ޑްރަގް ކޯޓާއި، ކްރިމިނަލް ކޯޓުގެ އާ އިމާރާތުގެ މަސައްކަތް ކުރިއަށްދާގޮތް ރައީސް ބައްލަވާލައްވައިފި

މަރިޔަމް އަނާ

26 މާޗް 2025 - 23:07

0 comments

ކްރިމިނަލް ކޯޓާއި ޑްރަގް ކޯޓުގެ ޖާގައިގެ ދަތިކަމަށް ހައްލު ހޯދުމަށް ތައްޔާރު ކުރަމުން އަންނަ އިމާރާތުގެ މަސައްކަތްތައް ރައީސް މުހައްމަދު މުއިއްޒު ބައްލަވާލައްވައިފި އެވެ.

ކްރިމިނަލް ކޯޓު މިހާރު ހިންގަމުންދާ އެސްޓީއޯގެ ކުރީގެ އިމާރާތް ބާވުމުގެ ސަބަބުން އެތަނުގެ ބައެއް ބައިތައް މިހާރު ބޭނުންކުރުން ވަނީ ހުއްޓާލައިފަ އެވެ. އެހެންވެ، އެ ކޯޓަށް ދާއިމީ އިމާރާތެއް އެޅެންދެން އެ ކޯޓާއި ޑްރަގް ކޯޓް ހިންގަން ހުޅުމާލޭގައި ވަގުތީ ވަކި އިމާރާތެއް އެޅުމުގެ މަސައްކަތް ދަނީ ކުރަމުންނެވެ.

ރައީސް މުއިއްޒު މިއަދު ވަނީ އެތަނަށް ޒިޔާރަތް ކުރައްވައި، އެތަނުގެ މަސައްކަތްތައް ބައްލަވައިފަ އެވެ.

ރައީސް އޮފީހުން ބުނީ، ރައީސްގެ ޒިޔާރަތުގައި ކޯޓު އިމާރާތުގެ ޕްލޭންތައް ބައްލަވާލައްވާ އެ މަސައްކަތުގެ ކުރިއެރުންތައް އެޗްޑީސީ އަދި ހައުސިން މިނިސްޓްރީގެ ވެރިންގެ އަރިހުން އޮޅުންފިލުއްވި ކަމަށެވެ.

މި ޒިޔާރަތުގައި ރައީސްގެ އަރިހުގައި ކެބިނެޓުގެ ވަޒީރުންނާއި ޝަރުއީ ދާއިރާގެ އިސްބޭފުޅުންނާއި ސަރުކާރުގެ އިސްވެރިން ބައިވެރިވެވަޑައިގެންނެވި އެވެ.

ދައުލަތުގެ ތިންބާރުގެ ތެރެއިން އެއްބާރުކަމުގައިވާ ޝަރުއީ ދާއިރާއަކީ، ރައްޔިތުން އިތުބާރުކުރާ ދާއިރާއަކަށް ހެދުމަށްޓަކައި ޤާނޫނުތަކަށް ގެންނަންޖެހޭ ބަދަލުތައް ގެނައުމުގެ މަސައްކަތްވެސް ސަރުކާރުން ގެންދަވަނީ ކުރައްވަމުންނެވެ.