ޗައިނާއާ ދެމެދު ގާއިމުކޮށްފައިވާ މިނިވަން ވިޔަފާރީގެ އެއްބަސްވުމަކީ ލިބުނު ކާމިޔާބީއެއް: ރައީސް

ޔޫނުސް އިބްރާހިމް

28 އޮކްޓޫބަރ 2026 - 11:33

0 comments

ރާއްޖެއާއި ޗައިނާއާ ދެމެދު ގާއިމުކޮށްފައިވާ މިނިވަން ވިޔަފާރީގެ އެއްބަސްވުމަކީ (އެފްޓީއޭ) އިޤްތިސާދީ ގުޅުމުގައި ލިބުނު ވަރަށް ބޮޑު ކާމިޔާބީއެއް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ޗައިނާ-މޯލްޑިވްސް އިންވެސްޓުމެންޓު ކޯޕަރޭޝަން ފޯރަމް އިފްތިތާހު ކުރުމަށް މިއަދު ބާސެލޯ ނަސަންދުރާ ހޮޓަލުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ގައުމީ ތަރައްގީގެ އާ ތަސައްވުރަކަށް ރާއްޖެ ދަތުރު ކުރަމުން އަންނައިރު، އެކަން ހާސިލްކުރުމަށް އިގްތިސޯދު ޑައިވަސިފައިކޮށް އިންވެސްޓަރުންނާ އެކު ގުޅުން ގާއިމުކުރަން ޖެހޭ ކަމަށެވެ.

ދިވެހި އުފެއްދުންތަކާއި މަހުގެ ބާވަތްތަކަށް ޗައިނާގެ މާކެޓުގައި ފުރުސަތު އޮތްކަން ފާހަގަކުރައްވައި، ދިވެހި ވިޔަފާރިތަކާ ގުޅިގެން މަސައްކަތްކުރުމަށް ޗައިނާގެ އިންވެސްޓަރުންނަށް ރައީސް ގޮވާލެއްވިއެވެ.

"އަޅުގަނޑުމެން ބޭނުންވަނީ ދިވެހި ވިޔަފާރިތައް ހަމައެކަނި ބައިނަލްއަޤްވާމީ މާކެޓުގައި ބައިވެރިވުމެއް ނޫން. ބޭނުންވަނީ އެ މާކެޓުގައި ވާދަކޮށް ކާމިޔާބު ބަޔަކަށްވާން. މި ކަމުގައި ޗައިނާއަށް މުހިންމު ބައިވެރިއެއް،" ރައީސް ވިދާޅުވި އެވެ.

ރައީސް ވިދާޅުވީ:

މިދިޔަ އަހަރުގެ ޖެނުއަރީން މިދިޔަ އޮގަސްޓުގެ ނިޔަލަށް ޗައިނާ އިން ރާއްޖެއަށް 440 ޑޮލަރުގެ މުދާ އެތެރެކުރި
އޭގެ ހަތަރު ބައިކުޅަ އެއްބައި ނުވަތަ 124 މިލިއަން ޑޮލަރަކީ ދެ ގައުމުގެ ދެމެދު އޮތް މިނިވަން ވިޔަފާރީގެ އެއްބަސްވުމުގެ ދަށުން އެތެރެކުރި މުދާ

ރައީސް ފާހަގަކުރެއްވި ގޮތުގައި، ހަމައެކަނި ވިޔަފާރި ކުރާ މުދަލުގެ އަގުގެ ބަދަލުގައި ދެ ގައުމުގެ ދެމެދު އޮންނަ އިގްތިސޯދީ ގުޅުން މިހާރަށް ވުރެ ވެސް ފުޅާ ކުރެވިދާނެ އެވެ. ރާއްޖޭގެ އެކި ސަރަހައްދުތަކަށް ޗައިނާގެ ވިޔަފާރިވެރިންގެ ސަޕްލައިޗެއިންތައް ފުޅާކޮށް، ދިވެހި އުފެއްދުންތެރިންނަށް އިތުރު ފުރުސަތުތައް ފަހިކުރެވިދާނެކަން އެ މަނިކުފާނު ފާހަގަކުރެއްވި އެވެ.

މީގެ އިތުރުން، ރައީސް ވިދާޅުވީ ޗައިނާގެ އަލިޕޭ އާއި ވީޗެޓް ރާއްޖޭގައި ތައާރަފުކުރި ފަހުން މިދިޔަ ޖެނުއަރީން ފެށިގެން ސެޕްޓެމްބަރާ ހަމައަށް 73،000 މުއާމަލާތްކޮށްފައިވާ ކަމަށާއި އޭގެ އަގަކީ 11 މިލިއަން ޑޮލަރު ކަމަށެވެ

މީގެ އިތުރުން، ސަރުކާރުގެ "މޯލްޑިވްސް 2.0" ތަސައްވުރުގެ ދަށުން ޑިޖިޓަލް އިގްތިޞާދެއް ބިނާކުރުމަށް ކުރެވެމުންދާ މަސައްކަތްތަކަށްވެސް ރައީސް އަލިއަޅުއްވާލެއްވި އެވެ. ވީޗެޓްޕޭ އަދި އަލިޕޭ ފަދަ ޕްލެޓްފޯމްތައް މެދުވެރިކޮށް ފަތުރުވެރިންނަށް ފަސޭހައިން ހަރަދުކުރެވޭނެ މަގުފަހިވުމަކީ ވިޔަފާރިތައް ފުޅާކުރުމަށް ލިބޭ ފުރުސަތެއްކަން އެމަނިކުފާނު ފާހަގަކުރެއްވި އެވެ. އަދި ޑިޖިޓަލް ޓްރާންސްފޯމޭޝަނަކީ ޒުވާނުންނަށް ފުރުސަތުތައް ފަހިކޮށްދީ، ޖިއޯގްރަފީގޮތުން ރާއްޖެއަށް ހުރި ގޮންޖެހުންތަކުން އަރައިގަތުމަށް ލިބޭ ވަރަށް ބޮޑު ބާރެއް ކަމުގައި ވިދާޅުވި އެވެ.