ކިތައް ވައުދު ވެއްޖެ ހެއްޔެވެ؟ ފުއްދުނީ ކިތައް ވައުދު ހެއްޔެވެ؟

އިސްމާއިލް ރިޒާ

03 ޑިސެމްބަރ 2025 - 14:00

3 comments

މިނިސްޓަރު ސައީދު އަދި ދާއިރާގެ އެމްޕީ އަލީ ހޯރަފުށި ސްޓިއަރިންގް ކޮމިޓީ ބައްދަލުކުރައްވަނީ

ރައްޔިތުން ކައިރި އަށް ވޯޓު ހޯދަން ސިޔާސީ މީހުން ދާންވީ ފޮނި ވައުދުތަކާ އެކު އެއް ނޫނެވެ. ފުރަތަމަ ގަބޫލުކުރަންވީ ރާއްޖޭގެ ހާލަތު އޮތް ގޮތެވެ؛ ރާއްޖޭގެ ހަގީގަތެވެ. ފަރުވާ ހޯދަންވީ ރަށްރަށުގައި މީހުން އުޅޭ ނިކަމެތި ކަމަށެވެ. މާލޭގައި މީހުން އުޅޭ ހަރަދުބޮޑު ދިރިއުޅުމަށެވެ. އުފައްދަންވީ ވަޒީފާތަކެވެ. ފަށަންވީ އިގްތިސާދީ ގިނަ މަސައްކަތްތަކެވެ. ގެންނަންވީ އިންވެސްޓްމަންޓްތަކެވެ. މަދުކުރަންވީ ކޮރަޕްޝަނެވެ. ނައްތާލަންވީ ޑްރަގެވެ. ހިފައްޓަންވީ ޑޮލަރުގެ އަގުތަކެވެ. ވިއްކަންވީ އިހުލާސްތެރިކަމާއި އަމާނާތްތެރިކަމެވެ. ހަމަޖައްސައިދޭންވީ އެކަށީގެންވާ ވަރުގެ އަގުތަކުގައި އުޅެވޭ ވަރުގެ ދިރިއުޅުމެކެވެ.

ވެރިކަން ހޯދަން ގިނަ ވައުދުތަކެއް ރައީސް މުއިއްޒު ސަރުކާރުން މުޅި ރާއްޖެ ހިމެނޭހެން ހއ. ހޯރަފުށި ދާއިރާ އަށް ވެސް ވިއެވެ. މިއަދުގެ ސުވާލަކީ ކިތައް ވައުދު ވެއްޖެ ހެއްޔެވެ؟ އޭގެ ތެރެއިން ފުއްދުނީ ކިތައް ވައުދު ހެއްޔެވެ؟ މިއީ އަންނަ ލޯކަލް ކައުންސިލް އިންތިހާބަށް ސަރުކާރުން ތައްޔާރުވަމުން އަންނަ ދަނޑިވަޅު ކޮންމެ މީހަކު ވެސް ވިސްނާލަން ރަނގަޅު ކަމެކެވެ.

ހޯރަފުށީ ސިއްހީ ފަރުވާ ރަނގަޅުކޮށްދިނުމަކީ 2023 ގެ ރިޔާސީ އިންތިހާބުގެ ކެމްޕެއިންގައި ޑރ. މުއިއްޒު ވެވަޑައިގެންނެވި ވައުދެކެވެ. ނަމަވެސް ރައީސް މުއިއްޒުގެ ސަރުކާރަށް ދެ އަހަރުވާން ދާއިރު ވެސް ހޯރަފުށީގެ ސިއްހީ ނިޒާމް އޮތީ ރައްޔިތުން "އިތުބާރު" ނުކުރާ ހިސާބެއްގައި އެވެ. ސުވާލަކީ ރައީސް މުއިއްޒު ވެރިކަމުގައި ހޯރަފުށީ ހޮސްޕިޓަލްގެ މަސައްކަތް ނިންމާ ހިދުމަތް ދެވޭވަރު ވާނެ ބާ އެވެ؟!؟!؟!؟

މީގެ އިތުރުން ހއ. ހޯރަފުށީ ބިން ހިއްކައި ދިނުމަކީ 2023 ގެ ރިޔާސީ އިންތިހާބުގެ ކެމްޕެއިންގައި ޑރ. މުއިއްޒު ވެވަޑައިގެންނެވި ދެވަނަ ވައުދެކެވެ. ނަމަވެސް ރައީސް މުއިއްޒުގެ ސަރުކާރަށް ދެ އަހަރުވާން ދާއިރު ވެސް ހޯރަފުށީގެ ބިންހިއްކުމުގެ މަސައްކަތުގެ އަޑު މިހާރު ވަނީ މަޑުވެފަ އެވެ. މި ސަރުކާރަށް މަރުދޭ މީހުނަށް މިކަންކަން ފެށޭނެ ދުވަހެއް ބުނެ ނުދެވި ސަރުކާރު ދިފާއު ކުރަން ވެސް ވަނީ ދަތިވެފަ އެވެ.

