އަންހެނުންގެ ދުވަސް: ހަމަހަމަކަމާއި ރައްކާތެރިކަމެއް ނެތް

ޢަބްދުﷲ ޖުނައިދު

08 މާޗް 2024 - 18:10

0 comments

ރޭ 12 ޖެހީއްސުރެ ދުނިޔޭގެ އެކި ކަންކޮޅުތަކުގައި ތިބި ވަރަށް ގިނަ އަންހެނުންގެ ފޯނުތަކަށް މަރުހަބާއާއި ޝުކުރު އަދާކުރުމުގެ މެސެޖުތައް އައިސް އެއަޑު ބައެއް ކަންކޮޅުތަކުގައި އުފުލިގެންދާއިރު، ދުނިޔޭގެ އެތައް މިލިއަން އަންހެނުންނަށް ކުރިމަތިވެފައިވާ ވަރުގަދަ ހަގީގަތްތަކާ މެދު ވިސްނުމަކީ މިއަދު، އާދެ ބައިނަލް އަޤްވާމީ އަންހެނުންގެ ދުވަހުގައި ކޮންމެހެން ކުރަންޖެހޭ ކަމެކެވެ. ހުޅަނގުގެ ހަލަބޮލި މަގުތަކުން ފެށިގެން ރާއްޖޭގެ ހަމަޖެހޭ ޖަޒީރާތަކާ ހަމައަށް، ނިޒާމީ އަނިޔާވެރިކަމާއި، ގެދޮރު ދޫކޮށް ދިއުމުގެ މައްސަލަތަކާ ކުރިމަތިލާން ޖެހިފައިވާ އަންހެނުން އެބަތިއްބެވެ.

ޖެންޑަރ އިކުއަލިޓީ އިންޑެކުސްގައި ރާއްޖެ 0.348 ގައި 2021 ވަނަ އަހަރު ރެކޯޑުކުރެވިފައިވާއިރު، ޔޫއެންޑީޕީގެ ހިސާބުތަކުން ދައްކަނީ، މަތީ ތަޢުލީމު ހާސިލްކޮށް ގްރެޖުއޭޓްވި ދިވެހި އަންހެނުންގެ ނިސްބަތަކީ %37 އެވެ. މީގެ އިތުރަށް:

ލޭބަރ ފޯސްގައި ބައިވެރިވުމުގެ ނިސްބަތް (2019): %45.6 އަންހެނުން އަދި %77.1 ފިރިހެނުން އަދި ނުރަސްމީ ވަޒީފާގައި %44 އަންހެނުން 8 ގަޑިއިރަށްވުރެ ގިނައިރު ހޭދަކުރާކަމަށެވެ. ހަމައެހެންމެ އަންހެނުންނަށް މިރާއްޖޭގައި ކުރާ އަނިޔާއާ ގުޅޭގޮތުން 2020 ވަނަ އަހަރު ރިޕޯޓްކޮށްފައިވަނީ ޖިސްމާނީ އަނިޔާގެ 179 މައްސަލައެއް ޕޮލިހަށް ހިށަހެޅިފައިވާ ކަމަށެވެ. ޖިންސީ އަނިޔާގެ 36 މައްސަލައާއި ނަފްސާނީ އަނިޔާގެ 92 މައްސަލަ ހިމެނޭކަމަށްވެސް ޔޫއެންވެ ތަފާސް ހިސާބުތަކުންދައްކާތީ ހިތާމަ ހުއްޓެވެ.

ބައިނަލް އަޤްވާމީ އަންހެނުންގެ ދުވަސް މިއަދު ފާހަގަކުރާއިރު، ދުނިޔޭގެ ހުރިހާ ބައްރެއްގައިވެސް "ވޭންދެނިވި" ހަާލަތުގައި ގިނަ އަންހެނުންތަކެއް އެބަތިއްބެވެ.

