުގެ ފޮޓޯ ދައްކާލައިފި

ހަސަން ހަލީމް

18 މާޗް 2025 - 14:34

0 comments

މާލެ ސީޓީގެ ކާނިވާ ސަރަހައްދުގައި މިހާރު ހުރި ސްޓޭޖު ތަޅާލުމަށް ފަހު, އައު ސްޓޭޖެއް ހެދުމަށް ހަތަރު މިލިއަން ރުފިޔާއަށް ބަޔަކާ ހަވާލުކޮށްފި އެވެ.

އާ ސްޓޭޖް ހުންނާނެ ގޮތުގެ ކުރެހުން މާލެ ސިޓީ ކައުންސިލުން މިއަދު ދައްކާލިއިރު މި މަސައްކަތް ކުރުމަށް ކައުންސިލުން ވަނީ މި މަހުގެ 14 ވަނަ ދުވަހު ޔޫއެޗް އިންވެސްޓްމަންޓް ޕްރައިވެޓް ލިމިޓެޑާ ހަވާލުކޮށްފަ އެވެ.

މަސައްކަތް ނިންމަން ހަވާލުކޮށްފައިވަނީ މިއަހަރުގެ ޖުލައި 31 ވަނަ ދުވަހުގެ ނިޔަލަށެވެ. މަސައްކަތުގެ އަގަކީ 4.84 މިލިއަން ރުފިޔާ އެވެ.

އާ ސްޓޭޖްގެ ފޮޓޯއަކާ އެކު މާލޭ މޭޔަރު އާދަމް އާޒިމް "އެކްސް"ގައި ކުރެއްވި ޕޯސްޓުގައި ވިދާޅުވީ ޒަމާންތަކެއް ވަންދެން ހަލާކުވެ ވީރާނާވާން ދޫކޮށްލާފައިވާ މި ސްޓޭޖްު ދެން ފެނިގެންދާނީ އެންމެ ޒަމާނީ ފެންވަރުގެ ތަނެއްގެ ގޮތުގައި ކަމަށެވެ.

މާލޭ ކާނިވާ ސްޓޭޖު ސަރަހައްދުގައި މިހާރު އާންމުކޮށް ބާއްވަނީ ސިޔާސީ ޕާޓީތަކުގެ ބައްދަލުވުންތަކާއި ޖަލްސާތަކެވެ. މީގެ ކުރިން މިޔުޒިކް ޝޯތައް ވެސް އެ ސަރަހައްދުގައި ބޭއްވި އެވެ. ނަމަވެސް މިހާރު ކާނިވާ ސަރަހައްދުގެ ބޮޑު ބައެއް އޮންނަނީ ޕާކިންއަށް ހާއްސަ ކޮށްފަ އެވެ.