ހޯރަފުށީގައި ކޮންސްޓްރަކްޝަން ދާއިރާ ދަށަށް، އާންމު ވިޔަފާރިތައް ހުއްޓިފައި!

އިސްމާއިލް ރިޒާ

28 ޖުލައި 2025 - 12:25

0 comments

ހއ. ހޯރަފުށި: ކޮންސްޓްރަކްޝަން ދާއިރާ ދަށަށް، އާންމު ވިޔަފާރިތައް ހުއްޓިފައި!

އުމްރާނީ ތަރައްގީގެ މަސައްކަތްތައް ވަރަށް ބޮޑަށް މަޑުޖެހިފައިވާ ހއ. ހޯރަފުށީގައި ކޮންސްޓްރަކްޝަން ދާއިރާ ވަރަށް ބޮޑަށް ދަށަށް ގޮސްފި ކަމަށް އެ ދާއިރާގައި ހަރަކާތްތެރިވާ ވިޔަފާރިވެރިން ބުނެފި އެވެ.

ކޮންސްޓަރަކްޝަން ދާއިރާ އަށް އެއްވެސް ކުރިއެރުމެއް ނުލިބޭ އެއް ސަބަަބަކީ މީގެ ކުރިން އުމްރާނީ ތަރައްގީގެ ގިނަ ޕްރޮޖެކްޓްތަކެއް ހިގަމުން އައި ހޯރަފުށީގައި މިހާރު ކުރިއަށްދާ ތަރައްގީގެ މަޝްރޫއެއް ނެތުމެވެ. ކުރީގެ ސަރުކާރުތަކުން ހޯރަފުށީގެ ތަރައްގީއަށް ގިނަ މަޝްރޫތަކެއް ހިންގި ނަމަވެސް ފާއިތުވި 16 މަސް ދުވަހު ހޯރަފުށީގެ އުމްރާނީ ތަރއްގީގެ ދުވެލި ވަނީ މުޅިން ހެން ހުއްޓިފައި އެވެ.

ކޮންސްޓަރަކްޝަން ދާއިރާ އަށް ބޭނުންވާ ސާމާނު ވިއްކާ ފިހާރައެއް ހިންގާ މީހަކު "ހޯރަ އޮންލައިން" އަށް ބުނީ ރަށުގައި ކޮންސްޓަރަކްޝަން ދާއިރާ އިން މިހާރު ހިގަމުން އަންނަ މަަސައްކަތެއް ނެތުމުން ފިހާރަތަކުން ކުރާ ވިޔަފާރިތައް ބޮޑުތަނުން ދައްވެފައިވާ ކަމަށެވެ. ކުރިން ދުވާލަކަށް 8000 ރުފިޔާގެ ވިޔަފާރި އެވްރެޖްކޮށް ކުރާއިރު މިހާރު ދުވާލަކަށް 2000 ރުފިޔާ ވެސް ނުލިބޭ ކަމަށް އެ ވިޔަފާރިވެރިޔާ ބުންޏެވެ.

އެޅިގައި އަޅައިގެން ގަލުގެ ވިޔަފާރިކޮށް އުޅޭ މީހަކު ބުނީ މިހާރު ގަލެއް ގަންނަން އަންނަ މީހަކު ވެސް ނެތް ކަމަށާއި ކޮންސްޓަރަކްޝަން ސައިޓްތައް ހުރީ ފަޅަށް ކަމަށެވެ. އަދި ކުރިން ކައިރި ރައްތަކުންވެސް ގަލަށް އޯޑަރު ލިބޭ ކަމަށާއި ނަމަވެސް މިހާރު އެފަދަ އޯޑަރުތައް ވެސް ލިބުން މަދުވެފައިވާ ކަމަށެވެ.