ދުނިޔޭގެ އަންހެނުން ތަހައްމަލުކުރަމުންދާ އަނިޔާވެރި ހާލަތު :

1. ރެފިއުޖީންގެ ދަތިކަން:

ދުނިޔޭގެ އެކި ކަންކޮޅުތަކުގައި އަންހެނުންނަށް އިންތިހާއަށް ދަތިތަކެއް ކުރިމަތިވެފައިވާއިރު،ފަލަސްތީނު އަންހެނުން އެދަނީ ކާނެއެއްޗެއް ނުލިބި ބަނޑަށް މަރުވަމުންނެވެ. ގިނަ ބަޔަކަށް ކުރިމަތިވެފައިވަނީ ގެދޮރު ދޫކޮށް ދިއުމާއި ގެދޮރު ނެތުމުގެ ބުރަ އެވެ. ފަލަސްތީނާއި ސީރިއާފަދަ މެދުއިރުމަތީ ހަނގުރާމަވެރި ސަރަހައްދުތަކުން ފެށިގެން އެފްރިކާގެ ނިކަމެތި މުޖުތަމައުތަކާ ހަމައަށް އަންހެނުން އުފުލަނީ ކަތިލުމާއި ގުނަވަންތައް ބުރިކޮށް ލޭއޮހޮރުވުމާއި ހަނގުރާމައިގެ ލާއިންސާނީ އަނިޔާއެވެ. ހަމަނުޖެހުންތަކާއި ގުދުރަތީ ކާރިސާތަކުގެ ބުރަ އެވެ. އޭޝިއާގައި އަފްޣާނިސްތާނާއި މިޔަންމާ ފަދަ ގައުމުތަކުގެ ރެފިއުޖީ އަންހެނުންގެ ހާލަތުން އިންސާނީ އެހީތެރިކަމާއި ރައްކާތެރިކަމުގެ ބޭނުންޖެހިފައިވާ އަމްހެނުންގެ ބޮޑު އިންސައްތައެއް އެބަތިބިކަން ހާމަވެގެންދެއެވެ. ހަމައެފަދައިން ޔޫރަޕްގައި ވެސް ސީރިއާ އާއި ޔޫކްރޭން ފަދަ ގައުމުތަކުގައި އަނިޔާވެރިކަމާއި ބިރުވެރިކަމަށް ކެތްނުކުރެވިގެން ފިލައިގެން އުޅޭ އަންހެނުން އެހާ ގިނައެވެ. އެމެރިކާގައި ވެސް ގޭންގް ވައިލެންސް އާއި ތިމާވެށީގެ ކާރިސާތައް ފަދަ ކަންކަމުގެ ސަބަބުން ގެދޮރު ގެއްލިފައިވާ ގިނަ އަދަދެއްގެ އަންހެނުން ފެންނައިރު، ވަކިން ހާއްސަކޮށް ވެނެޒުއެލާ އާއި ހެއިޓީ ފަދަ ގައުމުތައް ހިމެނެއެވެ. ހުރިހާ ބައްރެއްގައި ވެސް ގެދޮރު ގެއްލިފައިވާ އަދި ގެދޮރު ނެތް އަންހެނުންގެ ހިތާމަވެރިކަން ވެރިވެފައިވާއިރު، އެމީހުންގެ ތަކުލީފުގެ އަސްލު ސަބަބުތައް ހައްލުކުރުމަށް ދުނިޔޭގެ ގައުމުތަކުގެ އެއްބައިވަންތަ ފިޔަވަޅުތަކެއް އެޅުމުގެ މުހިއުކަން ހާމަވެއެވެ.

2. ގެވެށި އަނިޔާ:

ގެވެށި އަނިޔާއަކީ ނުހުއްޓުނު ފުޅާވަމުންދާ މައްސަލައެކެވެ. ހޭލުންތެރިކަން އިތުރުކޮށް ގާނޫނުތައް ތަންފީޒު ކުރުމަށް މަސައްކަތް ކުރި ނަމަވެސް، މުޖުތަމައުގެ ފާޑުކިޔުމާއި ބަދަލު ހިފުމުގެ ބިރުގެ ސަބަބުން އަދިވެސް ގިނަ އަންހެނުން ހިމޭންކަމާއެކު ތަކުލީފު އުފުލަ އެވެ.

އޭޝިއަން ޑިވެލޮޕެމެންޓު ބޭންކުން ބުނެފައިވާ ގޮތުގައި ރާއްޖެއަކީ އިޤްތިޞާދީ ކުރިއެރުންތަކެއް ލިބިފައިވާ ޤައުމެކެވެ. ނަމަވެސް ޖެންޑަރ އިކުއަލިޓީއާއި އަންހެނުން ބާރުވެރިކުރުވުމާއި، ވަޒީފާގެ ހިއްސާ މަދުވުމާއި، ސިޔާސީ ތަރައްޤީއާއި ނިންމުންތައް ނިންމުމުގައި ބައިވެރިވުން މަދުވުމުގައި ގޮންޖެހުންތައް އެބަހުއްޓެވެ.

