ޝާހިދަށް ކ.ގުރައިދޫގެ އެމްޑީޕީ މެމްބަރުންގެ ފަރާތުން ހޫނު މަރުހަބާއެއް!

ހުނައިދާ ޔާސިރު

19 ސެޕްޓެމްބަރ 2026 - 19:38

0 comments

ކުރިއަށް އޮތް ރިޔާސީ އިންތިހާބުގައި އެމްޑީޕީގެ ޓިކެޓް ހޯއްދެވުމަށް ވާދަކުރައްވާ ކުރީގެ ފޮރިން މިނިސްޓަރު އަބްދުﷲ ޝާހިދުގެ ކެމްޕޭން ބައްދަލު ވުމަކަށް މިއަދު ކ.ގުރައިދޫއަށް ވަޑައިގަތުމުން އެމަނިކުފާނަށް ހޫނު މަރުހަބާއެއް ވިދާޅުވެއްޖެ އެވެ.

ޝާހިދުގެ ކެމްޕޭންޓީމުން ބުނީ އެމަނިކުފާނު ‏ރިޔާސީ ޕްރައިމަރީގެ ކެމްޕޭނަށް ގުރައިދޫއަށް ކުރާ ދަތުރުގައި މިއަދު ހަވީރު ގުރައިދޫގެ ރައްޔިތުންނާއި ހާއްސަކޮށް ޕާޓީގެ އިސްބޭފުޅުންގެ ފަރާތުން ލިބުނު މެހެމާންދާރީއަށް ޝުކުރު އަދާ ކުރާ ކަމަށެވެ. ޝާހިދު ވަނީ މިއަދު ހަވީރު ގުރައިދޫ ބޭއްވި ހާއްސަ ސައިފޮދަށް އިންސާފު ކޮށްދެއްވާފައި އެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާނު ކުރައްވާ ޝާހިދު ކެމްޕޭން ރަސްމީކޮށް ފެއްޓެވީ އައްޑޫ ސިޓީންނެވެ. އަދި މިފަހުން ޝާހިދު ވަނީ އުތުރުގެ ސަރަހައްދުތަކުގައި ކެމްޕޭން ރަސްމީކޮށް ފެއްޓެވުމުގެ ގޮތުން ކުޅުދުއްފުއްޓަށް ވެސް ވަޑައިގެންފައި އެވެ.

ޝާހިދުގެ ކެމްޕެއިންގެ ޝިއާރަކީ "ފުދުންތެރި ދިވެހިރާއްޖެ" އެވެ. ޝާހިދު ވަނީ ހުރިހާ ކަމެއްގައި މާލެ ސިޓީއަށް ބަރޯސާނުވެ ތަރައްގީ ވެވޭނެ ގައުމެއް ގާއިމުކޮށް ދެއްވާނެ ކަމަށްވެސް ވިދާޅުވެފަ އެވެ.

އަބްދުﷲ ޝާހިދަކީ 2021 އިން 2022 އަށް އދ. ގެ އާންމު މަޖިލީހުގެ 76 ވަނަ ސެޝަނުގެ ރައީސްކަން ކުރައްވައި، އެ މަގާމަށް އިންތިޚާބުވި ފުރަތަމަ ދިވެއްސަށްވުމުގެ ޝަރަފު ހޯއްދަވާފަ އެވެ. 40 އަހަރަށްވުރެ ގިނަ ދުވަހު ދައުލަތުގެ އިސް މަގާމްތައް ފުރުއްވި ޝާހިދުވަނީ ރައްޔިތުންގެ މަޖިލީހުގެ ރައީސްކަންވެސް ކުރައްވާފައެވެ. ޝާހިދަކީ ބައިނަލްއަޤްވާމީ ޑިޕްލޮމަސީއާއި، ޑިމޮކްރެޓިކް ވެރިކަމުގެ ނިޒާމާއި، ރާއްޖޭގެ ޤާނޫނުއަސާސީ އިސްލާހުކުރުމުގެ މަސައްކަތަށް ބޮޑެތި ހިދުމަތްތަކެއް ކުރައްވާފައިވާ ބޭފުޅެކެވެ.

އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާނެކަން ރަސްމީކޮށް މިހާތަނަށް އިއުލާން ކުރެއްވީ، ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް އެވެ. ނަމަވެސް ފައްޔާޒު އަދި ރަސްމީކޮށް ކެމްޕެއިން ކުރައްވާކަށް ނުފައްޓަވަ އެވެ.

ޝާހިދާއި ފައްޔާޒުގެ އިތުރުން އަދިވެސް އެހެން ބައެއް ބޭފުޅުން އެމްޑީޕީގެ ރިޔާސީ ޓިކެޓަށް ޝައުގުވެރިކަން އެބަ އޮތެވެ. ނަމަވެސް އެ ބޭފުޅުން އަދި އެކަން ފާޅުގައި ހާމައެއްނުކުރައްވަ އެވެ.