ރަސްމާލޭގެ ބައެއް ވިއްކާލަނީ ލާރި ގޯނީގެ ބޭނުމުގައި: ޔާމިން

ރަސްމާލޭގެ ބައެއް ވިއްކާލަނީ "ލާރި ގޯނީ"ގެ ބޭނުމުގައި: ޔާމިން

28 ސެޕްޓެމްބަރ 2026 - 10:41

0 comments

ޕީއެންްއެފްގެ ރައީސް އަދި ކުރީގެ ރައީސް ޔާމީން

ރަސްމާލެ ތަރައްގީކުރުމުގެ ނަމުގައި ދިވެހި ރައްޔިތުންނަށް ބޯހިޔާވަހިކަމުގެ ދަޅަ ދެއްކުމަށް ފަހު، އެ މަޝްރޫއުގެ ބޮޑު ބައެއް ބޭރުގެ ކުންފުންޏަކަށް ވިއްކާލަނީ "ލާރި ގޯނީ"ގެ ބޭނުމުގައި ކަމަށް ކުރީގެ ރައީސް އަބްދުﷲ ޔާމީން ތުހުމަތުކުރައްވައިފި އެވެ.

ރަސްމާލޭގެ ބޮޑު ބައެއް އީގަލް ހިލްސްއަށް ދީގެން ތަރައްގީކުރާ މަޝްރޫއަކީ ރާއްޖޭގެ ބިން ބޭރުގެ ބަޔަކަށް ވިއްކާލުން ކަމުގެ ކަންބޮޑުވުންތައް ބައެއް ފަރާތްތަކުން ދަނީ ފާޅުކުރަމުންނެވެ. މި އެއްބަސްވުން ސަރުކާރުން ހާމަކޮށްފައިނުވާއިރު، ސަރުކާރުން ބުނަނީ ބިން ދިނީ އެއްވެސް ބަޔަކަށް މިލުކުކުރެވޭ ގޮތަށް ނޫން ކަމަށާއި ދިނީ ކުއްޔަށް ކަމަށެވެ.

ޕީއެންއެފްއިން މިފަހުން ބޭއްވި ޖަލްސާގައި ޔާމީން ވިދާޅުވީ، ސަރުކާރުގެ އެންމެ ބޮޑު މަޝްރޫއުގެ ގޮތުގައި ފެނިގެންދިޔައީ ރަސްމާލެ ހިއްކުމުގެ ވާހަކަ ކަމަށާއި، ނަމަވެސް މިއަދު އެކަންވެސް ވާކަށް ނެތް ކަމަށެވެ.

"ރަސްމާލޭގެ އެއްބައި ދުބާއީގެ ކުންފުންޏަކަށް ވިއްކާލަން އުޅޭ ވާހަކަ މި އަޑުއިވެނީ. އެކަމަކު އެއީ ދިވެހިރައްޔިތުންގެ ބޯހިޔާވަހިކަމުގެ ދަޅަ ދައްކައިގެން ކުރި ކަމެއް އެނގޭތޯ،" ޔާމީން ވިދާޅުވި އެވެ.

"ހަމަ ލާރި ގޯނި، ލާރިކޮޅު ބޭނުންވެގެން. އެ ނޫން އެއްވެސް ކަމެއް ނޫން."

ލާރި ގޯނި ނުވަތަ ލާރިކޮޅު، މާނަ އެ ކުރެއްވީ، ރަސްމާލެ ވިއްކާލައިގެން ދައުލަތަށް ލިބޭ ފައިސާއަށް ކަމެއް ނުވަތަ، އެ މުއާމަލާތުން ސަރުކާރުގެ ވެރިންނަށް ލިބިދާނެ ނާޖާއިޒު މާލީ މަންފާއަށް ކަމެއް ސާފުކޮށް ވިދާޅެއް ނުވެ އެވެ.

ރާއްޖޭގެ އެންމެ ބޮޑު އެއް ކުންފުނި އެމްއޭސީއެލްގެ ފައިސާއިން ހިއްކަމުން އަންނަ ރަސްމާލޭގެ ގާތްގަނޑަކަށް 500 ހެކްޓަރުގެ ބިން ޔޫއޭއީގެ އީގަލް ހިލްސްއަށް، 99 އަހަރަށް، އެ ދޫކޮށްލީ، އެޑްވާންސަށް އެންމެ ލާރި ފޮއްޗެއް ވެސް ނުލިބި އެވެ. މިއީ ހުޅުމާލޭގެ ދެ ފޭސްގެ ބިމަށް ވުރެ ވެސް ބޮޑު ސަރަހައްދެކެެވެ.