"މީހުންގެ ސޭވިންގައި އެއްޗެއް ނެތުމުން މިހާރު ގެދޮރު އިމާރާތް ކުރުމާއި ގެދޮރު ޒީނަތްތެރިކުރުން ވެސް ވަނީ މަޑުޖެހިފައި، ގޭތެރޭގައި ގާ އަތުރަން ކިތައްންމެ ބޭނުން ވިޔަސް ރައްޔިތުންގެެ އަތުގައި ރުފިޔާއެއް ނެތް" ވިޔަފާރިވެރިޔާ ބުންނެވެ.

ގަލުގެ ވިޔަފާރިކުރާ މީހާ އިތުރަށް ބުނީ ސަރުކާރުގެ ޕީއެސްއައިޕީގެ މަޝްރޫތައް ވެސް މިހާރު ހޯރަފުށީގައި މަޑުޖެހިފައިވާތީ ގާ ނުވިކޭ ކަމަށާއި ހޮސްޕިޓަލްގެ މަސައްކަތް ވެސް ހުއްޓިފައި އޮތުމުން ގަލުގެ ވިޔަފާރި މުޅިންހެން ނެތް ކަމަށެވެ. ކުރީ ސަރުކާރުން ހޯރަފުށީގައި އަލަށް އިމާރާތް ކުރި އޮފީސްތަކާއިއެކު ކޮންސްޓަރަކްޝަން ދާއިރާއަށް ދިރުން ލިބުނު ކަމަށް އޭނާ ބުންޏެވެ.

ކޮންސްޓަރަކްޝަން ދާއިރާގެ ވިޔަފާރި ވެރިއަކު ބުނީ ކުރީ ސަރުކާރުން ހިންގި ބިޔަ މަޝްރޫއުތައް ނިމިފައިވާތީ މިހާރު ރަށުން ސަބް ކޮންޓްރެކްޓަށް ވެސް މަސައްކަތެއް ނުލިބޭ ކަމަށާއި ރައްޔިތުން ފަގީރުވުމުން އަލަށް ގެދޮރު އިމާރާތް ކުރަން ހަރަދު ކުރަން ވެސް ގިނަ މީހުން ބޭނުން ނުވާ ކަމަށެވެ. އަދި ސަރުކާރު ކުންފުނިތަކުން މިހާރު ހޯރަފުށީގައި ކުރިއަށް ގެންދާ މަސައްކަތްތައް މަދުވުމުން ރަށުގައި ހަރަކާތްތެރިވާ ކުދި އަދި މެދުފަންތީގެ ވިޔަފާރިތަކަށް އޭގެ އަސަރު ކުރަމުން އަންނަ ކަމަށެވެ.

"ކުރިން ދެ ބުރި ތިން ބުރި އަށް ހަދަން ފެށީ އިމާރާތްތައް އެހުރީ ފައިސާ ނެތުމުން ހުއްޓިފައި، ބައެއް އިމާރާތްތަކުގެ ސީޓް އެޅި ފައިސާ ކޮޅު ވެސް ނުލިބި އަދި ވެސް ހުރީ" ކޮންސްޓަރަކްޝަން ދާއިރާގެ ވިޔަފާރިވެރިޔަކު ބުންނެވެ.

ކުދި އަދި މެދުފަންތީގެ މަސައްކަތުގައި ހޯރަފުށީގައި ހަރަކާތްތެރިވާ މީހަކު ބުނީ ކުރާނެ މަސައްކަތެއް ނުލިބުމުގެ ސަބަބުން މުވައްޒަފުންނަށް މުސާރަ ދީ ނިމޭއިރު ހާޑްވެއާ ފިހާރައިގެ ބިލްތައް އަދި ހުންނަނީ ނުދެއްކި ކަމަށާއި އުމްރާނީ ތަރައްގީގެ މަސައްކަތް ހޯރަފުށީގައި ހުއްޓިފައި އޮތުމުން ރަށުގައި މިހާރު އިގްތިސާދީ ހަރަކާތްތައް ވެސް ހުއްޓިފައިވާ ކަމަށެވެ.

