އެއްބަސްވުން ބާތިލުކޮށް، ރިވެލި ރެސްޓޯރެންޓު ހިންގާ ބިން އެޗްޑީސީއިން ނަގައިފި

ހުނައިދާ ޔާސިރު

03 ނޮވެމްބަރ 2026 - 00:37

0 comments

ހުޅުމާލޭގެ ރުއްގަނޑު 1 ސަރަހައްދުގައި ހިންގާ ރިހިވެލި ރެސްޓޯރަންޓް:

ކުލި ނުދެއްކުމުގެ ސަބަބުން ވިޔަފާރީގެ އެއްބަސްވުން ބާތިލުކޮށް ހުޅުމާލޭގައި ހިންގަމުން އަންނަ ރިވެލި ރެސްޓޯރެންޓު ހިންގާ ބިން ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އަށް ނަގައިފިއެވެ.

އެޗްޑީސީން ނެރުނު ބަޔާނެއްގައި ބުނީ، ސޮލާރިސް ހޮސްޕިޓަލިޓީ ޕްރައިވެޓް ލިމިޓެޑާ އެކު ހަދާފައިވާ ވިޔަފާރީގެ އެއްބަސްވުން މިއަދުން ފެށިގެން ނިމުމަކަށް ގެނެސް އެ ބިން އެޗްޑީސީގެ ބެލުމުގެ ދަށަށް ގެނެސްފައިވާ ކަމަށެވެ.

"ވީމާ މިއަދުން ފެށިގެން މި ބިން ނަގަން ނިންމާފައިވުމާ ގުޅިގެން ސޮލާރިސް ހޮސްޕިޓަލިޓީ ޕްރައިވެޓް ލިމިޓެޑަށް ހުޅުމާލޭގެ ލޮޓް ނަމްބަރު 10877 ގައި އެއްވެސް ބާވަތެއްގެ ވިޔަފާރީގެ މުއާމަލާތެއް އަދި ހިދުމަތެއް ވެސް ނުދެވޭނެކަން ދަންނަވަމެވެ،" ބަޔާނުގައި ވެ އެވެ.

އެޗްޑީސީން ނެރުނު ބަޔާނުގައި ބުނީ، ރިވެލި ރެސްޓޯރަންޓް ހިންގާ ކުންފުންޏާ އެކު ވެފައިވާ އެއްބަސްވުން ބާތިލްކުރީ ކުލި ނުދައްކާ ގިނަ ދުވަސްތަކެއް ވެފައި ވާތީ، އެ އެެއްބަސްވުމުގެ ދަށުން ދޭންޖެހޭ ހުރިހާ ނޯޓިސްތަކާއި ގިނަ ފުރުސަތުތަކެއް ދީ، އެއްބަސްވުމުގެ އިޖުރާއަތުގެ ތެރޭގައި ކަމަށެވެ.

"މި ކޯޕަރޭޝަނުން މިފަދަ ނިންމެއް ނިންމަނީ އާންމުންނަށް ހިދުމަތް ދޭން ހުޅުމާލޭގައި ގާއިމްކޮށްފައިވާ ވިޔަފާރިތަކަށް ދެވެން އޮތް އެންމެ ފުޅާ ދާއިރާއެއްގައި ފުރުސަތު ދިނުމަށް ފަހުގައި ކަމުގެ ޔަގީންކަން ވެސް އަރުވަމެވެ،" އެޗްޑީސީން ބުންޏެވެ.

"މި ކޯޕަރޭޝަންގެ އަމާޒަކީ ހުޅުމާލޭގައި ވިޔަފާރި ކުރާ ފަރާތްތަކަށް ވީހާ ވެސް ފަހި ފުރުސަތުތަކެއް އަބަދުވެސް ފަހިކޮށްދިނުމެވެ."

ހުޅުމާލޭ ރުއްގަނޑު އެކެއް ސަރަހައްދުގައި ހުންނަ ރިވެލި ބީޗް ކުލަބް އެންޑް ރެސްޓޯރެންޓަކީ އަތިރިމަތީގައި މޫދުގެ ހިތްގައިމު މަންޒަރުތައް ފެންނަން ހުންނަ އާންމުންގެ މެދުގައި މަގުބޫލު ރެސްޓޯރެންޓެކެވެ. އިންޑޯ އަދި އައުޓްދޯގައި ތިބެވޭ ގޮތަށް ފަރުމާކޮށްފައިވާ އެ ރެސްޓޯރެންޓަކީ ރޮމޭންޓިކް ޑިނާތަކުގެ އިތުރުން ކައިވެނީގެ ހަފުލާތަކަށްވެސް ދޫކުރާ ތަނެކެވެ.