އީގަލް ހިލްސްގެ މަޝްރޫއު؛ ޖަވާބު ބޭނުން ސުވާލުތަކެއް!

އަބްދުﷲ މައުރޫފް

26 ސެޕްޓެމްބަރ 2026 - 08:58

0 comments

ރައީސް ޑރ. މުއިއްޒާއި ހައުސިން މިނިސްޓަރު ރަސްމާލެ މަޝްރޫއުގެ މަސައްކަތް ހިނގާގޮތް ބައްލަވަނީ

ރާއްޖޭގެ ތާރީހުގައި ވެސް ހިންގާ އެންމެ ބިޔަ، ބޭރުގެ އިންވެސްޓްމަންޓް - އީގަލް ހިލްސްގެ މަޝްރޫއުގެ ދަށުން ވޯޓަފްރޮންޓް އެންޑް މެރީނާއެއް ތަރައްގީކޮށް ޒަމާނީ ވަސީލަތްތައް ހިމެނޭ ގޮތަށް ސިޓީއެއް ތަރައްގީކުރަން އީގަލް ހިލްސްއަށް ރަސްމާލޭން 500 ހެކްޓަރުގެ ބިން 99 އަހަރަށް ދޭން ސަރުކާރުން ވަނީ ނިންމައިފަ އެވެ.

މިކަމުގެ ކަންބޮޑުވުން ފާޅުކޮށް ރާއްޖެއަށް ފުރާ ދާއިރާއެއްގައި މުދާ އެތެރެކުރާ ވާހިދު ޖެނެރަލް ޓްރޭޑިންގެ ސީއީއޯ އަދި މެނޭޖިން ޑައިރެކްޓަރު ނަސްރުﷲ އަބްދުލް ވާހިދު އޭނާގެ ފޭސްބުކް އެކައުންޓުން ކުރި ޕޯސްޓެއްގައި ވަނީ އީގަލް ހިލްސްގެ މަޝްރޫއުގެ ތެރެއިން ފެށިފައިވާ "ބަހުސް" ގެ ތެރެއަށް މުހިންމު ސުވާލުތަކެއް ދޫކޮށްލައިފަ އެވެ.

އެއީ:

1- ރަސްމާލެ އަކީ ގައުމު ދަރަނި ނުދެއްކޭ ހާލުގަ އޮއްވާ ކުންފުނި ތަކުގެ ތިޖޫރީން ހިއްކި ބިމެކެވެ. 5000 ހައުސިން ޔުނިޓް އަށް 99 އަހަރަށް ވިއްކާލި ކޮން އިގްތިސާދީ ހިސާބެއް ޖަހާފައި ހެއްޔެވެ.؟

2- ވަޒީފާގެ އާބާދީ ނެތި 54000 ވަޒީފާ އަށް އަނެއް ކާވެސް ކާރި ގައުމުތަކުގެ މީހުން ނަށް ދިނުމުން ގައުމަށް ވާނީ ކޮން ފައިދާއެއް ހެއްޔެވެ؟

3- ރާއްޖޭގެ އެނދުގެ ތިންބައި ކުޅަ އެއްބައި ނުފުރި ހުންނަ އިރު ރިސޯޓް ތަކުގެ އިންވެސްޓްމަންޓް ތިންބައިކުޅަ އެއްބައި އެސެޓް ބޭކާރުވެގެން ދާއިރު އަދިވެސް އިންވެސްޓް ކުރަންވީ ޓޫރިޒަމަށް ހެއްޔެވެ؟

4- ދަރަނިން އުފައްދައިފައިވާ ބޮޑު 2 އެއާޕޯޓް ގައުމުގެ ދެކޮޅުގައި އޮތް އިރު އަދިވެސް ޓޫރިޒަމް އުފައްދަންވީ ހުޅުލޭ ވަށައިގެން ހެއްޔެވެ؟

5- ޓެކްސް އަށް ނެގި ފައިސާ އަށް ވާގޮތެއް ވީގޮތެއް ނޭގޭ އިރު އިންތި ހާޔަށް ދަރަނި އުފައްދާ ދަރަނި ގެ އަނދަވަޅަކަށް ވައްޓާލާ ހުރިހާ ސިޔާސީން ނާއި މިނިވަން މުއައްސަސާތަކުގެވެރިން ރިޓަޔަރ މަންޓް އަށްއަހަރަކު 3 ބިލިއަން ރުފިޔާ ނަގަނީ ކިއްވެ ހެއްޔެވެ؟