އިތުރު ވިޔަފާރިވެރިއަކު ބުނީ މުވައްޒަފުންނަށް ދޭންޖެހޭ މުސާރައިގެ 6 މަހުގެ ޕެންޑިން އެއް މިހާރު ވެސް އެބައޮތް ކަމަށާއި މަސައްކަތެއް ނެތުމުން ލިބޭ އާމްދަނީ ދަށްވެ ވިޔަފާރި ހުއްޓުމަކަށް އައިސްފައިވާ ކަމަށެވެ. އަދި ރަށު ކައުންސިލުން ދޫކޮށްފައިވާ ޓޫރިޒަމް ޒޯންގައި މަސައްކަތެއް ނުހިގައި އޮތުމަކީ ވެސް ކުދި ކުންފުނިތަކަށް އާ މަސައްކަތް ނު ލިބޭ އެއް ސަބަބެވެ.

"މި މަސައްކަތުގައި ގިނަ ބިދޭންސީން މުވައްޒަފުން ވެސް އެބަ ގެންގުޅެން، އެމީހުން މުސާރައާއި އަހަރީ ފީތަކަށް ކެއުންބުއިމަށް ބޮޑު އެއްޗެއް އެބަ ހަރަދުވޭ، މިހާރު މިދަނީ ހަމަ ފުލުން، ވިޔަފާރިވެރިޔަކު ބުންނެވެ.

ހޯރަުފުއްޓަކީ އުމްރާނީ ތަރައްގީގައި ފާހަގަކޮށްލެވޭ ރަށެކެވެ. އެރަށުން މިހާރު ފެންނަ ކޮންސްޓަރަކްޝަން ދާއިރާގެ ގިނަ މަސައްކަތް ތަކަކީ އެރަށުގެ މި ދާއިރާގެ ފަންނުވެރި މަސައްކަތްތެރިންގެ ބުރަ މަސައްކަތެވެ. ނަމަވެސް މިހާރު ގިނަ ވިޔަފާރިވެރިން ތިބީ ކަންމަތީ ފިހާރައަށް ދަރާފައި އެވެ.

ކުރީ ސަރުކާރުންތަކުން ހޯރަފުށީގައި ތަރައްގީގެ އެތައް މަޝްރޫއެއް ހިންގާތީ އެރަށް ކުރިން ފެންނަނީ "ކޮންސްޓްރަކްޝަން ސައިޓެއް" ގޮތުގައި އެވެ. ނަމަަވެސް މިހާރު ރަށުގައި ދިރުމެއް ނެތުމުން ރައްޔިތުންގެ އުންމީދުތައް ވަނީ ފަޑުވެފައި އެވެ.

ފެނަކަ އިމާރާތް ހުއްޓި ބީއެމްއެލްގެ އާ އިމާރާތުގެ މަސައްކަތް ލަސްވެ، ހޮސްޕިޓަލުގެ މަސައްކަތް ދަނީ ފިނިހަކަ ސްޕީޑްގައި އެވެ. އަދި އަލަށް އަޅަން ބުނީ ސިފައިންގެ މަރުކަށާއި ގެސްޓް ހައުސް ޒޯނުން ދޫކޮށްފައިވާ ބިންތަކުގައި ވިޔަފާރިވެރިން ތިބީ އިންވެސްޓް ކުރަން ބިރުން ނެވެ. އެންމެ ބޮޑު އެއް މައްސަލައަކީ އެ ސަރަހައްދުގައި ދާއިމީ ކަރަންޓާއި ފެން ވެސް ލިބެން ނެތުމެވެ.

މި ސަރުކާރުގެ ފަސް އަހަރު ނިމިގެންދާއިރު ހޯރަފުށީ ދާއިރާގެ އުމްރާނީ ތަރައްގީގެ ކުރިމަގާއިމެދު ޖަވާބު ބޭނުން ގިނަ ސުވާލުތަކެއް މިހާރު ވަނީ އުފެދިފަ އެވެ. ހާއްސަކޮށް "ހޯރަފުށީ ދާއިރާގައި އިގްތިޞާދީ ހަރަކާތްތައް ހުއްޓި، ވަޒީފާގެ ފުރުސަތު ބަންދުވެފައި..! އޮތުމުން ނެވެ.