މަންތާ އެއާ އިން ހޯރަފުށީ އެއާޕޯޓަށް ޗާޓަރޑް ޝެޑިއުލް ދަތުރުތަކެއް ފަށައިފި

އަލީ ރާޒީ

05 ސެޕްޓެމްބަރ 2022 - 21:16

0 comments

މަންތާ އެއާ އިން މަނަފަރު ރިސޯޓާއެކު މިއަދު ހެދި އެއްބަސްވުމެއްގެ ދަށުން ހއ. ހޯރަފުއްޓަށް ޗާޓަޑް ޝެޑިއުލް ދަތުރުތަކެއް ފަށައިފިއެވެ.

ދަތުރު ފެށުމަށް ބޭއްވި ޓެސްޓް ޕްލައިޓް މިއަދު ވަނީ ބާއްވާފައެވެ. މި ދަތުރުގައި މަންތާ އެއަރއާއި ރީޖަނަލް އެއަރޕޯޓްސްގެ އިސްވެރިން ވަނީ ބައިވެރިވެފައެވެ.

މަންތާ އެއާ އިން ހޯރަފުއްޓަށް ދަތުރުތައް ފަށާފައިވަނީ ޖޭއޭ މަނަފަރާއި، ރީޖަނަލް އެއަރޕޯޓްސް ކޮމްޕެނީ ލިމިޓެޑް (އާރްއޭސީއެލް) އަދި މަންތާ އެއާއިން ވެފައިވާ އެއްބަސްވުމެއްގެ ދަށުންނެވެ.

މަންތާ އެއާ އިން ބުނީ ކޮންމެ ދުވަހަކުވެސް އެ އެއާލައިންގެ ދަތުރުތައް ހޯރަފުށީ އެއާޕޯޓާއި ވެލާނާ އިންޓަނޭޝަނަލް އެއާޕޯޓާއި ދެމެދު ކުރާނެ ކަމަށެވެ މި ދަތުރުތަކުގައި މަންޓާ އިން ބޭނުންކުރާނީ އެންމެ ފަހުން އެ ކުންފުނިން ގެނައި ބީޗް ކްރާފްޓްގެ 18 މީހުންގެ ޖާގައިގެ ބޯޓެކެވެ.

ޑެއިލީ ޗާޓާ ތަކުގެ އިތުރުން ހޯރަފުށީ އެއާޕޯޓުގެ ޕްރައިވެޓް ޗާޓާތަކަށް ވެސް އެ ބީޗް ކްރާފްޓް ބޭނުންކުރަން ވަނީ ހަމަޖެހިފައެވެ.

"އަޅުގަނޑުމެންނަށް ޔަގީން މި ދަތުރުތަކާ އެކު މަނަފާރު ރިސޯޓުގެ އިތުރުން، ހޯރަފުއްޓަށާއި، ކައިރި ރަށްތަކުގައި ދިރިއުޅޭ މީހުންނަށާއި އަދި ވިޔަފާރިތަކަށް ގިނަ މަގުތަކެއް ފަހިވެގެން ދާނެ،" މަންޓާއެއާގެ ސީއީއޯ މުހަންމަދު ހަލީލް ވިދާޅުވި އެވެ.

އެ އެއާލައިންގެ މާކެޓިން މެނޭޖަރު މޫބީން ޖަލީލް ވިދާޅުވީ އެ ރަށަށް ބާއްވާ ޗާޓަރު ފްލައިޓްތަކުގައި ޖާގަ ހުންނަ ވަރަކުން އާންމުންނަށް ވެސް ދަތުރު ކުރެވޭނެ ކަމަށެވެ.

"މަނަފަރު ރިސޯޓުން ވެސް ބޭނުން ވަނީ ޗާޓަރު ފްލައިޓްތަކުގައި އިތުރު ޖާގަ ހުރި ނަމަ އާންމުންނަށް ދޭން. އެ ދަތުރުތަކުގެ ސަބަބުން އާންމުންނަށް ވެސް ފައިދާތަކެއް ކުރަން،" މޫބީން ވިދާޅުވި އެވެ.