އީދު ބަންދާ ދިމާކޮށް މަންޓާ އިން ފްލައިޓު އިތުރުކޮށްފި

މަރިޔަމް އަނާ

23 މާޗް 2025 - 12:20

0 comments

އީދު ބަންދާ ދިމާކޮށް މަންޓާ އެއާލައިންގެ ދަތުރުތައް އިތުރުކޮށްފި އެވެ.

މަންޓާ އެއާ އިން ބުނީ ފްލައިޓު އަޅާ އަދަދު އިތުރުކުރީ ދ. ކުޑަހުވަދޫ (ދާލު އެއާޕޯޓް)، ބ. ދަރަވަންދޫ (ދަރަވަންދޫ އެއާޕޯޓް)، ރ. އިފުރު (އިފުރު އެއާޕޯޓް) އަދި ޅ. މަޑިވަރު (މަޑިވަރު އެއާޕޯޓް) އަށް ކަމަށެވެ.

މަންޓާ އިން ކަސްޓަމަރުންނަށް ފަސޭހަކަމާ އެކު ދަތުރުކުރެވޭނެ އިންތިޒާމު ހަމަޖައްސަން އިތުރުކުރި ފްލައިޓްތައް އަޅާނީ އެ އެއާލައިންގެ ATR 72-600 ފްލީޓުންނެވެ.

މަންޓާ އެއާއިން ދަތުރުކުރަން ބޭނުންވާ ފަރާތްތަކަށް އެ އެއާލައިނުގެ ވެބްސައިޓު މެދުވެރިކޮށް މިހާރު ބުކިން ހެއްދޭނެ އެވެ.

މަންޓާ އެއާ އިން އަންނަނީ އެތެރޭގެ އުދުހުންތަކުގެ އިތުރުން އިންޑިއާގެ ބެންގަލޫރަށް ދަތުރުކުރަމުންނެވެ. އެ އެއާލައިނުން ބެންގަލޫރަށް ދަތުރުކުރަނީ ދާލު އެއާޕޯޓުންނެވެ.