ޔާމީންގެ ޝަރީއަތް މާދަމާ ލައިވްކޮށް ދައްކަން ހަމަޖައްސައިފި

އަލީ ރާޒީ

15 ސެޕްޓެމްބަރ 2024 - 10:01

0 comments

ކުރީގެ ރައީސް އަބްދުﷲ ޔާމީންގެ މައްޗަށް ކުރާ ދައުވާތަކުގެ ޝަރީއަތުގެ އަޑުއެހުން މާދަމާއަށް ތާވަލްކޮށްފި އެވެ.

މާދަމާގެ އަޑުއެހުން ކްރިމިނަލް ކޯޓުގައި ތާވަލު ކޮށްފައިވަނީ 09:00 އަށެވެ. އަދި މި އަޑުއެހުން ޔޫޓިއުބް މެދުވެރިކޮށް ލައިވްކޮށް ދެއްކުމަށް ވަނީ ހަމަޖެހިފަ އެވެ.

މި މައްސަލައިގެ އަޑުއެހުމެއް މީގެކުރިންވެސް ކްރިމިނަލް ކޯޓުގައި ބޭއްވިއިރު، ކުރީގެ ހުށަހެޅުންތައް ހުށަހެޅުމަށް ދެ ފަރާތަށްވެސް ވަނީ ފުރުސަތު ދީފަ އެވެ.

އެ މަނިކުފާނުގެ މައްޗަށް ދައުލަތުން ދައުވާކުރަނީ ވ. އާރަށް ކުއްޔަށް ދިނުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުފުޅު ކުރައްވައި، އެ ފައިސާ ލޯންޑާކުރި ކަމަށް ބުނެ އެވެ.

އެ މައްސަލާގައި ޔާމީންގެ އިތުރުން ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ވެސް ދައުލަތުން ދައުވާކުރެ އެވެ. އެ ދެ ބޭފުޅުންގެ މައްޗަށް ކްރިމިނަލް ކޯޓުން ޑިސެމްބަރު 2022 ގައި ޖަލު ހުކުމް އިއްވި ނަމަވެސް ހައި ކޯޓުން މި އަހަރު ވަނީ އެ ހުކުމްތައް ބާތިލްކޮށް، އެ މައްސަލަ އަލުން ބަލަން އަމުރު ކޮށްފަ އެވެ

އާރަށް މައްސަލާގެ އިތުރުން ރ. ފުއްގިރި ކުއްޔަށް ދިނުމުގެ މުއާމަލާތާ ގުޅިގެން ވެސް ރިޝްވަތާއި މަނީ ލޯންޑްރިންގެ ދައުވާ ދައުލަތުން ޔާމީންގެ މައްޗަށް ކުރެ އެވެ. ނަމަވެސް އެ މައްސަލަ ކުރިއަށް ގެންދަނީ ވަކިންނެވެ.