މިދިޔަ މަހު މީރާ އަށް 2.3 ބިލިއަން ރުފިޔާ ބަލައިގެންފި

މަރިޔަމް އަނާ

13 މާޗް 2024 - 17:39

0 comments

ދައުލަތުގެ ޓެކްސް އިދާރާ - ފޮޓޯ: މީރާ

މިދިޔަ ފެބްރުއަރީ މަހު ދައުލަތަށް ލިބުނު އާމްދަނީގެ ގޮތުގައި މީރާއަށް 2.3 ބިލިއަން ރުފިޔާ މީރާއަށް ބަލައިގެންފައިވާކަމަށް އެ އޮތޯރިޓީން ބުނެފި އެވެ.

ދައުލަތުގެ ޓެކްސް އިދާރާއިން ބުނީ މިދިޔަ މަހު ލިބުނު އަދަދަކީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއަށް ވުރެ 33.7 ޕަސެންޓް އިތުރު އަދަދެކެވެ. އަދި، ފެބުރުވަރީ 2024 ގައި ލިބޭނެ ކަމަށް އަންދާޒާކޮށްފައިވާ އަދަދަށް ވުރެ 22.3 ޕަސެންޓް ގިނަ އަދަދެއް ކަމަށް ވެސް ބުނެފައިވެ އެވެ.

މީރާއިން ބުނިގޮތުގައި މިދިޔަ މަހު ލިބުނު އާމްދަނީއާ އަޅާބަލާއިރު ފެބުރުވަރީ 2024 ގައި ލިބިފައިވާ އާމްދަނީ އިތުރުވުމުގެ މައިގަނޑު ސަބަބަކީ، ޖީއެސްޓީ، ބޭންކް ޕްރޮފިޓް ޓެކްސް އަދި އެކްސްޕަޓްރިއޭޓް ކޯޓާ ފީގެ ގޮތުގައި ލިބިފައިވާ އާމްދަނީ އިތުރުވުމެވެ. މި ގޮތުން، ޖެނުއަރީ 2023 އާ އަޅާބަލާއިރު ޖެނުއަރީ 2024 ގައި ރާއްޖެއަށް ޒިޔާރަތްކުރި ޓޫރިސްޓުންގެ އަދަދު 11.5 ޕަސެންޓް އިތުރުވުމުގެ ސަބަބުން، މިދިޔަ މަހު ޓީޖީއެސްޓީގެ ގޮތުގައި ދެއްކި އާމްދަނީ ފެބުރުވަރީ 2023 އާ އަޅާބަލާއިރު އިތުރުވެފައިވާ ކަމަށް މީރާއިން ބުނެ އެވެ.

މީގެ އިތުރުން އެކްސްޕަޓްރިއޭޓް ކޯޓާ ފީ އިން އާމްދަނީ ނަގަން ފަށައިފައި ވަނީ 2023 ވަނަ އަހަރުގެ މާޗު މަހުން ފެށިގެން ކަމަށްވާތީ، އެ އަހަރުގެ ފެބުރުއަރީ މަހު މި އާމްދަނީ ބަލައިގަނެފައި ނުވާތީ އަދި މިދިޔަ މަހު މި އާމްދަނީ ބަލައިގަނެފައި ވާތީ، މިދިޔަ އަހަރާއި އަޅައިބަލާއިރު ޖުމްލަކޮށް ލިބިފައިވާ އާމްދަނީ ވަނީ އިތުރުވެފައި ކަމަށް މީރާ އިން ބުނެ އެވެ.

" ހަމައެއާއެކު، ބޭންކް އިންކަމް ޓެކްސް ދައްކަންޖެހޭ ސުންގަޑިއަށް ދައްކައިފައިނުވާ ބައެއް ފައިސާ، މި މުއްދަތުގެ ތެރޭގައި ލިބިފައިވާތީ، ފެބުރުވަރީ މަހު ލިބިފައިވާ އާމްދަނީ އިތުރުވެފައިވޭ،" އެ އިދާރާއިން ބުންޏެވެ.

މީރާއިން ބުނިގޮތުގައި މިދިޔަ މަހު ލިބޭނެކަމަށް އަންދާޒާކޮށްފައިވާ އަދަދަށް ވުރެ އާމްދަނީ އިތުރުވުމުގެ މައިގަނޑު ސަބަބަކީ، ޖީއެސްޓީގެ ގޮތުގައި ލިބިފައިވާ އާމްދަނީ އިތުރުވުން އަދި ބޭންކް އިންކަމް ޓެކްސް އާއި ޓޫރިޒަމް ލޭންޑް ރެންޓް ދައްކަންޖެހޭ ސުންގަޑިއަށް ދައްކައިފައި ނުވާ ބައެއް ފައިސާ މި މުއްދަތުގެ ތެރޭގައި ލިބިފައިވުމެވެ. މީގެ އިތުރުން، ޖެނެއަރީ 2024 ގައި ރާއްޖެއަށް ޓޫރިސްޓުން ޒިޔާރަތްކުރާނެ ކަމަށް އަންދާޒާކޮށްފައިވާ އަދަދަށް ވުރެ ހަތަރު ޕަސެންޓް އިތުރުވުމުގެ ސަބަބުން، މިދިޔަ މަހު ލިބޭނެ ކަމަށް އަންދާޒާކޮށްފައިވާ އަދަދަށް ވުރެ ލިބިފައިވާ އާމްދަނީ އިތުރުވެފައިވާ ކަމަށް މީރާއިން ބުނެ އެވެ.

ފެބްރުއަރީ މަހު މީރާއަށް ބަލައިގަތް އާމްދަނީގެ އެންމެބޮޑު ބައެއް ހިއްސާކުރަނީ ޖީއެސްޓީއެވެ. އެއީ އާމްދަނީގެ 70.1 އިންސައްތަ ނުވަތަ 1.63 ބިލިއަން ރުފިޔާއެވެ. ދެން އެންމެ ބޮޑު އާމްދަނީއެއް ލިބިފައިވަނީ އާމްދަނީން ނަގާ ޓެކުހުންނެވެ. އެއީ 10.6 އިންސައްތަ ނުވަތަ 246.36 މިލިއަން ރުފިޔާ އެވެ. މީގެއިތުރުން ގްރީން ޓެކްސްގެ ގޮތުގައި 102.85 މިލިއަން ރުފިޔާ، އެއާޕޯޓް ޑިވެލޮޕްމަންޓް ފީގެ ގޮތުގައި 91.08 މިލިއަން ރުފިޔާ، ޑިޕާޗަރ ޓެކްސްގެ ގޮތުގައި 89.48 މިލިއަން ރުފިޔާ އަދި އެހެނިހެން ޓެކުހާއި ފީގެ ގޮތުގައި 168.78 މިލިއަން ރުފިޔާ މީރާއިން ބަލައިގެންފައިވެ އެވެ.

ފެބްރުއަރީ ގައި ބަލައިގެންފައިވާ އާމްދަނީގެ ތެރޭގައި 100.34 މިލިއަން އެމެރިކާ ޑޮލަރު ވެސް ހިމެނޭކަމަށް މީރާއިން މައުލޫމާތުދެ އެވެ.