ބޭރުގެ ކޮންޓްރެކްޓަރުންގެ ވިތުހޯލްޑިން ޓެކްސް %10އަށް ބޮޑު ކުރަން ފާސްކޮށްފި

އިސްމާއިލް ރިޒާ

23 އޯގަސްޓް 2026 - 13:49

0 comments

ރާއްޖޭގައި ހިންގާ ކޮންސްޓްރަކްޝަން މަޝްރޫއުތަކުގައި ބޭރުގެ ކޮންޓްރެކްޓަރުންނަށް ދޭ ފައިސާއިން ނަގާ ވިތުހޯލްޑިން ޓެކްސް 10 ޕަސެންޓަށް އިތުރުކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.

މިދިޔަ ހޯމަ ދުވަހު ބޭއްވި މަޖިލީހުގެ ޖަލްސާއަށް "އާމްދަނީން ޓެކްސް ނެގުމުގެ ގާނޫނު"އަށް ސަރުކާރުގެ ފަރާތުން އެ އިސްލާހު ހުށަހެޅުއްވީ މަތިވެރި ދާއިރާގެ ޕީއެންސީ މެންބަރު ހަސަން ޒަރީރެވެ. މި ބިލު ހުށަހެޅުމުގެ ބޭނުމެއްގެ ގޮތުގައި ބުނެފައި ވަނީ:

ރާއްޖޭގައި ހިންގާ ކޮންޓްެރަކްޝަން މަޝްރޫއޫތަކުގެ ކޮންޓްރެކްޓްތަކަށް ވާދަ ކުރުމުގައި ދިވެހި ވިޔަފާރިތަކާއި ވަޒަންވެރިވެފައިނުވާ ކޮންޓްރެކްޓަރުންނާ ދެމެދު ހަމަހަމަ އަދި ވާދަވެރި މާހައުލެއް ގާއިމް ކުރުން
ވަޒަންވެރިވެފައިނުވާ ކޮންޓްރެކްޓަރުންގެ ވިތުހޯލްޑިން ޓެކްސް %10އަށް ބޮޑުކޮށް، އެ އަދަދަކީ އެ ފަރާތްތަކުން ދައްކަން ޖެހޭ ޓެކުހުގެ ފުރިހަމަ އަދަދު ކަމަށް ކަނޑައެޅުމަށް

މި ބިލު ދިރާސާ ކުރި މުޅި މަޖިލީހުގެ ކޮމިޓީން ވެސް ނިންމާފައި އޮތީ، ސަރުކާރުން ހުށަހެޅި ގޮތަށް ބިލު ފާސްކުރުމަށެވެ. އަދި މިއަދުގެ މަޖިލިސް ޖަލްސާއަށް ކޮމިޓީ ރިޕޯޓު ހުށަހެޅި އެވެ.

މަޖިލީހުގެ މިއަދުގެ ޖަލްސާގައި އެ ބިލ\ުފާސްކުރީ 54 މެންބަރުންގެ ވޯޓާ އެކީގަ އެވެ.

މި ބިލު ހުށަހެޅުމުގެ މަގުޞަދަކީ، ރާއްޖޭގައި ހިންގާ ކޮންސްޓްރަކްޝަން މަޝްރޫޢުތަކުގެ ކޮންޓްރެކްޓުތަކަށް ވާދަކުރުމުގައި ދިވެހި ވިޔަފާރިތަކާއި ވަޒަންވެރިވެފައިނުވާ ކޮންޓްރެކްޓަރުންނާ ދެމެދު ހަމަހަމަ އަދި ވާދަވެރި މާހައުލެއް ގާއިމުކުރުމެވެ.