ސިންގަޕޫރު ސަރުކާރުން ރާއްޖެއަށް ދެމުންގެންދާ އެހީތެރިކަމަށް ޝުކުރު!

ހުސެން ރަޝީދު

19 މެއި 2026 - 11:22

0 comments

ސިންގަޕޫރު ސަރުކާރުން ރާއްޖެއަށް މެދުނުކެނޑި ދެމުންގެންދާ އެހީތެރިކަމާއި އެއްބާރުލުމަށްޓަކައި އެ ގައުމުގެ ސަރުކާރަށް ރާއްޖެ އިން ޝުކުރު އަދާކޮށްފި އެވެ.

އިއްޔެ ވަނީ ފޮރިން މިނިސްޓަރު އިރުތިޝާމް އާދަމްްގެ އަރިހަށް ސިންގަޕޫރުން ދިވެހިރާއްޖެއަށް ކަނޑައަޅުއްވާފައި ހުންނަވާ ނޮން-ރެޒިޑެންޓް ސަފީރު ސޫ ކޮކް ލެންގ ވަދާޢީ ޒިޔާރަތެއް ކުރައްވައިފަ އެވެ.

މި ބައްދަލު ކުރެއްވުމުގައި، ހައިކޮމިޝަނަރު ލެންގްގެ ދައުރުގައި ކޮށްދެއްވި އަގުހުރި ހިދުމަތްތަކަށް މިނިސްޓަރު އިރުތިޝާމް ޝުކުރު އަދާކުރެއްވި އެވެ. އަދި ސިންގަޕޫރު ސަރުކާރުން ރާއްޖެއަށް މެދުނުކެނޑި ދެމުންގެންދާ އެހީތެރިކަމާއި އެއްބާރުލުމަށްޓަކައި އެ ގައުމުގެ ސަރުކާރަށް ޝުކުރު ދެންނެވި އެވެ.

ހައިކޮމިޝަނަރު ސޫ ކޮކް ލެންގްގެ ދައުރުގައި ދިވެހި ސަރުކާރާއި ރައްޔިތުންގެ ފަރާތުން ލިބުނު އެއްބާރުލުމާއި ބެހެއްޓެވި ގާތްކަމަށްޓަކައި އެމަނިކުފާނު ޝުކުރު އަދާކުރެއްވި އެވެ. އަދި ދެ ގައުމުގެ ދެމެދުގައި އޮތް ބަދަހި ގުޅުން އިތުރަށް ހަރުދަނާކުރުމަށް ސިންގަޕޫރުން ދޭ އަހައްމިއްޔަތުކަން އެމަނިކުފާނު ހާމަކުރެއްވި އެވެ.

މި ބައްދަލުކުރެއްވުމުގައި ސިންގަޕޫރު ސަފީރު ވަނީ، އެމަނިކުފާނުގެ ސަފީރުކަމުގެ ދައުރުގައި ދިވެހި ސަރުކާރާއި ރައްޔިތުންގެ ފަރާތުން ލިބުނު އެއްބާރުލުމާއި އެހީތެރިކަމަށް ޝުކުރު އަދާކުރައްވާފަ އެވެ. އަދި ސިންގަޕޫރުން ދިވެހިރާއްޖެއާއެކު އޮންނަ ގާތްކަމާއި، އެކުވެރިކަން ކުރިއަށް އޮތްތަނުގައިވެސް ދެމެހެއްޓުމަށް މަސައްކަތް ކުރައްވާނެ ކަމުގެ ޔަގީންކަން ދެއްވި އެވެ.