ހޯރަފުށީ ހެލްތު ސެންޓަރަށް ގެންދިޔަ ފަސް އަހަރުގެ ކުއްޖަކަށް ފަރުވާ ދިނުމުގައި އިހުމާލުވި މައްސަލައެއް!

މަރިޔަމް އަނާ

01 ސެޕްޓެމްބަރ 2025 - 17:01

0 comments

ހޯރަފުށީ ހެލްތު ސެންޓަރު

ހއ. ހޯރަފުށީ ހެލްތު ސެންޓަރަށް ގެންދިޔަ ފަސް އަހަރުގެ ކުޑަ ކުއްޖަކަށް ފަރުވާ ދިނުމުގައި އިހުމާލުވި މައްސަލައެއް ފެންމަތި ވެއްޖެ އެވެ.

މިކަމާއި ގުޅޭ މައުލޫމާތު "ހޯރަ" އަށް ދެމުން ކުއްޖާގެ އާއިލާއިން މިއަދު ބުނީ ފުރަތަމަ ކުއްޖާގެ ބަޑަށް ތަދުވާތީ މީގެ ދެ ދުވަސް ކުރިން ހޯރަފުށީ ހެލްތު ސެންޓަރަށް ދިޔައިން ކަމަށާއި އެ ދުވަހު ބޭސް ދީފަ ފޮނުވާލީ ކަމަށެވެ. އޭގެ ފަހުން އަނެއްކާވެސް ކުއްޖާ އަށް އުދާގޫވާތީ އަދި ކުރިމަތި ފަރާތް ވަރަށް ބޮޑަށް ދުޅަވެގެން އިއްޔެ 12.15 ހާއިރު ސެންޓަރަށް ދިޔައިން ކަމަށެވެ.

"ދިޔައީމަ ބުނީ އިންފެކުޝަން އެއްވެސް ނެތޭ ޓެސްޓުތަކުން ފެންނާކަށް، ދެން އަޅުގަނޑު އެދުނިން ދިއްދޫ އަށް ފޮނުވައިދޭން. ބުނީމަ ބުނީ މީ އެމަޖެންސީ ކަމެއް ނޫން ކަމަށް. އެހެން ވީމަ ފޮނުވެން ނެތް ކަމަށް" ކުއްޖާގެ އާއިލާއިން ވާހަކަ ދެއްކި މީހާ ބުންޏެވެ.

އާސަންދަ ހަރަދުގައި ދިއްދޫ ހޮސްޕިޓަލަށް ފޮނުވައި ނުދިނުމުން އެ އާއިލާއިން ދިއްދުއަށް އަމިއްލަ ހަރަދުގައި ގޮސް ދެއްކި އެވެ. ދިއްދޫ ހޮސްޕިޓަލުން އާއިލާއަށް އެންގީ ކުއްޖާގެ ހާލަތު ވަރަށް "އެމަޖެންސީ" ކަމަށާއި އިތުރު ފަރުވާ އަށް އޮޕަރޭޝަނެއް ވެސް ކުރަން ޖެހޭ ކަމަށެވެ.

"ދިއްދޫ އިން ބުނީ ބުލަޑް ވެސަލްސްތައް ޓުވިސްޓްވެފަ ހުރީމަ ލޭ ދައުރު ނުކުރާތީޔޭ އެހާ ބޮޑަށް ދުޅަވެފަ އެހުރީ. ވީހާވެސް އަވަހަށް އޮޕަރޭޝަން ނުކޮށްފިއްޔާ ފުރާނައަށްވެސް ނުރައްކާ ވާ ވަރުގެ ބޮޑު ކަމެކޭ މީ." ދިއްދޫ ހޮސްޕިޓަލާއި ހަވާލާދީ އާއިލާއިން ބުންޏެވެ.

އެ ކުއްޖާގެ އާއިލާއިން ބުނީ އާސަންދައިން ދިއްދުއަށް ދެވޭނެ ގޮތެއް އަވަހަށް ހޯދައި ދިނުމަށް ހޯރަފުށީ ހެލްތު ސެންޓަރުގެ މީހުން ގާތުގައި ތަކުރާރުކޮށް އެދުނިން ކަމަށާއި ނަމަވެސް ދިނީ އެއް ޖަވާބެއް ކަމަށެވެ.

"ކޭސް ސީރިއަސް ނޫން" ދިއްދޫއަށް ފޮނުވަން ކުއްޖާ އާއިލާއަށް އެދުމުން ހޯރަފުށީ ހެލްތު ސެންޓަރު ބުނި ކަމަށް އާއިލާއިން ބުންޏެވެ.

މިކަމާއި ގުޅިގެން ހޯރަފުށީ ހެލްތު ސެންޓަރުން އަދި ވާހަކަ އެއް ނުދައްކަ އެވެ.

މިފަހުން ހޯރަފުށީ ހެލްތު ސެންޓަރުން ތުއްތު ކުއްޖަކަށް "އޮޅިގެން" ނުބައި ވެކްސިނެއް ދިން މައްސަލައެއް ވެސް ވަނީ ފެންމަތި ވެފަ އެވެ.