މިނިސްޓަރު ސައީދުގެ ބައްޕާފުޅު، ސައީދު އަބްދުﷲ އަވަހާރަވެއްޖެ

މަރިޔަމް އަނާ

20 ޖުލައި 2025 - 09:59

0 comments

އިކޮނޮމިކް މިނިސްޓަރު މުހައްމަދު ސައީދުގެ ބައްޕާފުޅު، ހއ. ތުރާކުނު، ވިނަރެސް، ސައީދު އަބްދުﷲ އަވަހާރަވެއްޖެ އެވެ.

ސައީދު އަވަހާރަވީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް، އިންޑިއާގެ ކޮޗިންގަ އެވެ.

ތުރާކުނުގެ ކުޑަ ކަތީބެއްގެ ގޮތުގައި ދައުލަތަށް 20 އަހަރަށް ވުރެ ގިނަ ދުވަހު އޭނާ ހިދުމަތްކުރައްވާފައިވެ އެވެ. އަދި އޭގެ ކުރިން އޭނާ ވަނީ ހއ. ދިއްދޫގައި ހުރި އަތޮޅު ފިހާރައިގެ މެނޭޖަރުކަމާއި އުލިގަމު ކުޑަކަތީބުކަމުގެ އިތުރުން ވެސް ބައެއް މަގާމުތައް އަދާކުރައްވައިފަ އެވެ.

ސައީދު އަބްދުﷲ އަވަހާރަވުމުން ރައީސް ޑރ. މުހައްމަދު މުއިއްޒު ވަނީ އާއިލާއަށް ތައުޒިޔާ ދަންނަވާފަ އެވެ.

ރައީސް ޑރ. މުޙައްމަދު ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި ވިދާޅުވީ މިނިސްޓަރު މުޙައްމަދު ސައީދުގެ ލޮބުވެތި ބައްޕާފުޅު ވިނަރެސް، ހއ. ތުރާކުނު، ސަޢީދު ޢަބްދުﷲ އަވަހާރަވި ހަބަރު އަޑުއެއްސެވީ ނުހަނު ފުންހިތާމައާއެކުގައި ކަމަށެވެ.

ރައީސް ވަނީ މަރްހޫމަށް ސުވަރުގޭގެ މަތިވެރި ނިއުމަތް ދެއްވުން އެދި ދުއާ ކުރައްވާ ކަމަށް ވިދާޅުވެފަ އެވެ.