ނޫސް މަޖައްލާތައް ރީ-ރަޖިސްޓްރީކުރަން ހަނދާންކޮށްދީފި

ޔޫނުސް އިބްރާހިމް

09 ސެޕްޓެމްބަރ 2026 - 12:34

0 comments

ނޫސް މަޖައްލާތައް ރީ-ރަޖިސްޓްރީ ކުރުމަށް ދީފައިވާ މުއްދަތު އަންނަ މަހުގެ ތެރޭގައި ހަމަވާތީ އެކަން ކުރުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ)އިން ހަނދާންކޮށްދީފި އެވެ.

އެ ކޮމިޝަނުން މި އަހަރު ވަނީ ނޫސް މަޖައްލާ ރަޖިސްޓްރީކުރުމުގެ އާ ގަވާއިދެއް ގެޒެޓްކޮށްފަ އެވެ.

މިހާރު އުވާލެވިފައިވާ ނޫސް މަޖައްލާ ފަދަ ތަކެތީގެ ގާނޫނުގެ ދަށުން ރަޖިސްޓްރީކޮށްގެން ހިންގަމުން ގެންދާ ނޫސް މަޖައްލާތައް ރަޖިސްޓްރީ ކުރުމަށް މި ގަވާއިދުގައި ދީފައިވަނީ ހަ މަސް ދުވަހެވެ.

މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން ނެރުނު ބަޔާނެއްގައި ބުނީ މިކަމަށް ދެވިފައިވާ އެންމެ ފަހު ތާރީހަކީ މި އަހަރުގެ އޮކްޓޫބަރު 27 ކަމަށާއި މި މުއްދަތު ހަމަވާއިރު ރި ރަޖިސްޓްރީކޮށް ރިކޯޑް އަދާހަމަ ނުކުރާ ނޫސް މަޖައްލާތަކުގެ ރަޖިސްޓަރީތައް ބާތިލު ކުރެވޭނެ ކަމަށެވެ.

އެހެންވެ، ކުރިއަށް މި އޮތް ދުވަސްތަކުގެ ތެރޭގައި އެކަން ކުރުމަށް އެ ކޮމިޝަނުން ވަނީ އިލްތިމާސް ކޮށްފަ އެވެ.