ދެން އޮތީ މަޖިލިސް އިންތިހާބަށް ސަރުކާރުގެ ވެރިން އައިސް ދެއްކި ދަޅަ އެވެ. އެންމެ ފާހަގަ ކުރެވެނީ ނިމުނު ރައްޔިތުންގެ މަޖިލިސް އިންތިހާބުގައި ހއ. ހޯރަފުއްޓަށް ވަޑައިގެން މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) ބުނި ކަމަށް ވިދާޅުވެ، ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހިމް ހަލީލް ވީ ވައުދުތަކެވެ.

ޝޯޝަލް މީޑިއާގައި ވައިރަލް ވެފައިވާ ވީޑިއޯގައި ހަލީލް ވަނީ ޗަމްޕާ މުހައްމަދު މޫސާ ވިދާޅުވި ކަމަށް ބުނެ ހޯރަފުއްޓަށް ގިނަ ވައުދުތަކެއް ވެފައި އެވެ. އެގޮތުން:

އަލީ މޫސާ ހޮވުމުން ހޯރަފުށީގައި ހުރި އައިސްޕްލާންޓް މަސައްކަތް ހުއްޓިފައި ހުރުމުން ހޯރަފުށީގައި އާ އައިސް ޕްލާޓެއް ގާއިމުކޮށްދިނުން
އަލީ މޫސާ ހޮވުމުން ހޭންޑް ބޯޅަ އަދި ބަށި ބޯޅަ ކުޅެވޭ ގޮތައް އެންމެ ޒަމާނީ ބަށި ކޯޓެއް ގާއިމުކޮށްދިނުން
އަލީ މޫސާ ހޮވުމުން މުޅި އަތޮޅަށް ހުޅުވާލައިގެން މުޅި ރާއްޖޭގައި ބޭއްވޭ އެންމެ ބޮޑު ބަށި މުބާރާތް އަގު ބޮޑު އިނާމަކާއިއެކު ބާއްވަދިނުން
އަލީ މޫސާ ހޮވުމުން ހޯރަފުށީގައި ޒަމާނީ ފިޒިއޯތެރެޕީ ސެންޓަރެއް ގާއިމްކޮށްދިނުން
އަލީ މޫސާ ހޮވުމުން ވޯޓާ ސްޕޯޓްސް ސެންޓަރެއް ހޯރަފުށީ ޒުވާނުންނަށް ގާއިމްކޮށްދިނުން

ނަމަވެސް މިއަދު ހޯރަފުށީ ދާއިރާގެ ރައްޔިތުން ހާއްސަކޮށް ޒުވާނުންގެ ޝަކުވާއަކީ މި ސަރުކާރުގެ އިސްބޭފުޅަކު ހޯރަފުއްޓަށް ވަޑައިގެން އެދެއްކެވި ވާހަކައިގެ "ކުލަ" ނުޖެހުމެވެ.

އިތުރަށް ކިޔާލަން: ތުރާކުނުގައި ވޯޓާ ބަންކަރިންގެ ހިދުމަތް ފެށި ބާޖު މިހާރު ނެތް، އިނީ ބާޖު އައްސާނެ ތިން މުޑި..!

ނިމުނު ދެ އިންތިހާބަށް ވީ ވައުދުތައް ނުފުއްދާ ރައްޔިތުންގެ ބޯކާލަން އުޅުމަށް ވުރެ ހޯރަފުށީ ދާއިރާގެ ރައްޔިތުންގެ ނިކަމެތި ކަމާއި އިގްތިސޯދީ ހާލަތު ހަގީގަތުގައި މާ ގޯހެވެ. ވަޒީފާ ނެތިފައި އޮތް ޒުވާން އާބާދީއެއް ހޯރަފުށި ދާއިރާގައި އެބައޮތެވެ. ޑްރަގް ނަގައިގެން މަގުމައްޗަށް ބޮޑު ޖީލެއް އޮތީ ދޫވެފަ އެވެ. އެތައް ބައިވަރު ކުދިންނެއް ކޮންމެ އަހަރަކު ސްކޫލުތައް ނިންމައިގެން ނުކުމެގެން އަންނަ އިރު، ކުރާނެ ކަމެއް ނެތެވެ. މިއަދު ރައްޔިތުންގެ ޝަކުވާތަކާއި ކަންބޮޑުވުންތައް "ފޮށިތަންމައްޗަށް ވުރެން ބަރު" ވެއްޖެ އެވެ.