ސްޓެޓިސްޓިކަލް ކައުންސިލަށް ކުރިމަތިލާން ހުޅުވާލައިފި

މަރިޔަމް އަނާ

22 އޯގަސްޓް 2021 - 12:40

0 comments

މޯލްޑިވްސް ބިއުރޯ އޮފް ސްޓެޓިސްޓިކްސްގެ މަސައްކަތްތައް ކުރުމަށާއި ތަފާސްހިސާބާ ގުޅޭ ސިޔާސަތުތައް އެކުލަވާލުމަށް އަދި ތަފާސްހިސާބުގެ ގައުމީ ނިޒާމު ކުރިއެރުވުމަށް ލަފާދޭން އުފައްދަން ޖެހޭ، ސްޓެޓިސްޓިކަލް ކައުންސިލުގެ މެމްބަރުކަމަށް ކުރިމަތިލާން ހުޅުވާލައިިފި އެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް އިން، ކައުންސިލަށް ކުރިމަތިލާން ހުޅުވާލީ މިދިޔަ ބުރާސްފަތި ދުވަހު އެވެ. އަންމަ މަހުގެ ނުވަވަނަ ދުވަހު ފުރުސަތު ބަންދު ކުރާނެ އެވެ. އަންނަ މަހުގެ 18 އިގެ ކުރިން ސްޓެޓިސްޓިކަލް ކައުންސިލަށް ޕްރައިވެޓް ސެކްޓާ އަދި ސިވިލް ސޮސައިޓީ ތަމްސީލު ކުރާނެ ހަތަރު މެމްބަރެއް އައްޔަން ކުރަން ޖެހޭ ކަމަށް އެ ބިއުރޯއިން ކުރި އިއުލާނުގައި ބުނެފައި ވެއެވެ.

ކައުންސިލަށް އައްޔަންކުރާ މެމްބަރުންގެ ހުންނަން ޖެހޭ ޝަރުތަތަކުގެ ތެރޭގައި މުސްލިމަކަށް ވުމާއި ދިވެއްސަކަށް ވުމާއި ބުއްދި ސަލާމަތުން ހުރުމާއި އުމުރުން 25 އަހަރު ފުރިފައިވުމާއި އަދި އިސްލާމްދީނުގައި ހައްދެއް ކަނޑައެޅިފައިވާ ކުށެއް، ހިޔާނާތުގެ ކުށެއް، ރިޝްވަތުގެ ކުށެއް ކުރިކަން ޝަރީއަތަށް ސާބިތުވެފައިވާ ނުވުން ހިމެނެ އެވެ.

އަދި ދައުލަތަށް ދައްކަންޖެހޭ ފައިސާއެއް އޮވެ، އެ ނުދައްކާ ހުރި މީހަކަށް ނުވުމާއި ޖިނާއީ ކުށެއް ސާބިތުވެ ހުކުމް ތަންފީޒުކުރާ މީހަކަށް ނުވުމާއި އިންތިހާބުކޮށްފައިވާ މަގާމެއްގައި ހުންނަ މީހަކަށް ނުވުމާއި ސިޔާސީ މަގާމެއް ހުރި މީހަކަށް ނުވުމާއި ސިޔާސީ ޕާޓީއެއްގެ މެމްބަރަކަށް ނުވުމަކީ ވެސް ޝަރުތެކެވެ. ސަރުކާރު ނުވަތަ އަމިއްލަ ކުންފުންޏެއް ހިންގުމުގައި އިސްކޮށް އުޅޭ މީހަކަށް ވެސް ވެގެނެއް ނުވެއެވެ.

ތަފާސްހިސާބުގެ ގާނޫނުގައި ބުނާ ގޮތުން ސްޓެޓިސްޓިކަލް ކައުންސިލަށް މެންބަރުން އައްޔަންކުރަން ވާނީ ތަފާސްހިސާބު، އިކޮނޮމިކްސް، ޑެމޮގްރަފީ، ސޯޝަލް ސައިންސް، އެންވަޔަރަމަންޓަލް ސްޓަޑީސް، ޑޭޓާ ސައިންސް އަދި އެކައުންޓިން ފަދަ ރޮނގަކުން ޑިގްރީއެއް ނުވަތަ އެއާ އެއް ފެންވަރުގެ ސަނަދެއް ހާސިލުކޮށް، ހިންގުމުގެ ތަޖުރިބާ ލިބިފައިވާ މީހަކަށް ވެސް ވާން ޖެހެ އެވެ. އަދި އެ ބިއުރޯއިން އެކުލަވާލައި އާންމުކުރާ ތަފާސްހިސާބު ބޭނުންކުރާ މީހަކަށް ވެސް ވާން ޖެހެ އެވެ.

މި ކައުންސިލްގެ މެމްބަރު ކަމަށް ޝައުގުވެރިވާ މީހުން އަންނަ މަހު 9 ގެ ކުރިން ފޯމު ހުށަހަޅަން ޖެހެ އެވެ.

ގާނޫނުގައިވާ ގޮތަށް އެ ބިއުރޯ އަށް ޗީފް ސްޓެޓިސްޓީޝަނަކު ވެސް މިހާރު ވަނީ އައްޔަންކޮށްފަ އެވެ. އެ މަގާމަށް އައްޔަންކުރެއްވީ ތަފާސްހިސާބުގެ ދާއިރާގައި މަސައްކަތް ކުރައްވާ ބޭފުޅެއް ކަމަށްވާ އައިޝަތު ހަސަން އެވެ.

ޗީފް ސްޓެޓިސްޓީޝަން އައްޔަން ކޮށްފި

ތަފާސްހިސާބުގެ ގާނޫނުގައި ރާއްޖޭގައި ތަފާސްހިސާބާ ބެހޭ ގައުމީ ނިޒާމެއް ގާއިމުކޮށް، ރަސްމީ ތަފާސްހިސާބު އެއްކުރުމާއި އެއްކުރެވޭ މައުލޫމާތުގެ ނަތީޖާ ހޯދުމާއި އާންމުކުރުމާއި އަދި ބޭނުންކުރުމުގެ އިތުރުން އަމަލުކުރަންޖެހޭ އުސޫލުތައް ބަޔާންކޮށްފައިވެ އެވެ.

މި ގާނޫނުގެ މައިގަނޑު މަގުސަދަކީ ރާއްޖޭގެ ތަފާސްހިސާބުގެ ދާއިރާ ތަރައްގީ ކުރުމާއި ގައުމުގެ އިގުތިސާދީ އިޖްތިމާއީ އަދި ތިމާވެށީގެ ހާލަތު އަންގައިދޭ މުހިންމު ތަފާސްހިސާބު ގައުމީ ފެންވަރުގައި އެއްކޮށް، ރާއްޖޭގެ އެންމެހައި ރައްޔިތުންނަށް އިތުބާރުހުރި ގޮތެއްގައި، އެއްހަމައެއްގައި ފޯރުކޮށްދިން ކަމަށް ބުނެފައިވެ އެވެ.