ޔޫރަޕްގެ ގައުމުތަކުގެ ތަޖުރިބާއަށް ބަލާއިރު، ދެފުށް ފެންނަ (transparent) އުސޫލެއް ނެތި، އަދި ރައްޔިތުންގެ މަޖިލީހާއި މިނިވަން މުއައްސަސާތަކުގެ ސީދާ ބައިވެރިވުމެއްނެތި އީގަލް ހިލްސް ފަދަ ކުންފުނިތަކާއެކު ހަދާ ބޮޑެތި އެއްބަސްވުންތަކަކީ ދިވެހިރައްޔިތުންނަށް ރައްކާތެރި ކަމެއް ނޫނެވެ. މިއީ ދައުލަތުގެ މިނިވަންކަމާއި އިގްތިސާދީ ސިޔާދަތަށް ނުރައްކާތެރި އަނދަވަޅަކަށް ވައްޓާލުން ކަމުގައި ބުނެވިދާނެބާ އެވެ. މިކަމުގެ ކަންބޮޑުވުން ގާނޫނީ ފަންނުގެ ބޭފުޅުން މިހާރު ވެސް އެއަންނަނީ ފާޅުކުރަމުން ނެވެ.

މަޝްރޫއުގެ މުހިންމު ތަފްސީލުތައް:

ތަރައްގީކުރާ ތަން: ވެރިރަށް މާލެއިން ފުރައިގެން ލޯންޗުގައި ގާތްގަނޑަކަށް 17 މިނެޓުން ދެވޭ ފުށިދިއްގަރު ފަޅުގައި ހިއްކަމުންދާ "ރަސްމާލެ" ސިޓީގައެވެ.
ހިމެނޭ ބައިތައް: ބައިނަލްއަގުވާމީ ފެންވަރުގެ ހޮޓާތަކާއި ރިސޯޓުތައް، ޕްރީމިއަމް އަދި ބްރޭންޑެޑް ރެޒިޑެންސްތައް، ދުނިޔޭގެ ފެންވަރުގެ މެރީނާއެއް، ވޯޓާފްރަންޓް ޕްރޮމެނާޑްތައް، ރެސްޓޯރެންޓްތަކާއި ފިހާރަތައް، އަދި މުނިފޫހިފިލުވުމާއި ދުޅަހެޔޮކަމުގެ މަރުކަޒުތައް (ވެލްނެސް ސެންޓަރުތައް).
އިންވެސްޓްމަންޓް: އެކި ފިޔަވަހިތަކަށް ބަހާލައިގެން ކުރިއަށްގެންދާ މި މަޝްރޫއުގެ ޖުމްލަ އިންވެސްޓްމަންޓް 20 ބިލިއަން ޑޮލަރަށް އަރާނެ ކަމަށް އަންދާޒާކުރެވެއެވެ.
އިގްތިސާދީ ފައިދާ: މި މަޝްރޫއުގެ ދަށުން ރާއްޖެއަށް 30 ބިލިއަން ޑޮލަރަށް ވުރެ ގިނަ ބޭރުގެ އިންވެސްޓްމަންޓް ލިބޭނެ ކަމަށް ބެލެވޭއިރު، އޭގެ ތެރޭގައި 18 ބިލިއަން ޑޮލަރުގެ ނެޓް އިންވެސްޓްމަންޓް ހިމެނެއެވެ. އަދި ސީދާ އަދި ނުސީދާ ގޮތުން 54،000 އަށް ވުރެ ގިނަ ވަޒީފާ އުފެދިގެންދާނެއެވެ.

އެނގިފައިވާ ގޮތުގައި، މި މަޝްރޫއު ހިންގަނީ ރަސްމާލޭން މިހާރު ހިއްކާފައިވާ 500 ހެކްޓަރުގެ ސަރަހައްދުގަ އެވެ. ނަމަވެސް، މިކަމުގެ ސަބަބުން ކުރިން އިއުލާން ކޮށްފައިވާ ގޮތަށް ދިވެހި ރައްޔިތުންނަށް ގޯއްޗާއި ފްލެޓު ދިނުމަށް ކަނޑައަޅާފައިވާ އަދަދުތަކަށް އެއްވެސް ބަދަލެއް ނާންނާނެ ކަމަށް ހައުސިން މިނިސްޓްރީން ބުންޏެވެ.

މި މަޝްރޫއުގެ އަމަލީ މަސައްކަތް ފެށޭނެ ވަކި ތާރީހެއް އަދި ސަރުކާރުން ހާމައެއް ނުވެ އެވެ.