ވެނެޒުއެލާ ބިންހެލުން: މަރުވި މީހުންގެ އަދަދު 600 އަށް އަރައިފި

އިސްމާއިލް ރިޒާ

26 ޖޫން 2026 - 22:31

0 comments

ވެނެޒުއޭލާއަށް މިދިޔަ ހަފްތާގައި އައި ބާރުގަދަ ދެ ބިންހެލުމުގައި މަރުވި މީހުންގެ އަދަދު 600 އަށް އަރައިފި އެވެ.

ވެނެޒުއެލާއަށް އައި ބާރުގަދަ ދެ ބިންހެލުން ރެކޯޑު ކުރެވިފައި ވަނީ ރިކްޓަރ މިންގަނޑު 7.2 އަދި 7.5 ގައެވެ. އެ ލޮޅުންތަކުގައި ގިނަ އަދަދެއްގެ އިމާރާތްތައް ވެއްޓި، ބިނާރުތަކަށް ލިބިފައިވާ ގެއްލުންތަކުގައި 4,300 އަށްވުރެ ގިނަ މީހުން ޒަހަމުވި އެވެ. މިއީ، ފާއިތުވި ގަރުނަކަށްވުރެ ގިނަ ދުވަހުގެ ތެރޭގައި އެ ޤައުމަށް އައި އެންމެ ބާރުގަދަ ބިންހެލުންތަކެވެ.

ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުން ހޯދުމުގެ މަސައްކަތް ކަމާބެހޭ ފަރާތްތަކުން ހުއްޓުމެއްނެތި ކުރަމުންދާއިރު، އެތައް ހާސް ބަޔަކު ވީނުވީއެއް ނޭނގި ގެއްލިފައިވާތީ މަރުވި މީހުންގެ އަދަދު އިތުރުވާނެ ކަމަށް ރަސްމީ ފަރާތްތަކުން ލަފާކުރެ އެވެ.

ވެނެޒުއޭލާގެ ރެޑް ކްރޮސްގެ މައި އިމާރާތަށާއި ފަރަންސޭސި އެމްބަސީއަށް ވެސް ވަނީ ބޮޑެތި ގެއްލުންތަކެއް ލިބިފަ އެވެ. މި ކާރިސާގައި މަރުވި މީހުންގެ ތެރޭގައި ޗައިނާގެ ދެ ރައްޔިތަކު ވެސް ހިމެނޭ ކަމަށް ވެނެޒުއޭލާގައި ހުންނަ ޗައިނާ އެމްބަސީން ވަނީ ކަށަވަރުކޮށްދީފަ އެވެ.

ދުނިޔޭގެ އެކި ގައުމުތަކުން ދަނީ ވެނެޒުއޭލާއަށް ރެސްކިއު ޓީމުތަކާއި، ފައިސާ އަދި އެހީގެ ސާމާނު ފޮނުވަމުންނެވެ. އެމެރިކާ އިން ވަނީ ހަނގުރާމަމަތީ ދެ މަނަވަރާއި، މުދާ އުފުލާ ބޯޓުތަކާއި، ހެލިކޮޕްޓަރުތައް ފޮނުވުމުގެ އިތުރުން 150 މިލިއަން ޑޮލަރުގެ އެހީގެ ޕެކޭޖެއް ވެސް އިއުލާންކޮށްފަ އެވެ.

މި ބިންހެލުމުގެ ލޮޅުންތައް އަވަށްޓެރި ކޮލަމްބިއާއަށް ވެސް ކުރިމަތިވެ، ބޮގޯޓާގެ ރައްޔިތުން ރައްކާތެރިކަމުގެ ފިޔަވަޅެއްގެ ގޮތުން އިމާރާތްތަކުން ފޭބިއެވެ. މީގެ އިތުރުން ބްރެޒިލްގެ އުތުރުގެ ބައެއް ސިޓީތަކަށް ވެސް މި ބިންހެލުމުގެ ލޮޅުންތައް އިހުސާސް ކުރެވުނު ކަމަށް އެގައުމުގެ ސީޒްމިކް ނެޓްވޯކުން ރިޕޯޓްކޮށްފައިވެ އެވެ.