ރާއްޖޭގައި ވެސް ކޮވިޑު19 ކޭސްތައް އިތުރުވަނީ

މަރިޔަމް އަނާ

22 މެއި 2025 - 18:53

0 comments

ރާއްޖޭގައި މިދިޔަ މަދު ހަފުތާތަކުގައި ކޮވިޑް-19ގެ ކޭސްތައް އިތުރުވެފައިވާ ކަމަށް ހެލްތު މިނިސްޓްރީން މިއަދު ބުނެފި އެވެ.

އެޗްޕީއޭއިން މިއަދު ބުނީ، ކޮވިޑް ރޯގާގެ ކޭސްތައް ރިޕޯޓު ކުރެވުނު މިންވަރު މި ފަހުން އިތުރުވެފައިވާ ކަމަށެވެ.

އަދި، މި ދުވަސްވަރު އާންމުކޮށް ފެތުރޭ ވައިރަލް ރޯގާއާއި ޑެންގޫ އަދި އިންފްލޫއެންޒާގެ ކޭސްތައް ވެސް ގިނަ އަދަދަކަށް ރިޕޯޓުކުރެވުމުންދާ ކަމަށް އެޗްޕީއޭއިން ބުންޏެވެ.

ބަލިތަކުގެ ހާލަތު ވަރަށް ގާތުން މޮނިޓާކޮށް، އިތުރު ތަފްސީލް ހާމަކުރަމުން ގެންދާނެ ކަމަށް އެޗްޕީއޭއިން ބުންޏެވެ.

އެޗްޕީއޭ އިން ވަނީ މި ބަލިތަކުން ރައްކާތެރިވުމަށް އަޅަން ޖެހޭ ފިޔަވަޅުތައް އަޅައި، އިތުރަށް ސަމާލުވުމަށް އިލްތިމާސްކޮށްފަ އެވެ.

ދެކުނު އޭޝިއާ ސަރަހައްދުގެ ވަރަށް ގިނަ ގައުމުތަކުގައި ކޮވިޑު19ގެ ކޭސްތައް ފެންނަ މިންވަރު މި އަންނަނީ ވަރަށް ބޮޑަށް އިތުރުވަމުންނެވެ.

އެގޮތުން ތައިލޭންޑުގައި، މިދިޔަ ހަފުތާ ތެރޭ 50،000 އެއްހައި ކޮވިޑު ކޭސް މިދިޔަ ހަފުތާގައި އެކަނި ވެސް ރެކޯޑުކޮށްފައިވެއެވެ. އަދި މި އައުޓްބްރޭކް ކުރިއަށް އޮތް ދެ ތިން މަހަށް ދިގު ދެމިގެން ދާނެކަމަސް ލަފާކުރެވޭ ކަމަށް އެ ގައުމުގެ ޑިޕާޓްމަންޓް އޮފް ޑިޒީސް ކޮންޓްރޯލުން ބުނެއެވެ.

ކޮވިޑު ކޭސްތައް ކުއްލިއަކަށް އިތުރުވި ނަމަވެސް އެހެނިހެން ރޯގާތައް ރިޕޯޓުކުރާ އަދަދު ހުރީ އެއް ހަމައެއްގައި ކަމަށް ތައިލޭންޑުން ބުނެފައިވެއެވެ.