ސިނަމާލެ ބްރިޖަކީ ދެ ގައުމުގެ ގުޅުމުގެ ފުރިހަމަ މިސާލެއް: ރައީސް

ހަސަން ހަލީމް

30 އޯގަސްޓް 2025 - 11:05

0 comments

ކުރީގެ ރައީސް ޔާމީންގެ ސަރުކާރުގައި ފައްޓަވާ ނިންމެވި ސިނަމާލެ ބްރިޖަކީ ދެ ގައުމުގެ ވަރުގަދަ ގުޅުމުގެ ފުރިހަމަ މިސާލެއް ކަމުގައި ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އޮގަސްޓް 30، 2018 ގައި ބޭނުންކުރަން ފެށި މި ބްރިޖަކީ މާލެ ސަރަހައްދުގައި އުޅޭ މީހުންގެ ދިރިއުޅުން ބަދަލުކޮށްލައި، ދަތުރުފަތުރަށް ވަރަށް ބޮޑު ލުޔެއް ގެނެސްދިން ބިނާއެކެވެ. މިހާރު ކޮންމެ ދުވަހަކު އެތައް ސަތޭކަ ބަޔަކު، 1.4 ކިލޯމީޓަރުގެ މި ބްރިޖު ހުރަސްކޮށް، މާލެ އާއި ހުޅުލެ އަދި ހުޅުމާލެއާ ދެމެދުގައި ދަތުރު ކުރެ އެވެ.

ބްރިޖަށް ހަތް އަހަރު ފުރުމުގެ މުނާސަބަތުގައި އެކްސްގައި ރައީސް ކުރެއްވި ޕޯސްޓެއްގައި ވިދާޅުވީ މި ބްރިޖާ އެކު ގައުމަށް އާ މަގުތަކެއް ހުޅުވިގެންދިޔަ ކަމަށެވެ. އެއީ ޕާޓްނާޝިޕަކުން ހާސިލުކުރެވޭނެ ކަންކަމާއި ރާއްޖެ އާއި ޗައިނާއާ ދެމެދު އޮތް އެއްބައިވަންތަކަމާއި އިތުބާރާއި ފަހި ފުރުސަތުތައް ދެމިގެންދާ ގުޅުންތަކުގެ ހެއްކެއް ކަމަށް އެމަނިކުފާނު ވިދާޅުވި އެވެ.

ބްރިޖްގެ ވަނަވަރު

ބްރިޖްގެ ވައްތަރު: ބޯޗް އާޗް
ބޯކްގެ އަދަދު 6
ހަ ބޯކްގެ ޖުމްލަ ދިގު މިނަކީ 760 މީޓަރު
ބްރިޖަށް އަރާ މަގުތަކާއެކު ޖުމްލަ ދިގު މިން 2100 މީޓަރު
ބްރިޖްގެ ދަށުން ދެވޭ އެންމެ އުސްމިނަކީ 75 ފޫޓް
ބްރިޖްގެ މަސައްކަތް ކުރަނީ ޗައިނާގެ ސީސީސީސީ
ހަތަރު ފުރޮޅުލީ އުޅަނދަށް ދެ ލޭން
ސައިކަލަށް ދެ ލޭން
ބްރިޖުގެ ޖުމްލަ ދިގުމިނާކީ ދެ ކިލޯމީޓަރު
ފުޅާމިނުގައި 20.3 މީޓަރު

ސިނަމާލެ ބްރިޖު ބޭނުންކުރާތާ ހަތް އަހަރުވީއިރުވެސް ބްރިޖުގެ ހާލަތު އަދިވެސް ވަރަށް ރަނގަޅު ކަމަށް ޗައިނާއިިން ރާއްޖެއަށް ކަނޑައެޅި ސަފީރު ކޮންގް ޝިއަންހު މި އަހަރުގެ މޭ މަހު ވިދާޅުވި އެވެ.