ޓޫރިޒަމްގެ ހިސާބުތައް ؛ ޗައިނާއިން އައި ޓޫރިސްޓުންގެ އަދަދު ދެ ލައްކައަށް

އަބްދުﷲ މައުރޫފް

03 އޯގަސްޓް 2026 - 12:21

0 comments

މި އަހަރުގެ މިހާތަނަށް ޗައިނާ އިން ރާއްޖެ އަށް ދެލައްކައަށް ވުރެ ގިނަ ޓޫރިސްޓުން އަތުވެއްޖެ އެވެ.

ޓޫރިޒަމްގެ ހިސާބުތަކަށް ބަލާއިރު، ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ. އެ ގައުމުން 220،730 ފަތުރުވެރިން އައިސްފައިވާއިރު އެއީ ޖުމްލަ ފަތުރުވެރިންގެ %17.8 އެވެ.

ދެވަނައަށް އެންމެ ގިނަ ފަތުރުވެރިން އައިސްފައި ވަނީ ރަޝިއާ އިންނެވެ. އެ ގައުމުން 182،012 ފަތުރުވެރިން އައިއިރު، އެއީ ޖުމްލަ ފަތުރުވެރިންގެ %14.7 އެވެ.

ދެން އެންމެ ގިނަ ފަތުރުވެރިން އައިސްފައިވަނީ:

އިނގިރޭސިވިލާތް - 98،692 (ޖުމްލަ ފަތުރުވެރިންގެ %7.9)
އިޓަލީ - 80،523 (ޖުމްލަ ފަތުރުވެރިންގެ %6.5)
ޖަރުމަނު - 77،455 (ޖުމްލަ ފަތުރުވެރިންގެ %6.2)

ފާހަގަކޮށްލެވޭ ގޮތުގައި، ފެބުރުވަރީ 28ގައި އެމެރިކާއިން ކުއްލި ގޮތަކަށް އީރާނަށް ދިން ހަމަލާތަކާ ގުޅިގެން މެދުއިރުމަތީގެ ދަތުރުތައް ހުއްޓުމަކަށް އައެވެ. އެއީ ރާއްޖެއަށް އަންނަ ގިނަ އަދަދެއްގެ ފަތުރުވެރިން ބޭނުންކުރާ ރޫޓެއް ކަމުން، އޭގެ ސަބަބުން ރާއްޖޭގެ ފަތުރުވެރިކަމަށް ބޮޑު ބުރުލެއް އެރިއެވެ.

އެއަށްފަހު މެދުއިރުމަތީގައި ހަމަލާތައް ބަދަލުކުރަމުން ދިޔުމުން ގިނަ އަދަދެއްގެ ފަތުރުވެރިންގެ ދަތުރުތައް ލަސްކޮށް، ކެންސަލް ވެސް ކުރިއެވެ. އަދި ހަނގުރާމަ ދެމިގެންދިޔަ ވަރަކަށް ދަތުރުފަތުރުގެ އަގު ވެސް އުފުލި، ފަތުރުވެރިކަމަށް ކުރާ ނޭދެވޭ އަސަރުތައް އިތުރުވި އެވެ.

ސަރުކާރުން މީގެ ކުރިން ބުނެފައިވަނީ އަމާޒަކީ މި އަހަރު ނިމޭއިރު ރާއްޖެއަށް ޖުމްލަ 2.5 މިލިއަން ފަތުރުވެރިން ގެނައުން ކަމަށެވެ. ނަމަވެސް މެދުއިރުމަތީގެ ހަނގުރާމައިގެ ސަބަބުން ފަތުރުވެރިކަމަށާއި ދުނިޔޭގެ ވައިގެ ދަތުރުފަތުރަށް ކުރިމަތިވި ގޮންޖެހުންތަކާ އެކު މި އަމާޒަށް ވާސިލްވެވިދާނެކަމާ މެދު އޮތީ ސުވާލު އުފެދިފަ އެވެ.

ގޮންޖެހުންތަކާ އެކު ވެސް އަމާޒަކީ ރާއްޖޭގެ ފަތުރުވެރިކަން މިދިޔަ އަހަރަށް ވުރެ ދަށް ނުވުން ކަމަށް ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވަނީ ވިދާޅުވެފަ އެވެ. މިދިޔަ އަހަރު 2.2 މިލިއަން ފަތުރުވެރިން ރާއްޖެ އައިސްފައިވެ އެވެ.