އަޒަރުބައިޖާން އެއާލައިނުން ރާއްޖެއަށް ސީދާ ދަތުރުތައް ފަށައިފި

އަހުމަދު ނިހާން

09 ނޮވެމްބަރ 2024 - 21:21

0 comments

އަޒަރުބައިޖާން އެއާލައިނުގެ ސީދާ ދަތުރުތައް މިއަދު ރާއްޖެއަށް ފަށައިފި އެވެ.

އަޒަރުބައިޖާން އެއާލައިނުގެ ފުރަތަމަ ފްލައިޓް ވެލާނާ އިންޓަރނޭޝަނަލް އެއާޕޯޓަށް ޖައްސާފައިވަނީ މިއަދު ހެނދުނު 09:45 ގަ އެވެ.

އެއާޕޯޓު ހިންގާ އެމްއޭސީއެލްގެ ޗީފް ކޮމާޝަލް އޮފިސަރު މުހައްމަދު މިހާދު ވިދާޅުވީ އާ ރޫޓުގެ ސަބަބުން ދެ ގައުމުގެ މެދުގައި ދަތުރުފަތުރުގެ ގުޅުން ވަރުގަދަވެ، އަޒަރުބައިޖާނުން ރާއްޖެއަށް ޒިޔާރަތްކުރާ ޓޫރިސްޓުންނަށް ފަސޭހައިން ދަތުރުކުރެވޭނެ މަގު ހުޅުވޭނެ ކަމަށެވެ.

އަޒަރުބައިޖާން އެއާލައިންގެ ޗީފް ކޮމާޝަލް އޮފިސަރު ޖަމީލް މަނިޒާޑޭ ވިދާޅުވީ ވިންޓާ ސީޒަންގައި ރާއްޖެ ފަދަ މަގްބޫލު މަންޒިލަކަށް ސީދާ ދަތުރުތައް ފެށުމަކީ އަޒަރުބައިޖާނުގެ ޓޫރިސްޓުންނަށް ލިބޭ ބޮޑު ފަސޭހައެއް ކަމަށެވެ.

އެއާލައިނުން ރާއްޖެއަށް ދަތުރު ކުރުމަށް ހަމަޖެހިފައި ވަނީ އަޒަރުބައިޖާންގެ ވެރިރަށް ބަކޫއިން ސީދާ ވެލާނާ އިންޓަނޭޝަނަލް އެއާޕޯޓަށެވެ.

ރާއްޖެއަށް މިހާރުވެސް ބައިނަލްއަޤްވާމީ ގިނަ އެއާލައިންތަކަކުން ދަނީ ދަތުރުކުރަމުންނެވެ. އެގޮތުން ދާދިފަހުން ޔޫއޭއީގެ އެއާ އަރަބިއާގެ ޝެޑިއުލް ދަތުރުތަށް ރާއްޖެއަށް ފަށާފައި ވާއިރު އެއާ އަރަބިއާގެ ދަތުރުތައް ރާއްޖެއަށް ކުރާނީ ޝާރްޖާ އިންޓަނޭޝަނަލް އެއާޕޯޓާއި ވެލާނާ އިންޓަނޭޝަނަލް އެއާޕޯޓާއި ދެމެދުއެވެ.