ހުޅުމާލޭގެ ވަގުފު އިމާރާތް ބީލަމަށް

އަލީ ރާޒީ

16 އޯގަސްޓް 2024 - 13:48

0 comments

ހުޅުމާލެ ފޭސް 1 ގައި "ދާރުއް ސަލާމް" ގެ ނަމުގައި 12 ފަންގިފިލާގެ އޮފީސް އިމާރާތެއް ބިނާކޮށްދޭނެ ފަރާތެއް ހޯދަން އިސްލާމިކް މިނިސްޓްރީ އިން އިއުލާންކޮށްފިއެވެ.

އިސްލާމިކް މިނިސްޓްރީން ގެޒެޓު ކުރި އިއުލާނުގައި ބުނެފައި ވަނީ ވަގުފު އިމާރާތް ތަރައްގީ ކުރާނީ އޮފީސް ބިލްޑިންގެއް ގޮތުގައި ކަމަށެވެ. އެތަނަށް ކިޔާނީ "ދާރުއްސަލާމް" ކަމަށް ވެސް މިނިސްޓްރީން ބުނެ އެވެ. އިމާރާތް އަޅަންޖެހޭނީ ކޮންޓްރެކްޓަރު ފައިނޭންސް އުސޫލުންނެވެ.

އެކަމުގެ ޕްރީ-ބިޑް ބައްދަލުވުން އޮންނަނީ އޯގަސްޓު 26، ގަ އެވެ. އަދި ބިޑުތައް ރަސްމީކޮށް ހުށަހަޅަންޖެހެނީ ސެޕްޓެމްބަރު 8، ގަ އެވެ.

މާލޭގައި މިހާރު ވެސް "ދާރުލްއީމާން" ގެ ނަމުގައި ނުވަ ބުރީގެ ވަގުފު އިމާރާތެއް ހިންގަ އެވެ. އެތަން ބިނާކުރީ ކުރީގެ ރައީސް އަބްދުﷲ ޔާމީންގެ ވެރިކަމުގައި ޝަހީމް އިސްލާމިކް މިނިސްޓަރަކަށް ހުންނެވި އިރު އެވެ. "ދާރުލްއީމާން" ހުޅުވީ ޖެނުއަރީ 12، 2017 ގަ އެވެ.

ސަރުކާރުން ބުނެފައިވާ ގޮތުގައި ކޮންމެ އަތޮޅެއްގައި ވަގުފު އިމާރާތެއް އެޅުމަކީ އަމާޒެކެވެ.