ފޯނު ކޯލު ލައިވްކުރާ ނަމަ އެކަން އަންގަން ޖެހޭނެ: މީޑިއާ ކޮމިޝަން

ޔޫނުސް އިބްރާހިމް

06 ސެޕްޓެމްބަރ 2026 - 15:12

0 comments

އެ މީހަކަށް ނޭނގި ނުވަތަ ހުއްދަ ނެތި ހޯދާފައިވާ ރެކޯޑިންތަކާއި މައުލޫމާތުތައް ބްރޯޑްކާސްޓުކުރުމުގައި ގާނޫނާއި ނޫސްވެރިން އަމަލުކުރަން ޖެހޭ ސުލޫކީ މިންގަނޑާ ހިލާފު ނުވާން މޯލްޑިވްސް މީޑިއާ އެންޑު ބްރޯޑްކާސްޓިން ކޮމިޝަން (އެމްއެމްބީސީ) އިން މިއަދު އެދިއްޖެ އެވެ.

ރާއްޖެ ޓީވީން ގެނެސްދިން ޕްރޮގްރާމުގައި ސްޓެލްކޯގެ މުވައްޒަފަށް ފުރަތަމަ ގުޅި ވަގުތު އެއީ ލައިވް ބްރޯޑްކާސްޓެއްކަން އަންގާފައެއް ނުވެ އެވެ. އަދި ޕީއެންސީ ފޯމާ ގުޅޭ މައުލޫމާތުތަކެއް ސާފުކުރުމަށްފަހު ފޯނު ކަނޑާލުމަށްފަހު، ދެވަނަ ފަހަރަށް ގުޅައި އެއީ ރާއްޖެ ޓީވީކަން ހާމަކުރުމުން ފޯނު ވަނީ ކަނޑާލާފަ އެވެ. މިކަމާ ގުޅިގެން ސްޓެލްކޯ އިން މިހާރު ވަނީ އެޗްއާރު މުވައްޒަފު ސަސްޕެންޑްކޮށް، މައްސަލަ ބަލަން ފަށައިފަ އެވެ.

އެ ކޮމިޝަނުން ބުނީ އެ މީހަކަށް ނޭނގި ނުވަތަ ހުއްދައަކާ ނުލައި ހޯދާފައިވާ ރެކޯޑިންތަކާއި މައުލޫމާތާ މެދު ހާއްސަ ސަމާލުކަމެއް ދޭންޖެހޭނެ ކަމަށެވެ.

އެ ކޮމިޝަނުން ވަނީ ވަކިވަކި ފަރުދުންގެ އަމިއްލަ ދިރިއުޅުމުގެ ސިއްރުތަކާއި ކަރާމާތް އަދި ހައްގުތައް ރައްކާތެރިކުރުމުގައި ހުރިހާ މީޑިއާއަކުން އެއްބާރުލުން ދިނުމަށް އެދިފަ އެވެ.

މީޑިއާ ކޮމިޝަނުގެ ބަޔާނުގައި އިތުރަށް ބުނެފައިވަނީ، އާންމު މަސްލަހަތު ހިމެނޭ މައުލޫމާތު ހޯދުމުގައްޔާއި، މައުލޫމާތުގެ ސައްހަކަން ކަށަވަރުކުރުމުގައި އަދި މަސްދަރުތައް ރައްކާތެރިކުރުމުގައި ގާނޫނާ އެއްގޮތަށް އަމަލުކުރަންޖެހޭ ކަމަށެވެ. އަދި އަމިއްލަ ދިރިއުޅުމުގެ ސިއްރު ހިފެހެއްޓުމާއި، އިންސާފުވެރިކަމާއެކު މުއާމަލާތްކުރުމަށް ކަނޑައަޅާފައިވާ ހަމަތަކަށް ހުރިހާ ބްރޯޑްކާސްޓަރުންނާއި ނޫސްވެރިން ތަބާވުމަށް ވެސް އެ ކޮމިޝަނުން ވަނީ ނަސޭހަތްތެރިވެފަ އެވެ.