ނަޝީދަށް ދިން ހަމަލާއަށް 4 އަހަރު: އިންސާފު ނުލިބޭތީ ކަންބޮޑުވުން

އަލީ ރާޒީ

06 މެއި 2025 - 14:06

0 comments

ކުރީގެ ރައީސް މުހައްމަދު ނަޝީދު އަވަހާރަ ކޮށްލަން ދިން ހަމަލަ އަށް މިއަދު ހަތަރު އަހަރު ފުރުނުއިރު، އިންސާފު ނުލިބި ލަސްވާތީ ތަހުގީގު އަވަހަށް ނިންމައި އިންސާފު ހޯދައިދޭން ޑިމޮކްރެޓްސް އިން އެދިއްޖެ އެވެ.

މިއަދަކީ ރައްޔިތުންގެ މަޖިލީހުގެ ރައީސް ކަމުގައި ރައީސް ނަޝީދު ހުންނަވަނިކޮށް އަވަހާރަކޮށްލަން ބޮމުގެ ހަމަލާދިންތާ 4 އަހަރު ފުރުނު ދުވަހެވެ.

މި ހަމަލާގައި އެމަނިކުފާނު ވަރަށް ބޮޑަށް ޒަހަމްވުމާ ގުޅިގެން 16 ގަޑިއިރުގެ ދިގު ސާޖަރީއެއް އޭޑީކޭ ހޮސްޕިޓަލްގައި ކޮށްފައިވެ އެވެ. އަދި އޭގެ ފަހުން ރާއްޖެއިން ބޭރުން އެތައް ދުވަހެއް ވަންދެން ފަރުވާ ހޯއްދަވާފައިވެ އެވެ.

ދަ ޑިމޮކްރެޓްސް އިން ބުނީ ބޮމުގެ ހާދިސާއަށް ހަތަރު އަހަރުވީއިރު އެމަނިކުފާނަށް އިންސާފު ލިބިވަޑައިގެންފައި ނުވުމަކީ ކަންބޮޑުވުމެއް ކަމަށެވެ.

އެ މައްސަލައާ ގުޅޭ އިތުރު މައުލޫމާތު ލިބިވަޑައިގެންފައިވާ ކަމަށް ޑިފެންސް މިނިސްޓަރު މުހައްމަދު ޣައްސާން މައުމޫން މިދިޔަ އަހަރުގެ މާޗު މަހު ރައްޔިތުންގެ މަޖިލީހުގައި ވިދާޅުވެފައި ވިޔަސް އޭގެ ފަހުން އެކަމުގައި ދައުލަތުގެ އެއްވެސް މުއައްސަސާއަކުން އެޅި ފިޔަވަޅެއް މިހާތަނަށް އެނގެން ނެތް ކަމުގެ ކަންބޮޑުވުން ވެސް ޑިމޮކްރެޓްސް އިން ފާޅުކުރި އެވެ.

މަޖިލީހުގެ މިއަދުގެ ޖަލްސާގައިވެސް މިނިސްޓަރު ޣައްސާން ވިދާޅުވީ ރައީސް ނަޝީދަށް ދިން ހަމަލާއާ ގުޅޭ ތަހުގީގު އިތުރަށް ކުރިއަށް ގެންދަން އެއްވެސް ފަރާތަކުން އަންގާފައި ނުވާތީ އެފަދަ ތަހުގީގެއް ކުރިއަށް ނުދާ ކަމަށެވެ.

ޑިމޮކްރޓުން ބުނީ ނަޝީދަށް ހަމަލާއަކީ ދުރާލާ ރޭވި އިންތިޒާމުވެގެން ހިންގި ޓެރަރިސްޓް ހަމަލާއެއް ކަމަށްވީ ނަމަވެސް އަދި ޓެރަރިޒަމަކީ އަނިޔާވެރިކަން އެކުލެވޭ ކުށްތަކުގެ ތެރެއިން އެންމެ ސީރިއަސްކަން ބޮޑު އަދި ހާއްސަ ގާނޫނީ އުސޫލުތަކަކުން ފިޔަވަޅުއަޅައި އަމަލުކުރުމަށް ހަމަޖެހިފައިވާ ކުށަކަށްވާއިރު ކަމުގެ ސީރިއަސްކަން މިހާރު ގެއްލުވާލާފައިވާ ކަމަށެވެ.

"މި މައްސަލާގައި އިންސާފު ގާއިމުނުކުރެވިވާވުމުގެ އަސްލަކީ ވެސް މިއީކަމުގައި ދެކެމެވެ." ބަޔާނުގައިވެ އެވެ.

ނަޝީދަށް ދިން ހަމަލައިގެ ސަބަބުން އެ މަނިކުފާނަށް ބޮޑެތި އަނިޔާތަކެއް ވެ، 16 ގަޑިއިރުގެ ބޮޑު އޮޕަރޭޝަނެއް ކުރަން ޖެހުނެވެ. އަދި އެ އާލާސްކަންފުޅުގައި ގިނަ ދުވަސްތަކެއް ވަންދެން އުޅުއްވި އެވެ.

ދައުލަތުން އެ މައްސަލާގައި ދައުވާކުރަނީ އަދުހަމްގެ އިތުރުން މއ. ފޭރުގޭ މުޖާޒް އަހުމަދާއި ގއ. ކޮނޑޭ ފޮޅޭމާ ތަހުމީން އަހުމަދާއި ނ. މަނަދޫ ނޫރީގޭ އަލީ ހައިޝަމާއި ގއ. ވިލިނގިލީ ހުދުރުވާގޭ ފަހުމީ އަލީގެ އިތުރުން މ. ކުދެހިގޭ އިސްހާގާއި އއ. މާޅޮސް، އަސަރީގޭ މުހައްމަދު ނާޒިމްގެ މައްޗަށެވެ.