ރާއްޖޭގައި އައިވީއެފް ހަދައިގެން ފުރަތަމަ ފަހަރަށް ދަރިފުޅަކު ލިބިއްޖެ

މަރިޔަމް އަނާ

15 މެއި 2024 - 12:08

0 comments

ރާއްޖޭގައި އައިވީއެފް ހަދައިގެން ފުރަތަމަ ފަހަރަށް ދަރިފުޅަކު ލިބިއްޖެ އެވެ. ރާއްޖޭގައި އައިވީއެފް ހެދުމުގެ ހިދުމަތް މިވަގުތު ދެނީ ހަމައެކަނި ޓްރީ ޓޮޕް ހޮސްޕިޓަލް ގައެވެ.

އެ ހޮސްޕިޓަލުގައި މިއަދު ބޭއްވި ޕްރެސް ކޮންފަރެންސްގައި، އެ ހޮސްޕިޓަލްގެ ސީއޯއޯ އާދިލް މޫސާ ވިދާޅުވީ މިދިޔަ އާދިއްތަ ދުވަހު އެންމެ ފުރަތަމަ ވިހެއީ މީގެ ކުރިން ރާއްޖެ އިން ބޭރުން ހަތަރު ފަހަރަށް އައިވީއެފް ހެދި މީހެއް ކަމަށެވެ. އެ ދެމައިންގެ ހާލު ރަނގަޅު ކަމަށް ހޮސްޕިޓަލުން ބުންޏެވެ.

އައިވީއެފްގެ ދެ ވަނަ ދަރިފުޅު އިއްޔެ ވިހާފައިވަނީ 33 އަހަރުގެ މީހެކެވެ. މިއީ، ޓްރީޓޮޕް ހޮސްޕިޓަލުން ބުނިގޮތުގައި، އެ ހޮސްޕިޓަލް އަދި ރާއްޖޭގެ ސިއްހީ ދާއިރާއަށް ލިބުނު ވަރަށް ބޮޑު ކާމިޔާބީއެކެވެ.

އާދިލް ވިދާޅުވީ އައިވީއެފް ހަދައިގެން ވިހެއި އެ ދެކުދިންނާއި މަންމަމެންގެ ހާލު ވެސް ރަނގަޅު ކަމަށެވެ. އަދި އައިވީއެފް ހަދައިގެން ބަލިވެ އިން މީހުންގެ ތެރޭގައި ރާއްޖޭން ބޭރުން އެތައް ފަހަރަކު އައިވީއެފް އާއި އައިޔޫއައި ހަދައި ކާމިޔާބުނުވެ ތިބި މީހުން ތިބި ކަމަށް ވެސް އާދިލް ފާހަގަ ކުރެއްވި އެވެ.

ޓްރީ ޓޮޕް ހޮސްޕިޓަލްގައި ރަސްމީކޮށް އައިވީއެފްގެ ހިދުމަތް ދޭން ފެށީ މެއި 29، 2023 ގައެވެ.

ޓްރީ ޓޮޕް ހޮސްޕިޓަލްގައި ފުރަތަމަ ބެޗުގައި 16 މީހުން އައިވީއެފް ހެދއިރު އެމްބްރިޔޮ ޓްރާންސްފާ ހެދި 10 މީހުންގެ ތެރެއިން ހަ މީހުން ބަނޑުބޮޑުވި ކަމަށް އެ ހޮސްޕިޓަލުން ހާމަކޮށްފައިވެ އެވެ.

އައިވީއެފް ހަދަން މިހާތަނަށް މީހުން ދިޔައީ ރާއްޖެއިން ބޭރަށެވެ. އެ ފަރުވާ އަށް ގިނަ ދުވަސްތަކެއް ވަންދެން ރާއްޖެއިން ބޭރުގައި މަޑުކުރަން ޖެހޭތީ އަތުން ވެސް ބޮޑު ހަރަދެއް ހިނގަ އެވެ. ނަމަވެސް، ޓްރީޓޮޕް ހޮސްޕިޓަލުގައި އައިވީއެފްގެ ބުރަކަށް ކަނޑައަޅާފައި ވަނީ 46،000ރ. އެވެ. އެކަމަކު، ސަރުކާރުން މި ފަހުން ވަނީ އައިވީއެފަށް އާސަންދަ ދިނުމަށް ހުޅުވާލައިފަ އެވެ.