މި މަޝްވަރާތަކުގައި ރަސްމާލޭގެ ޓޫރިޒަމް ޒޯނުގެ ގޮތުގައި ކަނޑައަޅާފައިވާ ސަރަހައްދެއް އެމާރަށް ދޫކުރުމުގެ ބަދަލުގައި، ސޯޝަލް ހައުސިން ޔުނިޓުތައް އެޅުންފަދަ ކަންކަން ހިމަނައިގެން އެއްބަސްވުމަކަށް އައުމަށް މަސައްކަތްކުރަމުންދާއިރު، މިކަމާ ގުޅޭގޮތުން މަޝްވަރާކުރުމަށް ސަރުކާރުގެ ޓީމެއް ދުބާއީއަށް ދިއުމަށްވެސް ވަނީ ހަމަޖެހިފަ އެވެ.

މި ސަރުކާރުން އީގަލް ހިލްސްއާ އެކު ހެދި އެއްބަސްވުމުގެ ދަށުން މަޝްރޫއުގެ އަމަލީ މަސައްކަތް ފެށުމުގެ ކުރިން ވެސް އެޑްވާންސްކޮށް 5،000 ހައުސިން ޔުނިޓް (ގާތްގަނޑަކަށް 500 މިލިއަން ޑޮލަރު ނުވަތަ 7.7 ބިލިއަން ރުފިޔާ) ދައުލަތަށް ލިބެ އެވެ.

މި މަޝްރޫއުގެ ޕްރޮޕަޓީތައް ވިއްކައިގެން ލިބޭ ހުރިހާ ފައިސާއެއް ޖަމާވާނީ ސަރުކާރުގެ ކޮންޓްރޯލް އޮންނަ، ރާއްޖޭގައި ހުންނަ އެސްކްރޯ އެކައުންޓަކަށް ކަމަށާއި ރާއްޖެއަށް ދިމާވެފައިވާ ޑޮލަރުގެ ދަތިކަމަށް މީގެ ސަބަބުން ބޮޑު ހައްލެއް ލިބި، ރަސްމީ ރިޒާވް ވަރުގަދަ ކުރުމަށް މަރުކަޒީ ބޭންކަށް ވަރަށް ބޮޑު ފަސޭހައެއް ލިބިގެންދާނެކަމަށް ސަރުކާރުން ބުނެފައިވެ އެވެ.

އަދި މި އެއްބަސްވުމުގައި އެސްއީޒެޑް ގާނޫނުގެ ދަށުން ނުވަތަ ޓޫރިޒަމް ގާނޫނުގެ ދަށުން ދޭ އެއްވެސް ޑިއުޓީ އިނާޔަތެއް ނުވަތަ ޓެކްސް ލުޔެއް ދީފައި ނުވާނެ ކަމަށާއި، މިއީ ދައުލަތަށް ލިބެންޖެހޭ ޓީޖީއެސްޓީ އާއި އެހެނިހެން ޓެކްސްތައް ފުރިހަމައަށް ލިބޭނެ ގޮތަށް ނިންމާފައިވާ މުހިންމު ނިންމުމެއް ކަމަށް ވެސް ބުންޏެވެ.

ޕީއެސްއެމްގެ "ނިއުސް ޗެޓް" ޕްރޮގްރާމްގައި ރައީސް މުއިއްޒު ވިދާޅުވީ އީގަލް ހިލްސްގެ މަޝްރޫއުގެ ސަބަބުން ރާއްޖޭގެ ޖީޑީޕީ އެހެން ލެވެލަކަށް ގެންގޮސް، ވަޒީފާތައް ވެސް އުފެދިގެންދާނެ ކަމަށެވެ. އަދި އެ މަޝްރޫއުއަކީ ރަސްމާލެއަށް ބޭނުންވާ ގިނަ ކަންކަން ހާސިލުކުރަން ހިންގާ މަޝްރޫއުއެއް ކަން ފާހަގަކުރެއްވި އެވެ.

ރައީސް ވިދާޅުވީ ދިވެހިންނަށް އެހާ ބޮޑު މަންފާތަކެއް ލިބެން އޮއްވާ އެ މަޝްރޫއުއަށް ހުރަސްއަޅަން ބައެއް ފަރާތްތަކުން ވާހަކަ ދެއްކުމަކީ ކަންބޮޑުވެ ވަޑައިގަންނަވާ ކަމެއް ކަމަށާއި ނަމަވެސް، އުއްމީދަކީ މަޝްރޫއުއަށް އެއްވެސް ހުރަހެއް ކުރިމަތި ނުވުން ކަމަށް ވެސް އެމަނިކުފާނު ވިދާޅުވި އެވެ