މި ސަރުކާރު މުޅި ރާއްޖެ މާޔޫސްކޮށްފި: ޝާހިދު

އިސްމާއިލް ރިޒާ

19 ސެޕްޓެމްބަރ 2026 - 23:26

0 comments

ރައްޔިތަކު މިއަދު ބުނަނީ އެއް ވާހަކައެއް ކަމަށާއި އެއީ މި ސަރުކާރަށް ނޫނެކޭ ބުނެ ރައީސް ޑރ. މުހައްމަދު މުއިއްޒު އަށް ނޫނެކޭ ބުނުން ކަމަށް އެމްޑީޕީގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

ޝާހިދު ވިދާޅުވި މި ރާއްޖޭގެ އިސްލާހީ ހިޔާލާއި ފިކުރު ދެން ނައްތާނުލެވޭނެކަން މިހާރު މިއީ ފެންނަން އޮތް ހަގީގަތް ކަމަށެވެ. އެހެން ނަމަވެސް މިއަދު ދިމާވާ އެންމެ ހިތާމަވެރި ކަމަކީ ވަޑައިގަންނަވާ ކޮންމެ ރަށަކުން ބައްދަލުވާ ކޮންމެ ރައްޔިތެއްގެ ފަރާތުން އިވޭ މާޔޫސީ ވާހަކަ ކަމަށް ޝާހިދު ވިދާޅުވި އެވެ.

މި ސަރުކާރުގެ އަމަލުތަކުގެ ސަބަބުން ރައްޔިތުން މިއަދު މާޔޫސްވެފައިވާ ކަމަށާއި، މިވަރުން ފުދިއްޖެ ކަމަށް ނުބުނާ ރައްޔިތަކުން މިއަދު ނެތް ކަމަށް ވެސް ޝާހިދު ވިދާޅުވި އެވެ. އަދި ވިދާޅުވީ މިކަންކަން ނިމުމަކަށް ގެނެވޭނީ އެމްޑީޕީ އަށް ކަމަށެވެ.

މި ޕާޓީ އަށް އަސަރުކުރާ ފަދަ ކަންތައްތައް ކުރާނެ ކަމަށް، މި ޕާޓީ ފޮހެލާނެ ކަމަށް، ޕާޓީ ނައްތާލާނެ ކަމަށް، މި ޕާޓީ ކުރިއަށް ނުގެންދެވޭނެ ކަމަށް އަޅުގަނޑުމެންނާ ހިޔާލު ތަފާތު ފިކުރުގެ ބޭފުޅުން އެކި ގޮތްގޮތަށް އެކި ޒަމާންތަކުގައި ވިދާޅުވެ، އެކި ކަހަލަ ކަންތައްތައް ކުރައްވަމުން ގެންދެވި. އެކަން ކުރައްވަންމުން ގެންދަވާ. އެކަމަކު އެބޭފުޅުންނަށް މިހާރު އެނގެން ވެއްޖެ، ސާފުކޮށް ދެނެވަޑައިގަންނަވަން ވެއްޖެ، އެކަމެއް މި ރާއްޖެއަކު ނުވާނެކަން." ކ. ގުރައިދޫ އަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ޝާހިދު ވިދާޅުވި އެވެ.

ޝާހިދުގެ ކެމްޕެއިންގެ ޝިއާރަކީ "ފުދުންތެރި ދިވެހިރާއްޖެ" އެވެ. ޝާހިދު ވަނީ ހުރިހާ ކަމެއްގައި މާލެ ސިޓީއަށް ބަރޯސާނުވެ ތަރައްގީ ވެވޭނެ ގައުމެއް ގާއިމުކޮށް ދެއްވާނެ ކަމަށްވެސް ވިދާޅުވެފަ އެވެ.

އަބްދުﷲ ޝާހިދަކީ 2021 އިން 2022 އަށް އދ. ގެ އާންމު މަޖިލީހުގެ 76 ވަނަ ސެޝަނުގެ ރައީސްކަން ކުރައްވައި، އެ މަގާމަށް އިންތިޚާބުވި ފުރަތަމަ ދިވެއްސަށްވުމުގެ ޝަރަފު ހޯއްދަވާފަ އެވެ. 40 އަހަރަށްވުރެ ގިނަ ދުވަހު ދައުލަތުގެ އިސް މަގާމްތައް ފުރުއްވި ޝާހިދުވަނީ ރައްޔިތުންގެ މަޖިލީހުގެ ރައީސްކަންވެސް ކުރައްވާފައެވެ. ޝާހިދަކީ ބައިނަލްއަޤްވާމީ ޑިޕްލޮމަސީއާއި، ޑިމޮކްރެޓިކް ވެރިކަމުގެ ނިޒާމާއި، ރާއްޖޭގެ ޤާނޫނުއަސާސީ އިސްލާހުކުރުމުގެ މަސައްކަތަށް ބޮޑެތި ހިދުމަތްތަކެއް ކުރައްވާފައިވާ ބޭފުޅެކެވެ.