ރައީސް ތެލެސީމިއާ ސެންޓަރުގެ ހާލަތު ބައްލަވަން ވަޑައިގެންފި

މަރިޔަމް އަނާ

23 މާޗް 2025 - 13:18

0 comments

ތެލަސީމިއާ ސެންޓަރުގެ ބައެއް ހިދުމަތްތަކާއި ގުޅިގެން ތެލަސީމިއާ ކުދިންނާއި އެކުދިންގެ ބެލެނިވެރިންގެ ކަންބޮޑުވުންތައް ފާޅުކުރުމުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އެސެންޓަރަށް ޒިޔާރަތްކުރައްވައި އެތަނުގައި ހުރި މައްސަލަތައް އޮޅުންފިލުއްވައިފި އެވެ.

ރައީސުލްޖުމްހޫރިއްޔާ ވަނީ ތެލަސީމިއާކުދިންނާއި އެކުދިންގެ ބެލެނިވެރިންގެ ހުރި ކަންބޮޑުވުންތަކަށް އަވަސް ހައްލެއް ގެނެސްދެއްނެކަމުގެ ޔަގީންކަން ދެއްވާފަ އެވެ. އެކަމށްޓަކައި އަވަސް ފިޔަވަޅުތަކެއް އެޅުމަށްވެސް ވަނީ ފަށްޓަވާފަ އެވެ.

ތެލަސީމިއާ އަށް ފަރުވާ ހޯދަމުންދާ ބަލި މީހުންނާއި އެ މީހުންގެ އާއިލާތަކުން މޯލްޑިވްސް ބްލަޑް ސާވިސަސް (އެމްބީއެސް) ކައިރީ މުޒާހަރާ ކުރީ ރޭ އެ ތަނުގެ ވެރިންނާ އެކު ބޭއްވި ބައްދަލުވުމަކަށް ފަހު، އެއްވެސް މައްސަލައަކަށް ހައްލު ނުލިބޭ ކަމަށް ބުނެ އެވެ.

ރައީސް އޮފީހުގެ އިސް އޮފިޝަލަކު ވިދާޅުވީ، އެ ކަންބޮޑުވުންތަކާ އެކު، ރައީސް މުއިއްޒު މިއަދު ހެނދުނު ތެލަސީމިއާ ސެންޓަރަށް ވަޑައިގެން އެ ތަނުގައި ތިބި މުވައްޒަފުންނާއި މިވަގުތު ތިބި ޕޭޝަންޓުންގެ ކަންބޮޑުވުންތައް ވެސް އަޑުއެއްސެވި ކަމަށެވެ. އެގޮތުން ހުރިހާ ޑިޕާޓްމަންޓުތަކަށް ވަކިވަކިން ވަޑައިގެން ހާލަތު ބެއްލެވި ކަަމަށް އޮފިޝަލް ވިދާޅުވި އެވެ.

ރާއްޖޭގައި ތެލަސީމިއާ 650 ކުދިން މިވަގުތުވެސް ލޭ އަޅަމުންދެ އެވެ. މިކުދިންނަށް ބޭނުންވާ އެކިއެކި ހިދުމަތްތައް ވޭތުވެދިޔަ ދިގު މާޒީގައި އެކަށީގެންވާވަރާއި ގާތަށްވެސް ގާއިމުވެ ތަރައްގީވެފައި ނެތްކަމީ އެކުދިންނާއި އާއިލާތަކުގެ އޮތް ކަންބޮޑުވުމެކެވެ.