އިސްލާހީ ސެންޓަރާއި މައި ޖަލު ހަދަން 55 މިލިއަން ޑޮލަރު ހޯދަނީ

ހަސަން ހަލީމް

22 މާޗް 2025 - 23:16

0 comments

ކ. އުތުރުތިލަފަޅުގައި ހަދާ ސެންޓްރަލް ޕްރިޒަން ކޮމްޕްލެކްސް އާއި ކުށް ކުރާ ކުދިންގެ އިސްލާހީ ސެންޓަރު ނުވަތަ 'ހޯޕް އައިލެންޑް'ގެ މަޝްރޫއަށް އެންމެ ދަށްވެގެން ޖުމްލަ 55 މިލިއަން ޑޮލަރު (848 މިލިއަން ރުފިޔާ) ހަރަދުކުރަންޖެހޭ ގޮތަށް ރާއްޖޭގެ އިންވެސްޓްމަންޓް ސިޔާސަތުގައި އިއްޔެ ކަނޑައަޅައިފި އެވެ.

ކްރޮސް ސަބްސިޑީ އުސޫލުން މިމަޝްރޫއު ކުރިއަށް ގެންދިއުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހާރު ވަނީ ދައުލަތުގެ އާންމު މަންފާއަށްޓަކައި ހާސިލުކުރަން ބޭނުންވާ އިގްތިސާދީ ސިޔާސަތެއްގެ ދަށުން ހިންގާނޭ މުހިއްމު މަޝްރޫއުތައް ކަނޑައެޅުމަށް އެކަށައަޅުއްވާފައިވާ ގަރާރު އިސްލާހު ކުރައްވާފަ އެވެ.

މި ގަރާރުގައި ވަނީ ކްރޮސް ސަބްސިޑީ ޕްރޮޖެކްޓްތަކެއްގެ ގޮތުގައި މައިގަނޑު 25 މަޝްރޫއެއް ހިންގުމަށް މަދުވެގެން ހޭދަކުރަންޖެހޭ އަގުގެ ގޮތުގައި 55 މިލިއަން ޑޮލަރު -- 848 މިލއަން ރުފިޔާ ހިމަނާފަ އެވެ.

މި ގަރާރުގައިވާ ބައެއް މަޝްރޫއުތަކުގެ ތެރޭގައި ކުށަށް އަރައިގަތުމުގެ ނުރައްކަލުގައިވާ ކުދިންނަށް ބޭނުންވާ ފަރުވާ ފޯރުކޮށްދިނުމަށާއި އިސްލާހީ އަދި ރީހެބިލިޓޭޝަން ޕްރޮގްރާމްތައް ހިންގުމަށްޓަކައި ގާއިމުކުރުމަށް ހަމަޖެހިފައިވާ "އުއްމީދު / ހޯޕް އައިލެންޑް" މަޝްރޫއަށް ބޭނުންވާ 15 (ފަނަރަ) ހެކްޓަރުގެ ބިން ހިއްކުން ހިމެނެ އެވެ.

ސެންޓްރަލް ޕްރިޒަން މަޝްރޫއުއަށް އެންމެ ދަށްވެގެން ހަރަދުކުރަންޖެހޭ މިންވަރުގެ ގޮތުގައި ހިމަނާފައިވަނީ 30 މިލިއަން ޑޮލަރު (462 މިލިއަން ރުފިޔާ) އެވެ. އެއީ:

ސެންޓްރަލް ޕްރިޒަން މަޝްރޫއަށް ބޭނުންވާ 30 ހެކްޓަރުގެ ބިން ހިއްކުމަށް - 15 މިލިއަން ޑޮލަރު
ސެންޓްރަލް ޕްރިޒަން ތަރައްގީކުރަން - 15 މިލިއަން ޑޮލަރު

މީގެ އިތުރުން އިއްޔެ އާންމުކުރެއްވި ރައީސްގެ ގަރާރުގައި ރާއްޖޭގެ އެކި ސަރަހައްދުތަކުގައި ހިންގާ އެއާޕޯޓު މަޝްރޫއުތަކަކާއި 'އައްސޭރި ޓޫރިޒަމް' މަޝްރޫއުތަކެއްގެ އިތުރުން ސޯޝަލް ހައުސިން މަޝްރޫއުތަކާއި ބިން ހިއްކުމާއި ކޯޒްވޭއިން ގުޅާލުން ފަދަ މަޝްރޫއުތައް ހިމަނާފައިވެ އެވެ.