ޝަމީމު ޖަވާބުދާރީވުމަށް ހާޒިރުވި ކޮމިޓީ ސިއްރުކޮށްފި

މަރިޔަމް އަނާ

22 އޯގަސްޓް 2024 - 11:39

0 comments

ޕްރޮސެކިއުޓާ ޖެނެރަލް (ޕީޖީ)ގެ މަގާމުން ހުސައިން ޝަމީމް ވަކިކުރަން ރައްޔިތުންގެ މަޖިލީހަށް ހުށަހަޅާފައިވާ މައްސަލައިގައި ޖަވާބުދާރީވާން އޭނާ މިއަދު މަޖިލީހުގެ ޖުޑިޝަރީ ކޮމިޓީއަށް ހާޒިރުވާއިރު ލައިވްކޮށްދޭން އެދުނު ނަމަވެސް އެ ކޮމިޓީ ސިއްރުކުރަން މަޖިލީހުން ނިންމައިފިއެވެ.

އެ ބައްދަލުވުން ފެށުމާ އެކު ތުލުސްދޫ ދާއިރާގެ މެންބަރު އިބްރާހިމް ނަސީމް ވިދާޅުވީ ޕީޖީގެ އިތުބާރު ނެތް މައްސަލައަކީ "ހައްސާސް މައްސަލައެއް" ކަމަށާއި އޭގެ ތެރޭގައި ބައެއް ބޭފުޅުންގެ ޒާތީ މައުލޫމާތުތައް ހިމެނޭ ކަމަށެވެ.

އޭގެ އިތުރުން މީގެ ކުރިން ބޭއްވި ކޮމިޓީ ބައްދަލުވުމެއްގައި ޕީޖީގެ ވާހަކަތައް ސިއްރުކުރަން ޖެހޭ ކަމަށް ޝަމީމް ވިދާޅުވެފައިވާ ކަމަށް ނަސީމް ވިދާޅުވި އެވެ.

އެ މައްސަލައިގައި ޖަވާބުދާރީވާން މިއަދު ހެނދުނު ރައްޔިތުންގެ މަޖިލީހުގައި އެ މައްސަލަ ދިރާސާކުރާ ޖުޑިޝަރީ ކޮމިޓީއަށް ޝަމީމް ހާޒިރުކުރަން ވަނީ ނިންމައިފައެވެ. އެ ކޮމިޓީއަށް ވަޑައިގެންނެވުމުގެ ކުރީގައި ޕީޖީ އޮފީހުން ނެރުނު ބަޔާނެއްގައި ވަނީ އެ ކޮމިޓީ ލައިވްކޮށްދޭން ޕީޖީގެ ފަރާތުން އެދިފައިވާ ކަމަށް ވިދާޅުވެފައެވެެ.

"ކޮމިޓީގެ މި ޖަލްސާ ސިއްރު ނުކޮށް، ޢާންމުންނަށް ހުޅުވާލައިގެން ބާއްވަވައި ދެއްވުމަށް ޕްރޮސިކުޓަރ ޖެނެރަލް އެދިވަޑައިގަންނަވައެވެ،" ޕީޖީ އޮފީހުގެ ބަޔާނުގައިވެއެވެ.