އިޓަލީގެ ޓޫރިސްޓުން ގޮވައިގެން ޑައިވިނަށް ދިޔަ ސަފާރީގެ ލައިސަންސް ސަސްޕެންޑުކޮށްފި

އިބްރާހިމް އިމާދު

16 މެއި 2026 - 11:45

0 comments

ޑޫކް އޮފް ޔޯކް. މި ސަފާރީ ބަނެފައިވަނީ 2010 ވަނަ އަހަރު.

ވ. އަތޮޅުގައި ޑައިވިންއަށް ފައިބައިގެން އުޅެނިކޮށް އެކަކު މަރުވެ، ހަތަރު މީހުން ގެއްލި ހިނގި ހާދިސާއާ ގުޅިގެން އެ މީހުން ތިބި ސަފާރީގެ އޮޕަރޭޓިން ލައިސެންސް ހިފަހައްޓައިފި އެވެ.

ޓޫރިޒަމް މިނިސްޓްރީން މީޑިއާތަކަށް ފޮނުވި މެސެޖެއްގައި ބުނީ "އެމްވީ ޑޫކް އޮފް ޔޯކް" އުޅަނދުގެ ލައިސެންސް މުއްދަތެއް ނެތް ގޮތަށް ސަސްޕެންޑްކޮށްފައިވާ ކަމަށެވެ.

އެ ފިޔަވަޅު އެޅީ ހާދިސާގެ ސީރިއަސް ކަމަށް ބަލައި، އިތުރަށް ބަލަން ޖެހޭ ކަންކަން ބެލުމަށްޓަކައި ކަމަށް ޓޫރިޒަމް މިނިސްޓްރީން މިއަދު ފޮނުވި މެސެޖުގައި ބުންޏެވެ.

އަލިމަތާ ކައިރިއަށް ޑައިވިނަށް ގޮސް އުޅެނިކޮށް ގެއްލިގެން ހޯދަނީ އިޓަލީގެ ފަސް މީހުންނެވެ. އެއީ ހަތަރު ޓޫރިސްޓުންނާއި އެ ސަފާރީގެ ޑައިވިން އިންސްޓްރަކްޓަރެވެ. އޭގެ ތެރެއިން އެކަކު މަރުވެފައި އޮއްވާ ފެނުނަސް ބާކީ ތިބި ހަތަރު މީހުން އަދި ނުފެނެ އެވެ.

އެމްއެންޑީއެފުން އެ ދުވަހު ބުނީ މިހާތަނަށް ހޯދުނު މީހާގެ ހަށިގަނޑު ފެނުނީ ގާތްގަނޑަކަށް 60 މީޓަރު (197 ފޫޓް) އަޑިން ކޭވްއެއްގެ ތެރެއިން ކަމަށެވެ. ބާކީ ތިބި ހަތަރު ޑައިވަރުން ވީކަމަށް ލަފާކުރެވެނީ، ދިގުމިނުގައި ގާތްގަނޑަކަށް 200 ފޫޓު ހުންނަ އެ ކޭވްގެ ތެރޭގައި ކަމަށް ވެސް ބުންޏެވެ.

ރާއްޖޭގައި ޑައިވްކުރަން ހުއްދަ އޮންނަ އެންމެ ފުން މިނަކީ 30 މީޓަރެވެ. ކަމާގުޅުން ހުރި އިދާރާތަކުން ދަނީ އެ އަށް ވުރެ ފުނަށް ފީނި ސަބަބު ބަލަމުންނެވެ.