ޑިސެމްބަރުގައި ބޯހިޔާވަހިކަން ލިބޭ މީހުންގެ ލިސްޓު އާންމުކުރަނީ

ޔޫނުސް އިބްރާހިމް

23 އޯގަސްޓް 2026 - 13:12

0 comments

މި ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، މާލެ ސަރަޙައްދުން ބޯހިޔާވަހިކަމަށް އެދި ހުށަހަޅާފައިވާ ފޯމުތައް ޗެކްކުރުމުގެ މަސައްކަތް ނިންމައި، މި އަހަރުގެ ޑިސެމްބަރު މަހުގެ މެދުތެރޭގައި ދާއިމީ ލިސްޓު އިޢުލާނުކުރެވޭނެ ކަމަށް ހައުސިން މިނިސްޓްރީން ބުނެފި އެވެ.

ޕީއެސްއެމް ނިއުސްގެ 'ރާއްޖެ މިއަދު' ޕްރޮގްރާމުގައި ވާހަކަ ދައްކަވަމުން ނާޒިމް ވިދާޅުވީ މިހާރު ކުރިއަށް ދަނީ ފޯމުތަކުގައި ހިމަނާފައިވާ މައުލޫމާތު ވެރިފައި ކުރުމުގެ މަރުހަލާ ކަމަށާއި، އެކަން ކުރަނީ އެކަމަށް ހާއްސަކޮށްފަވާ ޑޭޓާބޭސް އަދި އޮންލައިން ޕޯޓަލް ކަމަށްވާ "ބޯހިޔާވަހިކަން ޕޯޓަލް" މެދުވެރިކޮށް ކަމަށެވެ.

އެޕްލިކޭޝަން ފޯމުގައި ހުރި މައުލޫމާތާއި، އިދާރާތަކުން ހޯދާ މައުލޫމާތާ ފުށުއަރާނަމަ، އެކަން ރަނގަޅު ކުރުމަށް ހަތް ދުވަހުގެ މުއްދަތެއް ދިނުމަށް މިނިސްޓްރީން ނިންމާފައިވާއިރު، ނާޒިމް ވިދާޅުވީ އެކަން ވީހާވެސް އަވަހަކަށް ފުރިހަމަ ކުރުމަށެވެ.

ނާޒިމް ވިދާޅުވީ ފްލެޓާއި ގޯއްޗަށް ހުށަހެޅުމަށް ދިން މުއްދަތުގައި ވެސް ގިނަ ބަޔަކު އެންމެ ފަހު ވަގުތާ ޖެހެންދެން މަޑުކޮށްގެން ތިބި ކަމަށާއި އޭގެ ބަދަލުގައި ދުރާލައި އެކަން އިސްލާހުކުރުމަށް މަސައްކަތް ކުރުމަކީ މުހިންމު ކަމެއް ކަމަށެވެ.

ޕޯޓަލް މެދުވެރިކޮށް މިނިސްޓްރީން ފޮނުވާ ނޯޓިހުގައިވާ މަޢުލޫމާތަކީ ޞައްޙަ ނޫން މަޢުލޫމާތެއް ކަމަށްވާ ނަމަ، އެކަމުގެ ތަފްޞީލާއި ގުޅުންހުރި ލިޔެކިޔުންތައް ހުށަހެޅުމަށް 7 ދުވަހުގެ މުއްދަތެއް މިހާރު އޮތީ ދީފަ އެވެ.

މި ސަރުކާތުގެ ބޯހިޔާވަހިކަމަށް ކުރިމަތިލުމުގެ ފުރުޞަތު ހުޅުވާލީ މިއަހަރުގެ ޖެނުއަރީ މަހުގެ 18 ގަ އެވެ. މުއްދަތު ހަމަވި އިރު ފްލެޓަށް އެދި 35،900 އަށް ވުރެ ގިނަ ފޯމު އަދި ގޯއްޗަށް އެދި 22،000 އަށް ވުރެ ގިނަ ފޯމު ހުށަހަޅާފައިވެ އެވެ.