ކެނެޑާއިން ވެސް ރާއްޖެއަށް ވެކްސިން ފޯރުކޮށްދެނީ

އިސްމާއިލް ރިޒާ

05 ޖޫން 2021 - 07:33

0 comments

ކޮވިޑް-19 އާ ދެކޮޅަށް ގައުމުތަކުން ކުރާ މަސައްކަތްތަކަށް އެހީވުމަށް ޑަބްލިއުއެޗްއޯގެ ކޮވެކްސް ފެސިލިޓީ އަށް ކެނެޑާ އިން ހަދިޔާކުރި ފައިސާ އިން ރާއްޖެ އަށް ވެސް އެހީ ލިބޭނެ ކަމަށް، ކެނެޑާ އިން ރާއްޖެ އާއި ސްރީ ލަންކާ އަށް ކަނޑައަޅުއްވައިފައި ހުންނަވާ ސަފީރު ޑޭވިޑް މެކިނޮން މިއަދު ވިދާޅުވެއްޖެ އެވެ.

ޑޭވިޑް މެކިނޮން ވިދާޅުވީ ކެނެޑާ އިން ކުދި އަދި ތަރައްގީވަމުން އަންނަ ގައުމުތަކަށް ފަސޭހައިން ވެކްސިން ފޯރުކޮށްދިނުމަށް ކޮވެކްސް އިން ކުރަމުން އަންނަ މަސައްކަތަށް އެހީވުމުގެ ގޮތުން އިއްޔެ 220 މިލިއަން ކެނޭޑިއަން ޑޮލަރު ހަދިޔާކޮށްފައިވާ ކަމަށެވެ.

މެކިނޮންގެ ޓުވީޓުގައި ވިދާޅުވެފައި ވަނީ ކެނެޑާއިން ފޯރުކޮށްދިން އެހީއިން ރާއްޖެއަށާއި ސްރީލަންކާއަށް ވެކްސިން ލިބޭނެކަމަށާއި އަދި އެކަމަށްޓަކައި އުފާކުރައްވާ ކަމަށެވެ.

ކޮވިޑް-19 އިން އަރައިގަތުމަށް ރާއްޖެ އަށް ބޭރުގެ އެކި ގައުމުތަކުގެ އެހީ އަންނަނީ ލިބެމުންނެވެ. އެގޮތުން އެމެރިކާ އިން ވަނީ ކޮވެކްސްގެ ދަށުން އެ ގައުމުން ކޮވިޑް ވެކްސިން ފޮނުވާ ފުރަތަމަ ގައުމުތަކުގެ ތެރޭގައި ރާއްޖެ ހިމަނައިފަ އެވެ.

ކޯވެކްސް ފެސިލިޓީއަކީ އަވަސް ގޮތެއްގައި ކޮވިޑް-19 ވެކްސިން ދުނިޔޭގެ ހުރިހާ ކަންކޮޅުތަކެއްގެ ހުރިހާ ގައުމަކަށް އެއް ހަމައެއްގައި ފޯރުކޮށްދީ، ކޮވިޑް-19 އާއި ގުޅޭ އެހެން ސިއްހީ ސާމާނުވެސް ފޯރުކޮށްދިނުމަށް ގަވީ ވެކްސިން އެލަޔެންސްގެ ދަށުން އުފެއްދި ޕްރޮގްރާމެކެވެ.

ކޯވެކްސްގެ ދަށުން މިހާތަނަށް 80 މިލިއަނަށްވުރެ ގިނަ ކޮވިޑް-19 ވެކްސިން 129 ގައުމަކަށް ފޮނުވާފައިވެ އެވެ. މީގެ ތެރެއިން ރާއްޖެއަށް މިހާތަނަށް ކޮވިޝީލްޑް ވެކްސިންގެ 12،000 ޑޯޒްގެ ވަނީ ފޯރުކޮށްދީފަ އެވެ.

ކޯވެކްސްގެ މައިގަނޑު އަމާޒަކީ ދުނިޔޭގެ ފަގީރު ގައުމުތައް އަދި ކުރިއަރަމުން އަންނަ ގައުމުތަކަށްވެސް މުއްސަނދި ބޮޑެތި ގައުމުތަކާއި އެއްވަރަކަށް ވެކްސިން ލިބުމުގައި އެހީތެރިވެދީ އެ މަސައްކަތަށް ފުޅާކުރުމެވެ.

ރާއްޖޭގައި ފުރަތަމަ ޖެހީ ކޮވިޝީލްޑް ވެކްސިންނެވެ. ދެވަނަ ޑޯޒް ދެނީ ކޮވިޝީލްޑް ޖެހި މީހުންނަށެވެ. އޭގެ ފަހުން މިހާރު ޖަހަމުން ދަނީ ޗައިނާގެ ސިނަފޯމް ވެކްސިނެވެ. ސިނަފޯމްގެ ދެވަނަ ޑޯޒް ފުރަތަމަ ޑޯޒް ޖަހާތާ ހަތަރު ހަފްތާ ފަހުން ދޭނެ އެވެ.