3. އިޤްތިޞާދީ ނުތަނަވަސްކަން:

އޭޝިއާގައި އަންހެނުންނަށް ހަމަހަމަ އިގްތިސާދީ ފުރުސަތުތައް ހޯދުމުގައި ހުރަސްތަކެއް ކުރިމަތިވަމުންދެ އެވެ. އިންޑިއާ އާއި ޕާކިސްތާން ފަދަ ގައުމުތަކުގައި ޖެންޑަރ ވޭޖް ގެޕެއް ދެމިއޮތްއިރު، ގިނަ ފަހަރަށް އަންހެނުން ރެލިގޭޓް ކުރެވެނީ ކުރިއެރުމެއް ނުލިބޭނެ ޖާގަ ކުޑަ ވަޒީފާތަކަކަށެވެ.

4. ސިޔާސީ ގޮތުން ތަމްސީލު ނުކުރުން:

ލެޓިން އެމެރިކާގައި ޖެންޑަރ އިކުއަލިޓީގައި ކުރިއެރުންތަކެއް ލިބުނު ނަމަވެސް، ސިޔާސީ ލީޑަޝިޕްގެ މަގާމުތަކުގައި އަންހެނުންގެ ތަމްސީލު މަދުވެފައިވެ އެވެ. ބްރެޒިލް އާއި މެކްސިކޯ ފަދަ ގައުމުތަކުގައި އަންހެނުންނަށް އުނދަގޫވަނީ "ބިއްލޫރި ސީލިންގް ފަޅާލައި"، ނިންމުންތައް ނިންމުމުގެ މަރުހަލާތަކުގައި އަޑު އިއްވުމަށެވެ.

ފިޔަވަޅު އެޅުމަށް ގޮވާލުން:

ދުނިޔޭގެ އަންހެނުންގެ ދުވަސް ފާހަގަކުރާއިރު، ސަރުކާރުތަކާއި، މަދަނީ ޖަމިއްޔާތަކާއި، ފަރުދުން ވެސް ޖެންޑަރ އިކުއަލިޓީއަށް ކުރާ ވައުދު އާކުރުމަކީ ކޮންމެހެން ކުރަންޖެހޭ ކަމެކެވެ.

މީގެ ތެރޭގައި ހިމެނެނީ؛

- އަނިޔާވެރިކަމާއި ތަފާތުކުރުންތަކުން އަންހެނުން ރައްކާތެރިކުރުމަށް ޤާނޫނީ އޮނިގަނޑުތައް ހަރުދަނާކުރުން.

- އަންހެނުންނަށް ތަޢުލީމާއި އިޤްތިޞާދީ ބާރުވެރިކުރުމުގެ ޕްރޮގްރާމްތަކަށް އިންވެސްޓްކުރުން.

- މުޖުތަމަޢުގެ ހުރިހާ ދާއިރާއެއްގައި އަންހެނުންގެ ބައިވެރިވުމާއި ލީޑަރޝިޕް ކުރިއެރުވުން.

- ބިރުވެރިކަމާއި އަނިޔާވެރިކަމުން މިނިވަންވެ، ހުރިހާ އަންހެނުންނަށް ކުރިއަރާނެ ދުނިޔެއެއް އަޅުގަނޑުމެންނަށް ހަގީގަތުގައި އުފެއްދެވޭނީ، އެއްބައިވަންތަ މަސައްކަތްތަކެއްގެ ތެރެއިންނެވެ.

ބިރުވެރިކަމާއި އަނިޔާވެރިކަމުން މިނިވަންވެ، ހުރިހާ އަންހެނުންނަށް ކުރިއަރާނެ ރާއްޖެއެށް، ދުނިޔެއެށް އަދި އަޅުގަނޑުމެންނަށް ހަގީގަތުގައި އުފެއްދެވޭނީ، އެއްބައިވަންތަ މަސައްކަތްތަކެއްގެ ތެރެއިންނެވެ. އެކުގައި ކޮންމެ އަންހެނެއްގެ ގާބިލްކަން ހަގީގަތަކަށް ހަދައި، އެއަންހެނުންގެ ހައްގުތަކަށް އިހުތިރާމް ކުރެވޭ މުސްތަގުބަލެއް ބިނާކުރަމާ ހިނގާށެވެ.