ނެދަލޭންޑްސްގައި ޤުރުއާނަށް ފުރައްސާރަކޮށް ހިންގި އަމަލު ކުށްވެރިކޮށްފި

އިސްމާއިލް ރިޒާ

26 ސެޕްޓެމްބަރ 2023 - 14:07

0 comments

ފޮރިން މިނިސްޓްރީ

ނެދަލޭންޑްސްގެ ދަ ހޭގްގައި ހުރި އިސްލާމީ ބައެއް ޤައުމުތަކުގެ އެމްބަސީ ކުރިމަތީގައި ކީރިތި ޤުރުއާނަށް ފުރައްސާރަކޮށް ހިންގި ޢަމަލުތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.

ފޮރިން މިނިސްޓްރީން ނެރެފައިވާ ބަޔާނެއްގައި ބުނެފައިވަނީ ގުރުއާން އެންދުމަކީ ހިޔާލުފާޅުކުރުމުގެ ހައްގުގެ ތެރޭގައި ހިމެނޭ ކަމެއް ނޫން ކަމަށެވެ. އެހެންވެ މިފަދަ އަމަލުތައް ހުއްޓުވުމަށް ގާނޫނުތަކާއި ސިޔާސަތުތައް އެކުވާލައި ގައުމީ ފެންވަރުގައި ތަންފީޒުކުރަން ފެށުމަށް އެދިފައިވެ އެވެ.

މި ބަޔާނުގައި ވަނީ ދުނިޔޭގެ އެކި ތަންތަނުގައި މުސްލިމުންނާމެދު ނަފުރަތު އުފައްދައި ހަމަނުޖެހުން ހިންގުމުގެ އަމަލުތައް އިތުރުވަމުން ދިއުމަކީ ދިވެހި ސަރުކާރުން އިންތިހާއަށް ކަންބޮޑުވާ ކަމެއްކަން ފާހަގަކުރައްވާފައެވެ. އަދި ދީނީ ގޮތުން ރުޅިވެރިކަން އުފެއްދުމަށް ގޮވައިލުމާއި ބޭއިންސާފާއި ހަމަނުޖެހުން އުފައްދަން މަސައްކަތް ކުރުން ހުއްޓުވަން ގާނޫނުތައް ހަދައި ސިޔާސަތުތައް ކަނޑައަޅައި ގާނޫނު ތަންފީޒުކުރާނެ އުސޫލުތައް އެކުލަވައިލަން ޖެހޭކަމަށްވެސް ރާއްޖޭގެ ބަޔާނުގައި ވިދާޅުވިއެވެ.