6 ގަޑިއިރުން ގާނޫނުއަސާސީ ބަދަލުކޮށް ފާސްކޮށްފި

ހަސަން ހަލީމް

20 ނޮވެމްބަރ 2024 - 18:06

0 comments

މަޖިލީހުގެ ތަޅުމުގައި މެންބަރުން އިހުތިޖާޖު ކުރަނީ--

ޕާޓީ ބަދަލު ކުރުމުންނާއި ޕާޓީން ވަކި ކުރުމުން މަޖިލިސް ގޮނޑި ގެއްލޭ ގޮތަށް ގާނޫނުއަސާސީއަށް ގެންނަން ހުށަހަޅާފައިވާ އިސްލާހު ރައްޔިތުންގެ މަޖިލީހުން ފާސްކޮށްފި އެވެ.

ސަރުކާރުގެ ފަރާތުން ހުޅުދޫ ދާއިރާގެ ޕީއެންސީގެ މެންބަރު މުހައްމަދު ޝާހިދު ގާނޫނުއަސާސީ އަށް ހުށަހެޅުއްވި އެ އިސްލާހުގެ ފުރަތަމަ ކިޔުން މަޖިލީހުގައި އިއްވީ މިއަދެވެ. އެ ބިލްގެ ބަހުސް ފަށައި ގަޑިއެއްހާއިރު ތެރޭގައި ބަހުސްކޮށް ނިންމާލައި މުޅި މަޖިލީހުގެ ކޮމިޓީ އަށް ފޮނުވި އެވެ.

އެ ބިލަށް އެމްޑީޕީން ކަންބޮޑުވުން ފާޅުކޮށް އަދި ޕީއެންސީގެ ބައެއް މެންބަރުން ވެސް ހިޔާލު ތަފާތުވެފައިވީ ނަމަވެސް ކޮމިޓީ މަރުހަލާ ވެސް ވަރަށް އަވަހަށް ނިންމާލުމަށް ފަހު، އެންޓި ޑިފެކްޝަނާ ގުޅޭ މާއްދާތަކަށް އެއްވެސް ބަދަލެއް ނުގެނެސް ފާސްކުރި އެވެ.

ކޮމިޓީން ފާސްކޮށް ތަޅުމަށް ފޮނުވި ރިޕޯޓު ފާސްކުރުމަށް ނެގި ވޯޓުން ފާސްވީ، ބައިވެރިވި މެންބަރުންގެ ތެރެއިން 78 މެންބަރުންގެ ވޯޓުންނެވެ. އެ ބިލާ ދެކޮޅަށް ވޯޓު ދެއްވީ 13 މެންބަރުންނެވެ. އެއީ އެމްޑީޕީއަށް ނިސްބަތްވާ މެންބަރުންނާއި އައްޑޫ މީދޫ ދާއިރާގެ އަމިއްލަ މެންބަރު އަބްދުއްރަހުމާން އެވެ.

ގާނޫނު އަސާސީ ބަދަލުކުރުމަށް ބޭނުންވަނީ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިން ބައެވެ. އެއީ 70 މެންބަރުންނެވެ.

ބިލުގެ މަސައްކަތް މިއަދު ފަށައި މިއަދު ފާސް ކުރުމުގެ މަސައްކަތް ކުރާތީ އިދިކޮޅު އެމްޑީޕީގެ ސަޕޯޓަރުން ވަނީ މަޖިލިސް ދޮރުމަތީގައި އިހުތިޖާޖު ކޮށްފަ އެވެ.

މި އިސްލާހަށް ހިޔާލު ހުށަހެޅުމުގެ ފުރުސަތެއް ދިނުމަށް ބާ ކައުންސިލުން ވެސް މިއަދު އެދުނެވެ. ނަމަވެސް ސަރުކާރުން ބޭނުންވި ގޮތަށް މަޖިލީހުގެ ރިޔާސަތުން ކަންކުރީ "އަވަސް ސްޕީޑް" ގައި އެވެ.