ޕަމްޕް ސްޓޭޝަންތަކުން ވަސްދުވުން ހުއްޓުވުމަށް ޒަމާނީ ވަސީލަތްތަކެއް ބޭނުންކުރަނީ

އިސްމާއިލް ރިޒާ

18 ޖުލައި 2024 - 18:26

0 comments

މާލޭގައި އެމްޑަބްލިއުއެސްސީއިން ބަހައްޓާފައި ހުރި ޕަމްޕް ސްޓޭޝަންތަކުން ދުވާ ވަސް ކޮންޓްރޯލް ކުރުމަށް ހާއްސަ ސިސްޓަމެއް ބަހައްޓައި، ބޭނުން ކުރަން ފަށައިފި އެވެ.

އެމްޑަބްލިޔުއެސްސީން ބުނީ އެ ޕަމްޕް ސްޓޭޝަންތައް ހުންނަ ސަރަހައްދުތަކުގައި ހުންނަ ވަހުގެ ސަބަބުން އާންމު ރައްޔިތުންނަށް އޭގެ ސަބަބުން ވާ އުނދަގޫ ހުއްޓުވުމަށް ގާއިމުކުރެވުނު ފުރަތަމަ އޮޑާ ކޮންޓްރޯލް ސިސްޓަމް ބަހައްޓާ ބޭނުންކުރަން ފެށީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ސަރަހައްދުގައި ހުންނަ ހަަތަރު ނަންބަރު ޕަމްޕް ސްޓޭޝަންގައި ކަމަށެވެ.

އެ ކުންފުނިން ބުނީ ނަރުދަމާ ނިޒާމުގެ ޕަމްޕް ސްޓޭޝަންގެ ވެންޓިލޭޝަނަށް ގެނައި މި ބަދަލުގެ ސަބަބުން ޕަމްޕް ސްޓޭޝަންތަކުގައި މިހާރު ހުންނަ ވަސްހޮޅި ނަގައި، ޒަމާނީ އައު ވައިސާފުކުރާ ނިޒާމެއް ބެހެއްޓިގެން ދާނެ ކަމަށެވެ.

އާ ނިޒާމުގެ ސަބަބުން ޖައްވުގެ ތެރެއަށްދާ ވައިގެ ތެރޭގައި ހުންނަ ނޭދެވޭ މިންވަރު 99 އިންސައްތައިން ސައްތައަށް ދަށް ކުރެވޭނެ ކަމަށް އެ ކުންފުނިން ބުނެ އެވެ.

އެމްޑަބްލިޔުއެސްސީން ބުނީ މި ވަސީލަތްތައް ދެން ގާއިމުކުރާނީ މާލޭގެ ޕަމްޕް ސްޓެޝަން 2 ގައި ކަމަށެވެ. އަދި އެއަށްފަހު މާލޭގައި ގާއިމުކޮށްފައިވާ 9 ޕަމްޕް ސްޓޭޝަންގައި ވެސް މި ނިޒާމު ގާއިމުކުރާނެ ކަމަށެވެ.

މާލޭގައި ބަހައްޓާފައި ހުރި ޕަމްޕް ސްޓޭޝަންތަކުން ނުބައި ވަސް ދުވުމުގެ ޝަކުވާތައް އާންމުން ކުރާތާ ގިނަ ދުވަސްތަކެއް ވަނީ ވެފަ އެވެ. އެމްޑަބްލިއުއެސްއީ އިން ބުނިގޮތުގައި ޕަމްޕް ސްޓޭޝަނުގައި ބެހެއްޓި ސިސްޓަމަކީ ގިނަ ދިރާސާތަކަކަށް ފަހު ބެހެއްޓި ސިސްޓަމެކެވެ. އަދި މިއީ ކުންފުނި ޒަމާނީކޮށް ތިމާވެއްޓާއި ރައްޓެހި ވަސީލަތްތައް ބޭނުންކޮށްގެން ދެމެހެއްޓެނިވި ގޮތެއްގައި ހިދުމަތް ފޯރުކޮށްދިނުމަށް ކުރާ މަސައްކަތުގެ ދަށުން ފެށި މަސައްކަތެއް ކަމަށް ވެސް އެ ކުންފުނިން ބުނެ އެވެ.